1 1 አወተረ ቃር ባነደ ቃር ሁዳ ትእግዜር እማቲ ባነደ እም ቃር ሁዳ እግዜር ባነ ደ። 2 ሁድቭ አወተረ ትእግዜ እማቲ ባንደ። 3 እንእ አአር በሁዳ ተፈጠረ ፤ ተትፈጠረ ሁዳ እንእ ሁዳ አይቫር ኧትፈጠረ አአር አተአር ኤነዳ ። 4 ነብሲያ በሁዳ ባነቸ እም ነብሲያ ኧሰቭ ኡዋየ ባነቸ 5 ኡዋየቭ በጠነቫ ያትረክቭ ጠነቫቭ ኡኡዋየ ስርም አዪኢምኩዳ። 6 ትእግዜሪ ኧኬሸዊ ዮሐንስ ዩቩሪዳ አት ምስ ባነደ። 7 ሁዳ በዝሬከን ቃር ሰቭ እንእ ያአቭሪ ኡኡዋየ ሁዳ አአር ምስክር ኸረ ማአ።ሁዳ ኡኡዋየ ሁዳ አአር ዪኢዲ ማአ ባኸሬ ገግኋ ኡዋየ አነፐረዳ:: 8 9 ኧሰቭ እንእ ያትረክቭካ ኧዉረሚየ ኧኽረ ኡዋየ ኧዋ አለሚ ይቫአ ባነደ። 10 ሁድቭ በአለም ሰቭ ግት ባነደ አለምቭ በሁዳ ተፈጠረ ኧዋ አለም ሰቭ ጭን አሀረንዳ። 11 ኧገግመኋይ ስቪ ማአ ኧገግሞኋይ ሰቭ አንቴኤፖሪዳ ። 12 ቢኸርቭ ኧሁዳ ኧቴኤፖሪቭ በሹቭሞኋ አአሞርዋ ሁነዋ እንእ እእግዜር ትከ ይሆርዋይ ዳኝነድ አቨኖም ። 13 ሁኖም ትእግዜሪ ቴኤኞም ባኽሬ ተቨሰር ተደቭ ዌ ተሰቭ ተመኛት ዌ ተሰቭ ፍቃድ አንቴኤኘዉታ። 14 ቃርቭ በሰር ተኽተረ ፀጋቪ ዉረቭ ተቬንአታ ቢና ግት ኔኧ አት ትክቭ ታአባኋይ አነንዳ ክብረኽ ክብርኋ አሸነ ። 15 ዮሐንስቭ “ቲያ ኢኢ ኧረፐረ ሁዳ ቲያ ኢፍቲ ኧረፐሬ ኧኸሬ ቲያ ኢረእ ባሁታ ኤኤድኩዋ ምስ ዋ ምስን” ባረታ ኤኤደ ። 16 ተውርአ ፀጋኋ ኧቫአ ኢና እንእቨንራ በፀጋ ፎር ፀጋ ሜንአነ ቴኤፐርነ ። 17 እእግዜሪ ቂጫ ተሙሴ አጋድ ቴቨ ባነደ፣ ጠጋቪ ኧቩረቭ ቃር ጭን ቲኢየሱስ ክርስቶሲ አጋድ ቴቨ። 18 ስርም እግዜር አሸን እማት ሰቭ ኤነዳ፤ዘንጋ ጭን ባአቭ ኡፏድ አነዳ እማት ትከኋ ኧኸረ አምላክ ያዢኸ ኤፐን ። 19 አአይሁድ ገኘ ዳኘ በኢየሩሳሌም ከተማ ቲረዉርታ ኧካህናትቪ ኧሌዊ ሰቭ ኧዮሀንሲ ኬሸዊዮምታ “አኸ ማንተንኸ?” ቧርሙ ተሳአሪ ዮሐንስቭ አታአር ታይደእር ዋኸ ባረ ኧቩየሞኋ ዝሬከታ ምስክር ኸረ እመኽቭ ባረ 20 “ኢያ ክርስቶስ አኸርኋ” ባረ ኤኤደ ባኽሬ አኸታዳ 21 ሁኖም “እኽ አኸ ኤሊያስንኸዪ ዌ ማንተንኸ?”ቧርሙ ተሳአሪ። ሁድቭ “አኸርኋ” ባረኖም ። “ሁኖም እእግዜር ቃር ዪኢዲ ኢቫኬ ኧዋሪ ነቢ አኸትንኼ?” ቧሪ፤ ሁድቭ “አኸርኋ” ባረኖም ። 22 23 22 ሁኖም “እኽ ባቴ አኸ ማንተንኸ? ኢና ኧኬሸዉንረ ሰቭ ኒኢድኔዮይ መልስ አቨንረ ኧገጋኸ አአር ምር ትቭር አኸ ማንተን?” ቧሪ ። 23 ዮሐንስቭ “ነቢ ኢሳያስ ኢዝሬክመኸ እእግዜሪ መያ ጎኩርዋ ባረ በቨረሐ ያኸራካ ሰቪ ቃርንሁ”ባረኖም። 24 25 24 ተኬሸዊዮም ሁኖዋ አታትሁኖዋ ኧፈሪሳ ሰቭ ባነዉተ 25 እህ ባቴ ክርስቶስ ዌ ኤሊያስ ዌ ነቢ ሁድሁ ባኸርኸሁ ተቭር ታጠምቅ?» ቧሪ። 26 27 28 26 ዮሐንስቭ “ኢያ ብእሃ አጠምቅ ዘንጋኋ ጭን አሁዋ አትሂሪ ሁዳ በግታሁዋ አነ።27 ሁድቭ ቲያ ኢኢ ኢቫአካሁዳን ኢያቭ ኧጫማኋ ክር ዳር ኧፈዳይ አንቨቃ ሰቭንሁ”ባረኖም ።28 ዋመዳ እንእ ኧኸረ ዮሐንስ ያጠምቅወ ተረፐረ ተዮርዳኖስ እሃ ሃእአጋድ ቢታንያ ቢዩሪዳ ኤኤዲ ባነደ። 29 30 31 29 ዮሐንስቭ በቭረጋኋ ኢየሱስ ኧሁዳይ ኤፐ ቲቫአካ አሸታ ዋኸ ባረ “እኩ አአለም ባጢር ያፈካካ እእግዜሪ ጣይ 30 ቲያ ቀጥወ ኢቫአኬ ቲያቭ ኢፍቲ ኧረፐሬ ኧኸሬ ቲያቭ ኢረእ ኧቫሁን ሁዳን ።31 ኢያቭ ገግመኛ አሃርሁን ባነደ ብእሃ ትናጠምቅ ኧቫአሁ ሁዳ ብእስራኤል ሰቭ ኢትሄርነኸ 32 33 34 32 ተኽም ቀጥወ ዮሐንስ ዋኸ ቲቭር አሸን ሁዳ ሄቶ ኤኤደ “መንፈስ ኧውናረኸ ወንደታ ቦፎርኃ ቲቸናወዳ አሸሁ። 33 ኢያቭ ገግኛ ባንሂርኩዳ ብእሃ አጠምቂ ኤኬሼ ሁዳ “መንፈስ በፎርኋ ቲቸናወዳ ታዥኩዳ ሁዳ በመንፈስ ያጠምቅካ ሁዳን ባረታ ኤኤደዪ። 34 ኢያቭ ዋዳ አሸሁ እእግዜር ትከ ኧኸረኸ ሄቶ ኢኢድ ባረ። 35 36 35 በቭረጋሞኋ ዮሐንስ ተዉርኤቸ ተማሪኋ ኧትራኛ ኤኤዲ ባነደ ። 36 ኢየሱስቭ ተሀመመያ ቲያርካ አሸንታ “እኩ እእግሪ ጣይ ዋዳን!። ባረ ። 37 38 39 37 ዉርኤቸ ተማሪኋ ዮሐንስ ሀኸ ቲይካ ሰምኦምታ ኢኢየሱስ ቴሄተሪ። 38 ኢየሱስቭ ተዥቫፐረ ቲትሄተሪዳ አሸታ “ምር ትሱኡዋ?” ባረኖም።ሁኖም “ረቢ አኸ ትረቭርወዳ ኤኤዲ ኧትኔን?” ቧሪ። ‘ረቢ’ ኧዋርት አስተማሪ ኧዋርትን።39 ሁድቭ “የሁም ኦዡዋ” ባረኖም ህመኸ ኧኸረሜ ዎርሙታ ኧቲ ይረቭረኸ አሸውም፤ ቴረኘ አስር ሳዓት ዳር እማትሜ ዋአርሙ። 40 41 42 40 ዮሀንስ ኧዝሬከን ቃር ሰምኦምታነዳ ኢኢየሱስ ተትሄተሪ ተዉርኤቸ ተማሪኋ አትሁዳ ኧስምዖን ጴጥሮሲ ኧሰም እንድሪያስ ባነደ።41 እንድርያስቭ ህመጋ ኧኧሰምኋይ ኧስምዖኒ ወረታ “ይቫአኴ ኦዋሪ ክርስቶስ ነከቭነዪ”ባረን (ክርስቶስ ኧዋርት ኧዋሸዊያአር) ኦዋርትን። 42 እንድርይስብቭ ኧስምዖን ኧኢየሱሲ በታ አቫአን።ኢየሱስቭ ኧስምዖን መኬኧ ባረ አሸንታ አኸ ኧዮና ትከ ስምዖንንኸ ተዋቴ ኬፋ ባይቶ ይሆረከዴ ባረን (ኬፋ ኧዋርት ጴጥሮስ ዌ እቭር) ኧዋርትን 43 44 45 43 በቭረጋሞኋ ኢየሱስ ገሊላ ገኘ ያሪ ሴኧ፥ ኧፍሊጶስ ነከቨንታ የኸ “ተኸተሬ” ባረን ።44 ፊሊጶስቭ እእንድርያስመኸዪ ኧጴጥሮስመኸ ኧቤተሳይዳ ከተማ ሰቭ ባነደ።45 ፊሊጶስ ኧናትናኤል ነከቨንታ “ሙሴ በቂጫ መጣፍ ኧጣፈነቪ ነቢያትቭ ኧጣፉነ ኧዮሴፊ ኧች ኧናዝሬት ምስ ኢየሱስ ነከቭነዪ”ባረን። 46 47 48 46 ናትናኤል ጭን “ተናዝሬት ከተማ ወሄ ዘንጋ ይረህውዪ?” ባረን። ፊሊጶስቭ “ማአታ ኧዥ” ባረን ።47 ኢየሱስቭ ናትናኤል ኧሁዳይ ኤፐ ቲቫአካ አሸንታ “እኩ አመር ኤነወ ኧውረምየ እእስራኤል ሰቭ” ባረታ ኧሁዳ አአር ዝሬከ።48 ናትናኤልቭ “አኸ ኧተኸ ሀርኸዪ” ባረ ተሳአረን።ኢየሱስቭ “ፊሊጶስ ታይኸራኸ ኢፍቲ በሸቭራ ምዬ ታነኸ በተርሁ አሸከ” ባረን። 49 50 51 49 ሀ ግዚየ ናትናኤል “አስተማሪዮ እእግዜር ትከንኸ እእስራኤል ንኩስንኸ” ባረን ።50 ኢየሱስቭ አአመርኸ ሁዳ በሸቭራ ምዬ አሸከ ኧቫከደዪ? ገና ትእም ይረእካአአር ታዥኬ” ባረን 51 ሀአቨ ኢየሱስ ኧቩረመኛ እቭሁዋ ሳቫይ ተከፈጅተታ መላአይካ በሰቭ ትከ ፎር ቲዎኦታዪ ቲወችታ ታዥቴ”ባረ።