¹ 1. ኧህርታ በድረ ዘቨር በሰቨ ግት አሰተኝ ነቢ ኧረፖርዋመኸ፥እመኸ ባሁዋ ግት አሰተኝ አስተማሪ ይረውርዋቴ ፥ሁኖም ኢፋድ ያቫአካ አሰተኝ ትምርት ዲኢተዋ ያጎኦቴ፥ ሁኖም ተቫጢርሁኖዋ ኧቴተገኖዋ ጌታሁኖዋ ስን ይሆጀዋይ ይስዮታ ብደይተ ኢፋድ ይቫአዎቴ ። ² 2. በዋ አይነት ኖኦራ ሰቨ ያቅቨጭካ ሜናሁኖዋ ይትሆቶርቴ ፤በሁኖዋ ሜና ኧውረ ሜያ ይትቀነቭኬ ። ³ 3. በዋ አሰትኝ አስተማሪ ዋጋ ቲሲኢዋ ገግሁኖዋ ኤፌኖጊ ሟማካ ቲኢጅኩዋ ዋጋሁዋ ምጪተዋ ይዎሮኩዋቴ ። ተኖኦራ ግዚየ ኢፊቲ ቀነሰቭ ፍርድ አዎኖኮም ፤ ሙጥጥ ኢፋድ ቸና ይኢየኮዋ ። ⁴ 4. ባጢር ቤፐ ግዝየ ጎይታ ኧመላይካ ስን ኧቴቨንዋ ኧፍርድ ቀረይኢዮዋኸ በሰንሰለት አከደታ በደኣር ጠነቫ ከስ በሲኦል ቃሽኖም ፤ ⁵ 5. እመኸ ጽድቅ ያትመር ኧረፐረ ኖኽ ተኤኛ ሰቫአት ሰቨመጋ አተነፈ ባጢረተኝ ቢይረቭርኮዳ አለም ኢኢፋድ እሀ ቲይቫአካ አትቫጢተ ኧድረ አለም አንቼኤዳ ፤ ⁶ 6. ዋአካ ባጢር ዬውታሰቨ እንእ ኤሲፕተዋ ይትቆጮዋይ ኧሰዶምቭ ኧጎሞራ ከተማኸ አቭድ ቲኸር ስን ንደይተ የኧፋኸ ፈንደወ ። ⁷ 7. ምጥጥ ተሆርዋ ሰቨ ቲያቅቨጭካ ሜናሁኖዋ ተቨጠጠ ይረቭር ኧረፐረ ጻዲቅ ሎጥቭ አተነፈን ። ⁸ 8. ህም ጻዲቅ ሎጥ ዩሪዳ ምስ በግትሁኖዋ ቲረቭርካ እንእ ቀረቢያዥኩዳይ ቢሰቫኩዳ ሙጥጥ ዘንጋ ኧቫአ ጻዲቅ ነብስኋ ይጨነቅ ባንደ ። ⁹ 9. ባቴ ዋዳ እንእ ዋኸ በኸረጋ ጎይታ ጻዲቅ ሰቨ ተፈተናሁኖዋ ያተርፍኮመኸ ባጢረተኝ ኧተኸ ይቀጣኮኸ ኧፍርድ ቀረ ስን ኧተኸ ያቱኡኩስኮኸ ይሂር ኧዋርትን ። ¹⁰ 10. ኧሰነኸ ሙጥጥ ተመኛትሁኖዋ ይትሄተርዋታ ኧጎይታ ደረግ ይቆርጭዋታ ሁኖዋ ኧፍርድ ያቱኡኩስኮዋ ። እም አሰተኝ አስተማሪ ቲቢተኝ አይፎይዋ በሳቫይ ኑእ ክብር አነኖታ ሁኖዋ ስን ቲቆርውታ አይፎይታኖዋአር ። ¹¹ 11. መላአይካ ስን ተሁኖዋ ብንአር ቢሮኡዮዋ በጎይታ ኢፍቲ በሁኖዋ ፎር ቂናወ አኖድ ክስ አያቴኤኑውታ ። ¹² 12. ዋ አሰተኝ አስተማሪ ጭን ኧኋርት ቤኤመኖዋ ዘንጋ ይትቃነዋታ ፤ ሁኖዋ ይጠቦጩዋይ ይዎጅዋይ ኧቴኤኝዋ በፍጥረትሁኖዋ ቴሜኛት ኤነኖዋ አይቬስርዋ ዋጋምነኸ ዋጋም ሞጁም ዮኦይዋኸ ሁኖም ዮኦይቴ ። ¹³ 13. ሁኖም ቤፖዊ ሙጥጣአር እንእ አጅግሁኖዋ ይቴኤፖርቴ ፤ ኧሁኖይ መትራርእ በዋአና በዲየ ኧስኮርት ኧሳረኖኸ በሁርት ፤ ታሁዋ ሸረድ ይዎሮዋ ቢቾኖታ ግዚየ በቄቃ አመርሁኖዋ ቀቨጥ ቤኖ ኤነዎዋ ያቁዎጭታ ሰቭኖዋ ። ¹⁴ 14. ባጢር ተኖት አይችእ ኤር አነኖዋ ባጢር ዬቭካ ቴሜኛትሁኖዋ ገብ አይካ ፤ አትቁሟሞርዋ ሁኖዋ ይሞቱቹዋ ኧዋጋ ዘግዘግ ይቭርካ ሂን አነኖዋ ኧሰተዋ ሰቨኖዋ ። ¹⁵ 15. ሁኖም ኧቂጢየ ሜያ ጎፎርሙታ ሙጥጣአር ኤፖምታ ይረሁዊዳ ዋጋ ኧረመደ ኧባሶር ኧች ነቢ በላአም ኣወረዎ ሜያ ቴሄተርሙታ ዛፖቹም ። ¹⁶ 16. በላአም ጭን ቤፐን ባጢር ኧቫአ ኧዞጉት አይኸነ እቫር ኧሰቨኸ ዝሬከታ ማአቸዎ ፤እም እቫር ነቢ በለአም ጋዋ ሜና ባዬቪ ኸናን ። ¹⁷ 17. ዋ ሰቨ እሀ ኤኖዎዋ ቦቶምነኸ በኡቡርቢት ይትጎፎታ ኧዳቭራቭምኖዋኸ ኧሁኖዋቭ ኧደኧር ጠነቫ ይኢየኮዋ ። ¹⁸ 18. በስተት ሜና ቲረውርታ ሰቨ ግት ሴኮም ተዎኦከ ገኝ ኖኦራ ግዚየ አንኳስዋ ሰቭ ከቱ ኧኸረ ኧትንቢት ቃር በዞጉት በቴሜኛትሁኖዋ በዛዦት ሞቶቹምታ ይቆቁዮዋ ። ¹⁹ 19. ኧሁኖዋቭ « ነጥ ትዎኦዋቴ » ቧርሙ ተስፋ ይውዮዋ ፤ሰቨ ቲቴኤምካ ኤኤመን ሁዳ ባሬያ ኸረታ ይትገዛይ ኧኸሬ ሁኖም ገግመሁኖዋ ኧቫጢር ባሬያኖዋ ። ²⁰ 20. ተቫጢርንራ አተነፈንረ ጌታንራ ኢየሱስ ክርስቶስ በኋርት ተአለም ሙጥጥበተነፉዋ ቀጥወ ተዠፖርምታ በህም ሙጥጥ ሜና ተክታቴፍተዋ ቢቴኤመዋ ቲኢፊቲ ይረእ ኧቀጥወ ዘጋሁኖዋ ይቨኧስወ ። ²¹ 21. ኧጽድቅ ሜያ በኋርዋጋ ታውዮዋ ቅዱስ ትዛዝ ኢኒነ ቢዠፖርዋታ ሁዳ ኧጽድቅ ሜያ ታኋርዋ ይፍዘዝኮዋ ባንደ ። ²² 22. «ግየ ኤነኧን ይቨራይ ይዥፐርመኸ » እመኸቭ « አቬጌር ቢያኡዊም በጉተ ይክቨነርመኸ »ኧዋሪ ሟሟካ በሁኖዋ ኧውረ ኸረ ።