¹ በኢየስሱስ ኧቫአ ተታአከደ ተጳዉሎስቪ፤ ተኧሰመንራ ተጢሞቲዎስቭ፤ ንረድኔዳ ናማጂመንራዪ፤ ኧቬና ቤሻመንራ ኧኸረ ኧፊሊሞና ። ² በቪድማኸ ኢደሞጅታ ሰቭቪ ኧኧተመንራ አአፍቢያ እመኸቭ ቲና እማቲ ኧክርስቶስ ወታደር ኧኸረ አአርክጳ ፤ ³ ታአባንራ ተጎይታ ተጌታመንራ ተኢየሱስ ክርስቶስ ፤ኧጎይታ ጠጋዪ ወገሬትቭ አሁዋ ኧህር፤ ⁴ አኸ በጠሎትኛ ትንዘግድኸዳ፤ እንእ ግዚየ ኧጎይታ ሽኩርት አቲኢንቭ ፤ ⁵ እመዳ ኧኸረ ሁዳ በጌታ በኢየሱስ ክርስቶስ አአሞሩዋ ሰቭ ትረድመኸዪ፤ በጌታ ቢኢየሱስ ክርስቶስ ታአቭርመኸ ሰምአሁ ታንዳ ። ⁶ ኧክርስቶስ አአር በሁርትንራ አነንረዳ ወሄ ዘንጋ፤ እንእ ሃይተኸታ ኧዉየሞኃ እምነታኸ ኢትሄረኸ ኤኤኛ ሰቭ ባአዉጅት ጃድ ትቭረኸ ኧጠሊነኸ ። ⁷ ኧሰምኞ ኧቅዱሳን ሂን አትሳርሄ ኧኸሬ ፤ባሄ ንማጀ ኖኦራ አአር ሳረዪ፤ ተቁሟᎀርሁዉ ⁸ ብእም ኧቫአ ኦንኧት አኘቨኸዳ አአር ቴቨኸ ኢኢዝዝሄ በክርስቶስ ዳኝንነድ ቢረቭረዪ ፤ ⁹ ዘንጋ ጭን ኢኢዝዝኸዳ ሟሪ በርማጀ ኧሰኧርኸ ፤ባቴ ኢያ ባሪቅቪ ኧክርስቶስ ትንቭር ኧታአከድሁ ጳዉሎስንሁ ፤ ¹⁰ ኧሰኧርኸዳቭ ሁዳ በታአከድሁ ኤኤዲ በኦህኔ ቢድ ታነሁ በክርስቶስ አቴኤመርሁን ኧመንፈስ ትከኛ አአናሲሞስን አአር ። ¹¹ አናሲሞስ ኧዋ ኢፍቲ ባያጌኲርኸዳ ዋአካ ጭን አኽቭ ኢያቭ ያጔኲርካ አአር ኸረ ። ¹² ኧሂንኛኸ ኢኸኒዳ አናሲሞስ አኼ ኬሸሁን ፤ትንኬሽኩዳቭ ገግኛ አሁዋይ ኧቫአሁ አአህር ሜዘርሁ ። ¹³ ሁድቭ በወንጌል ኧቫአ በታአከድሁጋ ባሄ ኤኤዲ ተሰገይተ ያጔኲረዪ ኧገግኛ አዎኧርኩይ ሴኧሁ ባንደ። ¹⁴ ዘንጋ ጭን አኸ ቲንአኩዳ ወሄ ሜና እንእ በርማጀ ባኸሬ በግርድ አይኸረኸ ታናትቫታኸ አታአር ኤቪ አንሲእካ ። ¹⁵ ወይ አትንሽ አናሲሞስ ኧቀሪ ቀረ ታኸ ኧቲቫተረ ሁዳ ተዋቴ እንእ ግዚየ ታኸ ኢረቭሪ ኢህርሴ ። ¹⁶ ተዋቴ ጭን ታኸ ኢረቭርካ ሁዳ ኧቬነኝኸ ታይኸርቭ ፤ተቬነኝ ኢረእ ኢረጂዳ ኧሰምነኽ፤ ኢያ ናማጂነኛ፤ ቢኸርቭ በቨሰርቪ በጌታቭ አኸ ኢረእካ ናማጂናኸ ¹⁷ ባቴ ኧራማጂያኸኸ በቬዘርኼ ኢያ ትቴኤፐሬዳ አአረኸ ኧንአ ተኧቨርኩ ። ¹⁸ አኸ ቡሼእ ኧዋአረናኸ አአር በረፐረ ዌ አኸ አአር አጅግ በረፐረወ ቢያ አዉራኩ ። ¹⁹ ዋዳ ኢያ ጳዉሎስ ገግኛ በኧጅኛ ጣፍሁን፤አአናሲሞስ ባኸ አኖዳ ሰቨት ኢያ ኧካስነኸሴ፤አኸቭ ገግማኸ ኢያ አአር ኧሁርታኸ አአር አታአር አንዝሬካ ። ²⁰ ኧሰምኞ በጌታ ታጔኲረዪ ኧሲእ ፤ እንዴ ዋአካ አኸ በክርስቶስ ሂንኛ አትሳሬ ። ²¹ ዋዳ ኧፀፍነኸዳ ሁዳ፤ ትቴኤዘዝካ አአር ኧኸርኸኸ በታአሞርት፤ ኢያቭ ትንቭኸዳ ሁዳ ቦፎረ ቲንአመኸ ቦኋርትን። ²² ትእመዳ ኤኛ አአር ጠሎታሁዋ ጎይታ ሲቭኧተናሁዋታ አሁዋይ ኧቫአኬ ዩሪዳ ተስፋ አነኒ ኧኸሬ አፎይወዳ ኤኤድ ጎኩርኒ ። ²³ ቲያቭ እማቲ በክርስቶስ ኧቫአ ኧታአከደ ኤጳፍራ ወጌም ይቭኸ ። ²⁴ ህመኸ ቲያ ኧወንጌል ሜና እማቲ ዪንኧታ ማርቆስ፥አርስጥሮቆስ ፥ዴማስቪ ሉቃስቭ ወጌም ዩቩኰ። ²⁵ ኧጌታ ኢኢየሱስ ጠጋ ተመንፈሳሁዋ እማቲ ኧህር።