¹ ባቴ ኧረምድሁዋታይ ቡሼኤኸ ኧዘግድሁዋታ ኧቨትራርመኛይ ኧቬናመኛ አክሊል ኧኸርሁዋ ኧሰማትኞ እመኸቭ ደቦመኛ ኧኸርሁዋ ተቁማሞርሙ ተሰገዋ። ² ብእማት ተስቫቬተሁዋ ትረውርዋኸ ኤዎድራንንቪ ሲንጢኪንንቭ ኧሰኧርሁዋ ። ³ ኧቬናኛ ኢጉዣ ኧኸርኼ ኧውጌል ብኔወዳ ወቅት ቲያይ ተቀሌምጦስመጋ እመኸ ሹሁኖው በአያ በኸረ ቢጣፍካ መጣፍ ተኤኛ ተቬና ቤሻመኛ እማትሜ ጃድ ቫራ ተቄጫ ትእም ኢስቻቭ ትኢፕርኮይ ኧሰኧርኸ። ⁴ እን ግዚየ በጌታ ኧሳ ኧሳርሁዋ፤ዋአካቭ እርሁዋ በጌታ« ኧሳርሁዋ» ⁵ ፈራኺነዳሁዋ ኧሰቭ እንእ ኧትኼትር ጌታ ቢኢናወ ቀረ ያአንሴ ። ⁶ ብንአር ኧጎይታ ሽኩርት ትታቴኤንውነ ሳአሪ ባሃሬ በአትአር አጠረቁዋ። ⁷ ትንእ በፎረ ይረካ ኧጎይታ ወገሬት ኺንማሁዋይ ቀልብማሁዋ በኢየሱስ ክርስቶስ ይቲኢየ ። ⁸ ዋአካቭ ኧሰማትኞ ጫውነድ ኧኸራአር እንእ፥ቂጢየ ኧኸራአር እንእ ፥ጥርር ኧኸራአር እንእ ፥ ንማጅነድ ኧኸራአር እንእ፥ሰቨ ወኼናአር ይካአር እንዳም አጫምጩዋ። ⁹ ቲያ ኧትማርሁይ ወይኧቴኤፖርሁይ ወይ ኧሰማሁይ ፥ወይ አሸሁይ፥ዋሁኖዋ እንዳም ኧኖዋ ኧወገሬት ጎይታ ታሁዋ ይኽሴ ። ¹⁰ ተኖኦራ ግዚየቀጥወ ሃአኝሁምታ ኢያአር ኦኦስፕት ኧቀነስሁዋይ ኧኸሬ በጌታ ኢየሱስ ኑእያአር ይሽሬ ፤አሁም በሂናሁዋ ትጨፑኒ ባንደ፤ ¹¹ እመዳ እካ ብካና ኣጠበጠይ አኸረዳ ፤ቢኸር በቫኒም ብካና ከስ ብንኸር አነኒዳሁዳ ይቃይሴ ኧዋርት ሃርሁ ፤ ¹² ብካናቭ ቢኸር ኧኺር ኧኮርት ቢኸር ኧኺር ፣ብኖኦፍ ቢኸር ቢገደይ ፣ብነኽቭ ኸር ብንቨኽር በቫኒማአር ቢኸር ማኒማአር ብንኸር አነኒዳ ሁዳ ይቃሴ ይሪዳ ሚስጥር ሃርሁ ። ¹³ ደረግ ቢይቬዳ በክርስቶስ ኢየሱስ እንአር ኦኖት ይኸኒ። ¹⁴ ቢኸር መከራኛ ኧሻከትሁዋይ ወኼአር ኤፐሁም ። ¹⁵ ተዋ ይረእ አሁም ገግማሁዋ ኧፊልጵስዩስ ሰቨ ሁሞዋ ቲኺሪዋመኸ አወተረ ወንጌል በቴኤፐርሁዋ ግዚየ ተሞቀደኒያ ትትረሳካ ታሁዋ ኤኛአር ባውትቪ በተኣወት ቢኸር ማኒማአር ቢኸር በቬተክርስቲያን ባውት አኔኤፖርኝዳ ፤ ¹⁶ ኢያ በተሰሎንቄ በነፐርሁወ ግዚየ በቭካናኛ ወቅት ሃአቭሁምታ ያትኬሼዳአር እንእ ኬሽሁኒ ። ¹⁷ እም ትርፍ አሁዋ ቲደብስ ያርነኸ ባንኸሬ ቲውኝ ሴተሁታ አኸረዳ። ¹⁸ ያሲኤዳአር እንዳም ቲያሲኤዳአ በፎር ቴኤፐርሁ ኤኬሸሁኒም ስጦታ ተአፍሮዲጦ ኧጅ ቴኤፐርሁ እም አሁኝ ስጦታ በወኼ ሽትነድ ኧትቬና ኽትቨኸ ጎይታ ቲሽርኩ ቴኤፐረን። ¹⁹ ጎይታ በኑእ ደረግኋ ያሲኢሁዋታአር እንእ በክርስቶስ ኢየሱስ አጋድ ኧቨናታ አሁዋ ። ²⁰ ኧአቦንራ ጎይታ ክብር ኧዘላለም ኧኽር አሚን። ²¹ ኧቅዱሳን እንእ በክርስቶስ ኢየሱስ ወኼምንሁዋዌ ባርኒ። ²² ቅዱሳን እንእ ይረካሞኋ ተንጉስ ቄሳር ቢድ አነውታ ሰቨ ወጌምት ያቲኢንውነኩዋ። ²³ ኧጌታንራ ኢኢየሱስ ክርስቶስ ጠጋ ታሁም ኧኽር አሚን።