1 2 1. ተህም ቀጥወ ኢየሱስ በገሊላ ገኘ ውር ውር ይር በነደ ፤ኧይሁዳቭ ገኘ ዳኘ ዮኦትሪ ኢሱኢ ኣረፐሬ፣ በይሁዳ ገኘ ኢኢክሲ አንሴኤዳ ። 2. ህም ግዝየ ኧይሁዳ ሰቭ ኧዳስ ሙርአ ቀረ ሰንአ ባነደ። 3 4 3. እመኸ ኧኸሬ ኧሰማትኋ ኧኢየሱስ «ተማሪያኸ አኸ ቲንአኩዳ ወግ ዘንጋ ያዡዋኸ ተዋይ ተሳታ ይሁዳ ገኘ ሆር» ቧሪ ። 4. በሰቭ ኢፍቲ ኢትሄሪ ኢስእካ ሰቭ ሜናኋ በዱኡራቸ አዬካ፤ አኸ ዋሁኖዋ ቴቭ በኸረ ገጋኸ ኧሰቭ እንእ አትሄር » ቧሪ። 5 6 7 5. እመኸ ኧዋሪ ሁዳ ኧሰማትሞኋ ስን በሁዳ አናአሞሩዋይ ኧኸረዴ ። 6. ኢየሱስቭ «ኢያይ ግዝየኛ ገና አንሰንአዳ አሁዋ ጭን ማንእየ ግዝየ ኢድጋፓሁዋ፣ ።7. ኧዋ አለም ሰቭ አአሁዋ ኢረጅኩዋ፤ ኢኢያ ጭን አይረጅኝዳ፤ሁኖዋ ዬዊዳ ሙጥጥ ሜና ኢኢድዎይ ኧኸረንዴ ። 8 9 8. አሁዋ ኧዳስ ሙርአይ ሆሩዋ፤ ኢያ ግዝየኛ ገና አንሰንአይ ኧኸሬ ኧዋ ሙርአይ አናርካ»ባረኖም ። 9. እመኸ ባረኖምታ በገሊላ ገኘ ኤኬሰ። 10 11 10. ቢኸርቭ ኧሰማትኋ ኧድግስ በወሩዋ ቀጥወ ፣ ኢየሱስ ህሜ ወረ፤ኧወረቭ ሁዳ በዱኡራቸን ባሀሬ ሰቭ ቲያዥኩ ኧውየሞኋ አነፐረዳ ። 11. በህመኸ ሙርአ ቀረ « ሀ ምስ ኧቲ አነ ቲዩሩዋ ኧይሁዳ ሰቭ ዳኘ ኧኢየሱስ ኢሱኢ ባነደ። 12 13 12. ሰቭ እንእ ከስ ተከስ ሁድተሁድ ኧኢየሱሳአር ኢዝሬክ ባነደ፤« አታትሁኖዋ ሁዳ ወሄ ሰቭን፤ » ቲዩርታ «ኧኛሁኖዋ ወሄ ሰቭ አኸረንዳ ሁዳ ሰቭ ያሳስትካናአር » ዩሩዋ ባነደ። 13. ቢኸር ሰቭ ሁኖዋ ኧይሁዳ ሰቢ ዳኘ ኧፈኘዊ ኧኸሬ አት ሰቭ ኢየሱስ ኧሀኸትናአር ባይተታ ቃርኋ ክፍችተ አንዝሬከዳ። 14 15 16 14. ኧዳስ ሙርአ ግት ቲኸርካ ኢየሱስ ቤተ መቅደስ ወረታ አትሞርት ቀነሰ ። 15. ኧይሁዳ ሰቢ ዳኘ «ዋ ምስ ታይትማር ዋ እንእ ትምርት ኧተኸ ሀረ ቧርምታ ወግ ኢኸርዎዋ ባነደ ። 16. ኢየሱስቭ « ኢያ አትመርኩዳ ትምርት ኧረከሁን ተኬሼ ሁዳን ባሀሬ ኧገግኛአር አኸረንዳ» ባረኖም ። 17 18 17. ኧጎይታ ፍቃድ ዬቪ ኢሲእካ ሰቭ ቢረቭር ዋ ትምርት ተጎይታይ ኧረከዊኸ ዌ ኢኢያ ኧገግኛአር ኧኸረኸ ይሂር ። 18. ኧገግኋአር ኢዝሬካ ሁዳ ኧገግኋ ክብር ኢሲእ፤ ኧኬሸን ሁዳይ ክብር ኢሲእካ ጭን ኧታአመረዳናአር፤ ፍጥር ኤኖዳ። 19 20 19. ሙሴ አሁዋ ቂጫ አቫናሁምሽ አሀራ ? ቢኸር ታሁዋ ቂቻ እእየ እማት ሰቭ ኤነዳ፤ አሁዋ ኢኢያ ቶኦትርኚ እፋድ ትሱኡኰኝ » ባረኖም ። 20. ሰቭ ሁኖም « አኸ ሼጣን አነቨኸ ፤አኸ የኧትሪ ማን ኢሲእ ? ቧሪ። 21 22 21. ኢየሱስ ዋኸ ባረኖም «ኢያ አት ዘንጋ ኤፐዂ ሁድ ወግ ኽረዎሁም።22. ሙሴ ዴንጋሁዋ ዘገር ታአጎዋኸ ቂቻ አቨናሁም፤እም ቂቻ ኧድረ አቦነንራአር ባሀሬ ኧውሴያአር አኸረዳ፤አሁም ዴንጋሁዋ በሰንበት ዘገር ታአጎኦዋ ። 23 24 23. አካ ኧውሴ ቂጫ ባይወኧሪ ዴንጋሁዋ በሰንበት ዘገር ታጎኦዋ በኸረ፥ ኢያ በሰንበት ቀረ ኧሰቭ ሙርአ ምስየ እንእ ተቫአሽ አፍያ ኤፐዂ ኧቭር ትዋአቹዋ?።24. ቂትየ ፍርድ ፉርጁዋ ባሀሬ ፣ኧሰቭ ኢፍት ኧሽተሁዋ አትፉርጁዋ።» ባረኖም። 25 26 27 25. ተኢየሩሳሌም ሰቭ አታትሁኖዋ «ኧይሁዳ ዳኘ ዮኦትሪ ኢሱኢዳ ምስ ዋዳ አኸረንዳ ?26. ሁድቭ ታይደእርቪ [ታይፈይ] ኧውየሞኋ ኢኢድ፤ሁኖም አታአር አዩሪንዳ፤ ኢባአኴ ኧዋሪ ክርስቶስ ሁዳ ኧኸረኸ ኧይሁዳ ዳኘ ውረ ኋርም ይህርሴዪ? 27. ዋ ምስ ጭን ተኧቲ ኧቫአኸ ኢናቭ ንሂነ፤ ክርስቶስ ቲቫአካ ጭን ፣ተኧቲ ኢቫአኸ አት ሰቭ አይሂርካ »ዩሩዋ ባነደ፤ክርስቶስ ቲቫአካ ጭን ተኧቲ ኢቫአኸ አትዎኋ አይሂርካ። 28 29 28. ኢየሱስ በቬተመቅደስ ቲያትያትመርካ ቃርኋ ነሳታ «አሁዋ ኢያ ትሂርኝ ፤ተኧቲ ኧቫአሁመኸ ትሂሩዋ፤ ቢኸር ኢያ በገግኛ ፈቃድ አማአኋ፤ኧኬሸዪ ሁዳ ሙርቴናአር፤ሁድቭ አትሂሪዳ ።29. ኢያ ጭን ተሁዳይ ኧቫአዂ ኧኸሬ ፣ሁድቭ ኧኬሸዪ ኧኸሬ ኧሂር» ባረኖም። 30 31 32 30 እመዳ በቫረ ቀትወ ኢጠጪ ተረሾም፤ቢኸርቭ ጭን ግዝየኋ አንሰንአይ ኧኸሬ አት ሰቭ አነከደንዳ።31. ዘንጋ ጭን ተሰቭ ሁኖዋ ኖኦራሁኖዋ አሞርም፤«ክርስቶስ ቲቫአካ ዋ ምስ ቴፐን ወሄ ሜና ኢረእካአር ዬኴዪ?»ቧርም።32. ሰቭ ሁኖዋ ኧኢየሱስ ዘንጋ ታአፉ አፉሁኖዋ ቲዝሮኩታ ኧፈሪሳ ሰቭ ሶምኦም፤ብእም ኧቫአ ኧካህን አላቃቪ ኧፈሪሳ ሰቭ ኧኢየሱስ ያቲኢኪጂ ወታደር ኬሾም። 33 34 33. ህም ግዝየ ኢየሱስ « ቀሪመጋ ታሁዋ ኢኢክስኴ ፤ተህም ቀጥወ ኧኬሼ ሁዳይ አርኴ፤34. አሁዋ ኢያ ትሱኡኝዴ ዘንጋ ጭን አትረሁኝዳ፤» ባረኖም ። 35 36 35. ኧይሁዳቭ ሰቭ ዳኘ «ዋ ምስ ኢና እንህብኔኸ ኧቲ ያርኴ?በይሁዳ ሰቭ ግት ኧትብራጨውዋ ኧይሁዳ ሰቪ፣ ዌ ኧግሪክ ሰቭ ያትመርኮዋይ ያሪ ኢህርሴዪ? 36. አሁዋ ኢያ ትሱኡኝዴ ዘንጋ ጭን አትረሁውኝዳ፤ኢያ አነሁወዳ ኤኤዲ ትዎኦዋይ አይኸነሁዋታ፤ቲይካ ምር ኧዋርትኋ ባነደ ? » ትተዌዌርም ። 37 38 37. ሙርአ ሁዳ ያርእወዳ ቀረ ማአ በሰንአጋ ኢየሱስ ተሸከቨ ቃርኋ ነሳታ « ማንእየ ሰቭ ቢጠቫኩ ኢያይ አአ ኧስጤ፤38. ቢያ ያአቭርካ ሰቭ መጣፍ ይርመኸ ኢያ ኢካ እሀ ተከስኋ ኢገድድኴ፤ » ባረኖም። 39 39. ኢየሱስ እመዳ ኧቫረ ሁዳ ያአውታ ሁኖዋ ኢቴኤፖሪዳ መንፈስ ቅዱሳአር ባነደ። 40 41 42 40. ተሰቭ ሁኖዋ አታትሁኖዋ ዋ ቃር በሰምኦዋጋ « ጪግ ኢቫአኴ ኧዋሪ ነቢ ዋዳን »ቧርም።41. ኧኛሁኖዋ «ሁዳ ክርስቶስን» ቧርም።ኧኛሞሁኖዋ «ክርስቶስ ተገሊላ ገኘ ተቭር ኢቫአ?» 42. ክርስቶስ ተዳዊት ጥቭ ኢቴኤኘኸ ተዳዊት ቃያ ተቬተልሄም ኢቴኤኘኸ በቨጣፍ ጣᎉሽ አሀራ?» ቧርም ። 43 44 43. በኢየሱስ ኧቫአ ሰቭ ውርኤቲ ኸረ። 44. አታትሁኖዋ ኢየሱስ ጥጭተውዋ ያአጉጂ ኤልኦም ባነደ፤ዘንጋ ጭን አትዎኋ በኧጅኋ አነከደንዳ። 45 46 45. ተህም ቀጥወ ወታደር ኧካህን አላቃሜዪ ኧፈሪሳ ሰቭሜ ዎርምታ ኧካህን አላቃቪ ኧፈሪሳ ሰቭቭ « ምስ ሁዳ ኧቭር አናቫአዂዳ ? » ቧርም ተሳአሪዮም።46. ዋ ምስ ኢዝሬክኸ አትዎኋ አይዝሬካ አንሰምኤዳ» ቧርም። 47 48 49 47. ኧፈሪሳቭ ሰቭ « አሁም ተቨታሁሚ ? 48. ተዳኘ ዌ ተፈሪሳቭ ሰቭ እማት ሰቭ በሁዳ አአመራአር አኔ? 49. ዋ ሰቭ ኧውሴ ቂጫአር አይሂሩዋ ኧትሰተውዋ ሰቭኖዋ» ባረኖም። 50 51 52 50. ኧዋ ኢፍቲ ኧኢየሱሲ ኧወረ ኧረፐረ ኒቆዲሞስ ፤ 51. « አት ሰቭ ብደይቶ ኧትከሰሰወ ክስ መልስ ታይሶውነ ኢትፈንድዌ ቂጫንራ ኢፈቅዲ?» ባረኖም።52. ሁኖም « አኸ ኧገሊላ ስቭንሄ? ነቢ ተገሊላ ገኘ አይትረሳኸ መርምር ሀር» ቧሪ። 53 53. ተህም ቀጥወ እንእዎሁኖዋ ቢድ ቢድሁኖዋይ ዎርም።