¹ ብእም ግዚየ ኧክርስቶስ ተማሪ ሙዝር ቲደቭር ወረ ፤ ተግሪክ ገኘ ኧዎኦዋ አይሁድ በይሁዳ ገኘ በረፖሩዋ አይሁድ ቁጨጨኮሙ ፤እመኸቭ ኧኸረ ሁዳ እንእ ቀረ ቢዪዊ በረፐረ ሸረድ፤ኧሁኖዋይ ዶᎄ ኧኸራ ተግሪክ ኧቫአ ምስ ኧዎንደና እሽቻ ችላ ቧርሙ ኢቹኡያ ኧረፐረዴ። ² ህመኸ ኧኸረሜ አስረ ዉርኤቸ ኪሸረኘዪ ኤኛሞሁኖዋ «ኢና እእግዜር ቃር አአዉጅት ቴእተኔታ ሸረድ ኧሻጉጅት ኤነቨንረዳ ። ³ ህመኸ ኧኸረሜ ኧሰማቶ ባሁዋ ግት በመንፈስ ቅዱስ ደረግ ሆርሙ ዪንኧዋኸ ሰቭ ይኢድኖታ ሳቭአት ሰቭ ሹፑቹዋ እም ዳኝነድ ኧሁኖዋ ናቭኔዮሴ ፤ ⁴ ኢና ጭን በጠሎትቪ ቃርሞኋ ባአዉጅት ናትቫቅርነሴ» ቧሪዮም። ⁵ እመኸ ኧዋሪ ዘንጋ እንእ ሰቭ ባረን ፤በዉርኣ ሂንሁኖዋ አአሞርምዪ በመንፈስ ቅዱስቭ ደረግ ሆርሙ ዪንኣታ ሰቭ እስጢፋኖስቭ ፥ፊሊጶስቭ፥ጵሮኮሮስቭ፤ኒቃሮናቭ፥ጢምናቭ፥ጳርሜናዪቪ፥በይሁዳ ሃይማኖት ገፓ ኧረፐረ አአንፆኪያ ገኘ ኒቆላዎስቭ ሾፖቹም። ⁶ ሁኖም አዎኦም በኪሸረኘሁኖዋ ኢፍቲ አትሸኮዉዮምታ ጠሎት ኤፐዉኖምታ ኧጅሁኖዋ አተጉኮምታ ዳርዮም። ⁷ እእግዜርቭ ቃር ቲቬትድ ወረ ኧተማሪሞኋ ሙዝር ቢኢየሩሳሌም ኖኦራ አአር ቲደቭር ወረ ፤ተካህንንቭ ሁኖዋ ኖኦራሁኖዋ ቢኢየሱስ አሞርሙ ። ⁸ ብእም ግዚየ እስጢፋኖስ እእግዜር ጠጋቭቪ ደረግቭ ተቬንአታ በሰቭ እንእ ግት ወግቪ ሽግቭ ኧኸረ ዘንጋ ዪንአ ባንደ። ⁹ «ነጣ ኢዎኦታ ሰቪ ኧተሎት ቢድ» ዩሪዳ ኧአይሁድ ጠሎት ቢድ ኢጎኦታ፤ተቀሬና ገኘ ፥ትእስክንድሪያ ገኘ፥እመኸቭ ተኪልቂያዪ ትእስያ አዉራጃ ኧዎኦዋ ሰቭ ፤ብእስጢፋኖስ ተረሾኮታ ቡሼኧኸ ኢኩራኮሪ ባንደ ። ¹⁰ ቢኸርቭ እስጢፋኖስ ኢዝሬክወ ኧረፐረ ሃሪነድቪ መንፈስቭ ኤምተዉ ኢሬኲር አኸረኖታ። ¹¹ ህመቭቭ ኧኸሬ «እስጢፋኖስ ኧሙሴሚ እእግዜርቭ ቲቀርቭካ ሰንምአነ» ባይተዉዋ ዪኢጅታ ሰቭ ሴኧዉም በዱኡራቸ አቮኖም። ¹² ብእም አይነት ፤ኧሰቭ እንእ ኧገኘ ባሪቅቪ ኧቂጫቭ አስተማሪ ንሳሾሙታ እእስጢፋኖስ ኧትጤቦጩም ባአይሁድ ኦጎት ግት አትሸኮዊ ፥ ¹³ ሁኖም ዋኸ ባይተዉዋ በደባ ኢምሰኩርታ ሰቭ አትሸኮኰ «ዋ ምስ በዋ በትሸፐተ ኤኤድቪ በቂጫሞኋ ኧቂንቅቨ ቃር ኧዘጉትኋ ስርም አንቸኧንዳ ፤ ¹⁴ እመኸቭ ንቭርኘዳ ሁዳ ዋ ኧናዝሪት ኢየሱስ ዋ ኤኤዲ ያአፋኩመኸዪ ሙሴም አወናንረ ቂጫ ኢሸግርኮኸ ቲዝሮኩታ ሰምአነዮም።» ¹⁵ በኧጎትቭ ኧቸኖዋ ሰቭ እንእ እእስጢፋኖስ ቱኩ ኤፖሙ ቢያዢ ኢፍትዃ ኧመላአይካ ኢፍት ኸረ ተረኸቨኖም።