1 2 1. ሀአቨታ ኢየሱስ ኧውረመኛ እሁዋ ቡኡᎈቻ ታይኸር በኧኛ አጋድ ኧጣይ ጋአድር ኢጋአካ ሁዳ ፈንገያዪ ሽፍጣምን።2. ቡኡᎈቻ ኢጋአካ ሁዳ ጭን ኧጣይ ዜማንቸን። 3 4 3. ቡኡᎈቻ ይእየካ ሁዳ ይጋአኸ ኡፈቻ ኢከፍትነ፤ጣይቭ ሁኖዋ ቃርኋ ኢሶኦዋ፤ሁድ ኧገግኋይ ጣይ በሹሁኖዋ ኢሂርኮዋ፤ሁድ አሄተረ ይወስትኮዋ።4. ኧገግኋአር ኧሆሩዋ ጣይ እንእ ባዋአኖዋ ቀጥወ ኢኢፍት ኢፍትሁኖዋይ ያር፤ጣይቭ ሁኖዋ ኧዜማቸ ሁዳ ኢሂሪ ኧኸሬ ይትሄተሪ። 5 6 5. ኧኧኛኋይ ቃር ጭን አይሂሩዋይ ኧኸሬ በሁዳ ኢፍቲ ኢውረዡዋ ባሀሬ አይትሄተሪዳ » ባረኖም። 6. ኢየሱስ ሟሟካ ኤኤደኖም ፤ ሁኖዋ ጭን ኤኤደኖዋ ሁዳ አᎆሰርታ። 7 8 7. ብእም ኧቫአ ኢየሱስ ሀአቨታ « ኧውረመኛ እሁዋ ኧጣዪ ኡᎈቻ ኢያትንሁ» ባረኖም። 8. ቲያ ኢፍቲ ኧዎኦዋ ሁኖዋ እንእ ፈንገያቪ ሽፍጣምኖዋ፤ጣይቭ ሁኖዋ ኧሁኖዋይ ቃር ባይሶኦታ። 9 10 9. ኡᎈቻ ኢያትንሁ፤ ቢያይ አጋድ ኢጋአካዪ ኢዋአካቭ ኢተርፍ፤ሁድቭ ኢጋአወዳዪ ኢዋአወዳ ሳአር አኖዳ ሰረጌ ኢረህቭ።10. ፈገያ ኢቫአካ ሁዳ እማት ኢሰርኢ ፣ የኧትርሜዪ ያአፋምኔ፤ኢያ ኧቫአሁ ሁዳ ጭን አያቪ ሙርአቭ ሂንተ ኢረቭርኔ። 11 12 13 11. ወሄ ዜማቸ ኢያትንሁ፤ወሄ ዝዜማቸ ኧጣይኋ ቲይር ነፍስኋ አዋአ ያኤፕር።12. ኧሁዳአር አሆሩዋ ጣይ ኢወኧሪ ኧስራዊ ዜማቸ ጭን እጎሮጉየ ጥይ ሁኖዋ ኢቨርአይ ኢቫአኸ ቲያዥካ ጥይ ሁኖዋ ቸኧኖምታ ኢሴሂ ኧኸሬ፣እንጎሮጉየ ሁዳ ኧጣይ ሁኖዋ አብረከገ ኢብራጭኮዋ።13. ኧጣዪ ዜማቸ ኢሴህካ ሁዳ ኧስራዊያአር ኧኸረንዴ፤ 14 15 16 14. ወሄ ዜማቸ ኢያትንሁ፤ኢያ ኧገግኛይ ጣይ ኧሂርኮዋ፤ጣይመኛ ኢኢያ ኢሂርኝ።15. ኢያ ሁኖዋ ኧሂርኮታ ሁዳ አቭ ኢኢያ ኢሂሬመኸዪ ኢያቭ አአቭ ኧሂርኩምነኸ፤ ኢያቭ ኧጣይኛ ነፕስኛ ኤኤተሁ አኤፕርኴ።16. ተዋ ጣይ እማት አሆሩዋ ቡችር ጣይ አነውኒ፤ ህሁኖም ኦኦት አነቪ፤ሁኖም ቃርኛ ኢሶኦቴ፤እንእዎሆኖዋ ብእማት ኢረውርቴ፤ዘማቸመሁኖዋ እማት ኢከርኴ። 17 18 17. «ኢያ ሀአይተሁ ኧወስኩዳ ነፍስኛ ኤኤተሁ ኢቪ ኧኸሬ አቭ ኢረንዴ።18. በገግኛ ፈቃድ ነፍስኛ ኤኤተሁ አአይፕሪ ባህብሬ ፣ነፕስኛ ቲያ ኢወስትቪዳ ሰቭ ኤነዳ፤ነፍስኛ ኤኤተሁ አአይፕሪ ፣ዣቪተሁ ኧወስዲ ደረግ አነኒ፤እመኸ ኤቪ አባኛ ኤዘዘዪ »ባረኖም። 19 20 21 19. በዋ በዝሬኬን ዘንጋ ኧቫአ አይሁድ ሁኖም ተሁኖም በግትሁኖዋ መራክስ ተፈጠረ።20. ተሁኖም ኖኦራሁኖዋ « ሁዳ ሼጣን አኖወ፣ ሽረኘን ኧቭር ቃርኋ ትስውኤ?» ቧርም።21. ኧኛሁኖዋ ጭን « ዋ ቃር ሼጣን አኖዳ ሰቭ ቃር አኸረንዳ ፤ሼጣን ኧፉርጥ ኤር ኧኩፍችት ኢኸኔ?» ቧርም። 22 23 24 22. በኢየሩሳሌም ኧቤተመቅደስ ኢወጥርኰዳ ሙርአ ያኮቡርኰዳ ቀረ ሰንአ ባነደ፤ወቅትሞኋ ዘር ባነድደ።23. ኢየሱስቭ በቬተመቅደስ ሰለሞን ዋአ ቢጋአወዳ ኤኤዲ ያር ባነደ።24. ኧይሁዳ ሰቭ« መቸ ስን ተጥራጠይተነ ንረቭነኸ ቴቨንረዴ?ትባአኴ ኧዋሪ ክርስቶስ አኸ በኸርኸ ገክር አውደንረ»ቧሪ። 25 26 25. ኢየሱስቭ « ኢያ ኤኤድኩም አሁዋ ጭን አንሰምአሁኝዳ፤ባአባኛ ሹው ኤኩዳ ሜና እንእ ኢኢያ ኢኢድኒ።26. አሁዋ ጭን ተጣይኛ አኸርሁዋይ ኧኸሬ አታአውርኝዳ። 27 28 27. ጣይኛ ቃርኛ ኢሶኦዋ፤ ኢያቭ ኧሂርኮዋ፤28.ሁኖም ኢትሄተርኝ። ኧሁኖም ኧዘላለም አያ ኢአኮዋ፤ ስርምቭ አይዎጅታ፤አትዎኋ ቲያይ ኧጅ ንጢቅተ ኢወስትኮይ አይኸነዳ። 29 30 31 29. ሁኖዋ ኢኢያ አቬ አባኛ ትንእአአር ኢረእ ፤ሁኖዋ ትአቭ ኧጅ ንጢቅተ ኢወስዲ ኢኸነዳ ኤነዳ።30. ኢያዪ አቭ እማትንረ» ባረኖም።31፣ኢየሱስ ዋዳ ቲይካ ኧይሁዳ ሰቭ ኧኢየሱስ ኢዎጎዪ ሀአውም እቭር ነሾም። 32 33 32. ኢየሱስቭ አቭ አቬ ኖኦራ ወሄ ዘንጋ አቴሸኩም፤ባቴ ኧቭር ብእቭር ትዎጎኝ?»ባረኖም።33. ሁኖም አኸ ብእቭር ንወጋኔከዳ ሁዳ ኧጎይታ ኧቀነኸዴ ባሀሬ ወሄ ሜና ኤፐሄ አኸረንዳ፤ አኸ ሰቭ በኸርኸሜ ገጋኸ ጎይታ ኤፐኸዴ» ቧሪ። 34 35 36 34. ኢየሱስቭ « በቂጫሁዋ ‹አሁዋ አማልክትንሁዋ ባሁም › ይንካ ቃር ተጣፈሽ አሀራ ? 35. ኧጎይታ ቃር ኧቫአኖዋ ሁኖዋ ፥ ጎይታ አምላክኖዋ ባረ በኸናኖጋ ኧጎይታ ቃር አይታሻርካ። 36. አካ አቭ ኧገግኋ ሙጭር ኤፐ ኧዋ አለሚ ኧኬሸን ‹ኢያ ኧጎይታ ትከንሁ› ኧቫሬ ‹ኧጎይታ ትቀርቭ› ኧቭር ቱሩዋ? 37 38 39 37. ኢያ አባኛ ኤፓአር ባንኔፐሁ አቶኦዎርኝ፤38. አአባኛ ሜና ኤቭ በኸረ ጭን ቢያ ባታአውርም በቬናኛ ኧቫአ ኧወሩዋ፤ በዋ ኧቫአ አቭ ቢያ አነመኸዪ ኢያቭ ባአቭ አኖኸኸ ገኪተሁዋ ትኋርዋሴ» ባረኖም፥39. ሁኖም ሀአውም ኧኢየሱስ ኢጠጪ ዣውም ባነደ፤ ሁዳ ጭን ወረኖም። 40 41 42 40 ተህም ቀጥወ ፣ ኧዋ ኢፍቲ ዮሐንስ ያጠምቅወ ኧረፐረ ኧዮርዳኖስ በር አጋድድ ተዠፐረ ወረታ ባሀይ ስረፐተ ፤ ኖኦራ ሰቭ ኧሁዳይ ሞኦምታ ፥«ዮኋንስ ስርም ወጋአር አኔፐዳ፤ ዘንጋ ጭን ዮሐንስ ኧዋ ምሳአር ኧዝሬኬን ዘንጋ እንእ ውረምን» ቧርም።42. በህም ኤኤዲ ኖኦራ ሰቭ በኢየሱስ አሞርም።