1 2 3 4 1 ተህም ቀጥወ ኢየሱስ ኧይሁዳ ባዓል ኧረፐሬ ኧኸሬ ኢየሩሳሌም ወረ ። 2. በኢየሩሳሌም ኧጣይ ኡፎቻ ቢዩሪዳ ኤኤድ ምዬ አምእስት ያርኮዳ መያ አነነዳ ብእብራይስጥ አፉ “ቤተሳይዳ” ዩቩሪዳ አት ኢይጠሞቅኮዳ ኧቸና እሃ ባነደ ።3 ህሜ ቢያርኮዳ ኤኤዲ ኖኦራ ጉዳተኘ፣ ፉርጥ ፥ጅረ፥ሽባ ተጎተርሙታ “እሃ ሁዳ ቲቅረቅርስነጋ ዩኡሮዋ ባነደ።4 አታት ግዚየ እእግዜር መላአይካ ወንደታ እሃ ሁዳ ያቅረቅርኩ ባነደ እሃ ሁዳ ቲቅረቅርካ አቨተረ ብእሃ ሁዳ ኧገፓ ሰቭ ተጠበጠን ተቫንእየ ባአሸ ኢተርፍ” ባነደ። 5 6 5 በኽሜ ሳሳዪ ሱት ዘቨር በጦናድ ኧረፐረ አት ምስ ባነደ።6 ኢየሱስቭ ዋ ምስ በትገተረ ኤኤዲ እሸንታ ሮኦራ ዘቨር በቫአሸ ኧረፐረኸ ሀረታ “ተቫአሻኸ ትተርፊ ትሲኢ?” ባርን ። 7 8 7 ኧጮረንቭ ምስ “ጎይታኞ እሀ ሁዳ ቲቅረቅርካ ነሳታ ብእሃ ሁዳ ከስ ያጋአይዳ ሰቭ ኤነኒዳ ኢያ ኧጋአኬ ባሁታ ትናትቫቅርካ ኤኛ ሰቭ በተረዪ ዪጋአ”ባረን።8 ኢየሱስቭ “ተሳ ኧትገተርኸወ አርጋኸ ፈንግታ ሆር” ባረን ። 9 9 ምስቭ ሁዳ ህመጋ ተቫአሸኋ አፊያ ኸረታ ኧትገተረወ አርጋ ፌነገታ ዎረ ህም ቀረ ኧይሁዳ ሰንበት ቀረ ባነደ ። 10 11 10 በህም ኧቫአ ኧይሁዳ ዳኘ ኧሀ ተቫአሸኋ ኧተነፈ ምስ “ሰንበት ኧረፐሬ ኧኸሬ አልጋኸ ትፌንጊ በሙሴ ቂጫ አንትፈቀደነኸዳ”ቧሪ።11 ሁዳ “ጭን ተቫአሸኛ አተነፌ ምስ አልጋኸ ፈንግ ሆር” ባረዪ ባረኖም ። 12 13 12 ሁኖም “በሰንበት ቀረ አልጋኸ ፈንግ ሆር ኧቫረናኸ ማንተን?”ቧርሙ ተሳአሪ።13 በህመኸ ኖኦራ ሰቭ ኧረፐሬ ኧኸሬ ኢየሱስ ተሄኤዲ ናባር ኧድዠፐሬ ኧኸሬ ምስ ሁዳ አፊያ ኤፐን ማን ኧኸረኸ አሀረ ባነደ። 14 15 14 ተህም ቀጥወ ኢየሱስ በቤተ መቅደስ ነከቨንታ “ኧዥ ኧኳ ተነፍኸ ተዋዳ ኧቫአሰ አአር አይቫአቨኸኸ ተዋ ቀጥወ ባጢር አተንአ” ባረን ።15 ምስቭ ሁዳ አፍያ ኤፐን ኢየሱስ ኧኸረኸ ወረታ ኧይሁዳ ዳኘ ኤኤደኖም። 16 17 18 16 ኢየሱስ በሰንበት ዋ ዘንጋ ኤፔ ኧይሁዳ ዳኘ ኢኢየሱስ አትሳድጅት ቆነሺ።17 ኢየሱስ ጭን “አባኛ ዋአካ ስን ኢንአ፤ ኢያቭ ኢንአ”ባረኖም።18 በኽም ኧቫአ አአይሁድ ዳኘ ኧኢየሱስ ቲኢፍት ይረእ ዮኦትሪ ተፉቂያቄርም፤ እማት ሰንበት ኧሻሬ ታይኸር እግዜር “ኢያ አባነኛ በዋርትኋ ገግኋ ትእግዜር ቂጥየ ኤፔ ኧኸረዴ» ቧርም። 19 20 19 ኢየሱስቭ ዋኸ ባረኖም “ ኢያ ኧውረመኛ እቭሁዋ አቭ እግዜር ቲዬካ አሸን ሁዳ ዪንአ ባኸሬ ትከ በገግኋ አታአር ኦንኧት አይኸነዳ አብ ዪንአኩዳ ሁዳ እንእ ትከቭ ዪንአ ።20 አቭ ኧወልድ ይረድኲ ኧኸሬ ዪንአኩዳ ሁዳ እንእ ያቲሽኩ፥ወግቭ ይኸርወሁዋኸኸ ትእምይረእካ አአር ያቲሽኩዴ። 21 22 23 21 አብ ኧዎጁዋ ሁኖዋ ነሳ አያ ዪንአመኸ ወልድቭ አያ ዪንአኲ ኧሴኣ እንእ አያ ዪንአኩ።22 አቭ እግዜር ባአትቭ ሰቭ አይፈርድካ ቢኸርቭ ኢፈርዲ ፍቃድ እንእ ኧወልድ አቨን።23 እመዳ እንእ ኤፕ ሰቭ እንእ አአቭ ያኽብድመኸ ኧትከሞኋ ያኸብድነኸ ኧወልድቭ አያኸብድ ወልድቭ ኤኬሸ እእግዜር አያኸብድካ ። 24 24 ኧዉረመኛ እሁዋ ቃርኛ ይሰቭአካ በኬሸዪ ሁዳ ያአቭርካ ኧዘላለም አያ ህይተ ይረቭርኬ፥ ሞደታ አያ ኸረ ባኸሬ ፍርድ ኤኖዳ ። 25 25 ኧዉረመኛ እሁዋ ኦዎጁዋ ሰቭ እእግዜር ትክ ቃር ኢሰቭኦኰዳ ወቅት ይቫአኴ ዋአካቭ ማአ ኢሰውኤዳቭ ሁኖዋ ሙድ አይረቭርዎታ። 26 27 26 አብ በገግኋ አያ ዪንአካ ሚንጭ አነንመኸ እመኸቭ ወልድቭ አያ ዪንአካ ሚንጭ ኤፐን ።27 ሁዳ ኧሰቭ ትከ ኧኸሬ ገግሞኋ ኢፍርዲ አብ ዳኝንድ አቨን 28 29 28 በዋ ዘንጋ ወግ አይህርቨሁዋ በወገማ ከስ አነዉታ ሰቭ እንእ ኧሁዳይ ቃር ኢሰቭኦኮዳ ግዚየ ይቫአኬ። 29 ወሄያአር ኤፐዉዋ ሁኖዋ አያ ሂይተዉዋ ይረዉርዋይ ተውድ ይትረሸቴ ሙጥጥ ኤፐዉም ሁኖዋ ይትፈንድወዋይ ተቩድ ይትሬሸቴ ። 30 31 32 30 ኢያ በገግኛ ፍቃድ ኦዎጣኛ አታአአር ኢይንአይ አይኸኒዳ፤ ኧፈርድኩዳቭ ፍርድ እማት አቭ ኤኤዴ ሁዳን ኤኬሸዪ ሁዳ ፍቃደኸ ባኸሬ ኧገግኛ ፍቃደኸ አኒንአይ ኧኸሬ ፍርድኛ ቂጥየን ። 31 ኢያቭ ኧገግኛ ምስክርነድ ብኒኢይድ ኢቴኤፐሬዳ ኤነዳ ።32 ቢኸርቭ ኢያ ዪኢድኒዳ ኧኛ አአር አነ።ሁዳ ኢያ አአር ምስክር ኸረታ ዪዝሬኩዳ ሁዳ ኧዉረ ኧኸረኸ ኢያ ኧሂር ። 33 34 35 33 አሁዋ ኧዮሀንሲ ሰቭ ኬሸሁም ባንደ ሁድቭ ኧዉረአአር ሄቶ ኸረ ኤኤደ። 34 እመዳቭ ኧዋርትኛ አሁዋ ትተርፉዋኔ ባኸሬ ኢያ ኧሰቭ ሄቶ ሴእተሁታ አኸረንዳ።35 ዮሐንስ ቲረድድ ያትረክቭካ ኩራዝ ባነደ፤ አሁም ኧቀሪመጋ በሁዳይ ብርሃን ቲትረክሁዋ ኢሽርሁዋይ አሸሁም ። 36 37 38 36 ኢያ ጭን ዮሐንስ ቴኤደኒ ምስክርነድ ኢይረእካ ምስክርነድ አነኒ ፥ አቭ ኢያ ኢንአኲ አቬ ዋ ኢንአኩዳ ሜና ፥አቭ ኤኬሼኸ ሄቶ ኢኢድኒ ።37 ኢያቭ ኧኬሼ አቭ ገግኋ ኢያአር ሄቶ ኤኤደ፤ አሁም አቸ ቃርሞኋ አሰምአሁም ደቨርሞኋ ስርም አናሸዂዳ ። 38 ሁድቭ ኧኬሸን ሁዳ አናአምርሁዋይ ኧኸሬ ቃርኋ ባሁዋ አይረቭርካ ። 39 40 39 አሁም በሁኖዋ ኧዘላለም አያ ኢንቶ ይረሁዊዳአር ኢቨስርሁዋይ ኧኸሬ እእግዜር ቃር ዪኢጅታ መጣፍ እንእ ተጨር ትምረሙሩዋ፤ ቢኸር ጭን ዋ መጣፍ እንእ ኢያ አአር ኢምሰኩሩዋታነዋ አአር፥ አሁዋ ጭን ኧዘላለም አያ ሂንተሁዋ ትረውሩዋኸ ኢያይ ቱዎኦዋይ አትሱኡታ። 41 42 41 ኢያ ተሰቭ ክብር አንቴኤፐርካ ።42 ዘንጋኋ ጭን አሁዋ በሂናሁዋይ እእግዝዜር አትረጁዋኸ ኧሂር። 43 44 43 ኢያ ባአባኛ ሹው ማአሁታ አንቴኤፐርሁኝዳ ኧኛኋ ጭን በገግኋ ሹቭ ቢቫአ፥ኧሁዳ ትቴኤፖሪ። 44 አሁም ገግተገግማሁዋ ክብር ትሱኡዋ፤ ዘንጋኋ ጭን ትእማት እግዜሪ ጭን ክብር አትሱኡዋ በኸረ እህ ባቴ ቢያ ኧተኸ ታአውርዋይ ይኸርነሁዋ። 45 46 47 45 ቢኸርቭ ኢያ በአቭ ኢፍቲ ኧከስስሁዋታአር እመሰረናሁዋ፤ ኢከስስሁዋታ ሁዳ ጭን ትትእማሞርኮዳ ሙሴን። 46 አሁዋ ኧሙሴ ታአመርሁዂ፥ ሁዳ ኧጣፈን ሁዳ ኢያአር ኧኸሬ ቢያ ተኧዎሩዋ ባነደ። 47 ሁዳ ኧጣፈን ሁዳ ባናአመርሁዋ ጭን ኢያ ኧዝሬክሁዋታ ሁዳ ኧተኸ ታአውርዋቴ ?።