1 2 ኢየሱስ ኧኒቆዲሞስ አትማረን፤ 1.አት ኧፈሪሳ ሰቭ ኧይኹዳ አለቃ ኒቆዲሞስ ዩሪንዳ ምስ ባነደ፡፡ 2.ኹድ በቭሳአረ ኧኢየሱሲ ማአታ‹‹አስተማሪዮ ጐይታ ተኹዳ ኧኧኸረ ሰቭ ባኸሪ ዋ አኸቴኮታ ወግ ዘንጋ ዬቪ ኢኸነዳ ሰቭ ኤነዳ፤ እመዳ ኧኸሬ አኸ ተጐይታ ኧቫአኸ አስተማሪ ኧኸርኸኸ ንሂነ›› ባረን፡፡ 3 4 3.ኢየሱስቭ ‹‹ኧውረመኛ እኸ ሰቭ ኻይቭተ ታይቴኤኝ አጐይታ መንግስት ያዢ አይኸነዳ›› ባረን፡፡ 4.ኒቆዲሞስ ቭ ‹‹ሰቭ በገነዘ ቀጥወ ማኸ ኤፐ ሀአቨ ኢቴኤኝ? ኧውሬተኘ ባአዶድኋ ከስ ጊቭአተ ኢቴኤኚ ኢኸኔ?››ባረ ተሳአረን፡፡ 5 6 5.ኢየሱስቭ ዋኸ ባረ ዠፐረን ‹‹ኧውረመኛ እንኸ ሰቭ ትእኻቪ ተመንፈስ ቅዱስቭ ባንቴኤኜ ኧጐይታ መንግስት ኢጋአይ አይኸነዳ፡፡ 6.ተሰቭ ኧቴኤፕ ሰቭን ተመንፈስ አቴኤኘ መንፈስን፣ 7 8 7.‹ኧውርኤተኘ ኧቶኦኝት አነቨኹዋ ኧባኬ ወግ አይኽርቨኸ .8.ንፋስ ኧሳረን አጋድ ኤፐ ኢረፍስ፤ አኸቭ ቃርኋ ትሰቭአ ባኻሬ ዋ ንፋስ ተኧቲ ኢቫአኸ ኧተሜ ያርመኸ አትኺርካ ተመንፈስ ኧቴኤፕ እንእ ኽመኸምን›› ባረኖም፡፡ 9 10 11 9.ኒቆዲሞስ ቭ ‹‹እኰዳ ኧተኺ ኢኸሪ ኢችል ባረ ተሳአረን፡፡ 10.ኢየሱስቭ ‹‹አኸ እእስራኤል አስተማሪ ኸርኸታ ዋዳ ኧተኸ አትኺርካ?» ባረን፡፡11.ኧውረመኛ እኸ ኧኻኔ ኹዳ ንዝሬኪነ አሸኔይ ሁዳ ሄቶንረ፤ አኹዋ ጭን ሄቶ ኸነ ኤኤድኔኩዋ ቃር አቴኤፖንረዳ፡፡ 12 13 12.በዋ አፈር አነዳአር ትረኢድኹዋታ አታአውሩዋ በኸረ፥ አካ ኧሳቫይአአር ቤንኢድኹዋ ኧተኸ ታአውርቴ? 13.ተሳቫይ ኧወንደ ኧሰቭ ትከ ባኻሬ ኧሳቫዪ ኧዋአአር ኧኛ ሰቭ ኤነዳ፡፡ 14 15 14.ሙሴ በቨረኻ ኧሳአር ጭረ ኧሰኧረመኸ ህመኸ ኧሰቭ ትከ ቤኧ ኢሶኡሪዴ፡፡ 15.እመዳ ኢኸርካ በኹዳ፥ ያአቭርካ ሰቭ እን ኧዘለአለም አያ ኺንተ ኢረቭርነኸ››ባረኖም፡፡ 16 17 18 16.‹‹በኹዳ ያአቭርካ እንእ ኧዘለአለም አያ ኢኸርኔ ባኻሬ አይዎደኽ ጐይታ ኧዋ አለምሰቭ ኖኦራአር ኧረመደኗይ እማት ትከኋ አቨ፡፡ 17.ጐይታ ትከኋ ኧዋ አለሚ ኧኬሼን ሁዳ በአለም ሰቭ ኢፈርዲ ታይኸር ኧዋ አለም ሰቭ በኹዳ ያተርፍኔ፡፡ 18.በኹዳ ቢያአቭርካ ሰቭ አይትፈንድወዳ፤ በኹዳ አያአቭር ሰቭ ጭን ብእማት በጐይታ ትከ ሹው አናአመሬ ኧኸሬ ዋአካሞኋ ተፈንደወ፡፡ 19 20 21 19.ፍርድሞኋ ዋኸትን፥እዋየ ኧዋ አለሚ ማአ ሰቭ ጭን እዋየ ኹዳ ታይኸር ጠነቫ ነሞጁም፤ ጠነቫቭ ኧረሞጁዋ ኹዳ ሜናኹኗ ሙጥጣአር አኸረዴ፡፡ 20.ሙጥጥ ሰቭ እዋየ ኢጠራ፤ ሜናሞኻ ባይትረከቭዌ እእዋዬ አይቫአካ፤ 21.ውረአር ዬካ ሰቭ ጭን እእዋዬ ኢቫአ፤ ኤፐንሜና በጐይታ ደረግቪ ፍቃድ ኧቴፐኸ ገኪተ ኢትረከኸ እእዋዬ ኢባአ፡፡ 22 23 24 ያጠምቅ ኧረፐረ ዮሐንስ ኧየሱሳአር ኤኤደ 22.ተህም ቀጥወ የሱስቪ ተማሪሞኻ ኧይኹዳ ገኘ ወርም፤ ኹድቭ በህሜ ቲያጠምቅ ተተማሪኋ ቸና፡፡ 23.በኽም ግዚየ ዮሐንስቭ በሳሌም ከተማ ምዬ ሄኖን ቢዩሪዳ ኤኤዲ ኖኦራ እሀ ኧረፐሬ ኧኸሬ በሀይ ያጠምቅ በነዳ፤ ሰቭ ሀይ ወረ ኢጠመቅ ባነደ፡፡ 24. ህም ግዝየ ዮሐንስ ኦህኔ ቢድ ተጉኦትኋ ኢፍቲ ባነደ፡፡ 25 26 25. በዮሐዩንስ ተማሪቪ ባአት በይኹዳ ምስ ግት ቢወጥርኰዳ ቂጫአ ኧቫአ ዘንጋ ተረሳ፡፡ 26.ኧየኋንሲ ተማሪ ኧዩኻንሲ ቴኤኖምታ ‹‹አስተማሪዮ ሀ ተዮርዳኖስ እሀ ሀአጋድ ታኸ እማቲ ኧረፐረ አኸቭ ኧኹዳአር ኤኤድኸነ ምስ ኧሰቭ ያጠምቅ፤ ሰቭ እንእ ኧኹዳይ ያር›› ቧሪ፡፡ 27 28 27.ዩኻንስ ዋኸ ባረኖም፤‹‹ማንእየ ሰቭ ጐይታ ታዩኩ አታአር ኢረኽቪ አይኸነዳ፡፡ 28.ኢያ ተኹዳ ኢፍቲ ኬሽውኝ ባኸሬ ኢባአኬ ኧዋሪ ክርስቶስ ኢያ አኸርኋ› አባኩዋኸ ገጋኹዋ ሄቶንሁዋ ባረኖም፡፡ 29 30 29.ምሽራ ሂዳ አአዝማችኒያአር፤ ቃርኋ ኢስቭአይ በቭየኋይ ኧትሸከቨ ሙዜኋ ጭን ኧቭሽረኘ ሁዳይ ቃር ቲስቭአካ ኖኦራአር ኢሽርኩ ፤ሀ ኧሳርት ኢያትናአር ኹድቭ ዋአካ ኸረ፡፡ 30.ኹዳ ኢረኢ ኢያ አአንሲ ያትኬሽ›› ባረ፡፡ 31 32 33 31.ተፎሬ ኢቫአካ ሁዳ ትንእ በፎረን፤ ተአፈር ኧኸረ ሁዳ አአፈርን ሁድቭ አአፈርአአር ኢዝሬክ፤ ተሳቪዪ ኢቫአካ ሁዳ ትንእ በፎረን፡፡ 32. ሁዳ አሸንቭ ኧሰምአንቭአአር ኢኢድ ቢኸርቭ ሁዳ ኤኤደናአር ኢሰቭአኩዳ ኤነዳ፡፡ 33. ሁዳ ኢኢድኩዳ ዘንጋ ያአቭርካ ሰቭ ጐይታ ውነተኘ ኧከረኸ አጬገ፡፡ 34 35 36 34.ጐይታ መንፈስኋ ስፊተ አዪቪ ኧኸሬ፣ጐይታ ኧኬሸን ሁዳ ኧጐይታ አር ኢኢድ፡፡ 35.አቭ ትከኋ ኢረድ፤ እንእ አአር በኧጅኋ አቨን፡፡ 36.በትከኋ ያአቭርካ እንእ ኧዘላለም አያ ኸረ ኢረቭር፤ በትከኋ አያአቭር ሰቭ ጭን ኧጐይታ ማአት በኹዳ ፎር ኢወትወ ባኸሬ አያ ኺንተ አይረቭርካ፡፡