3

¹ እን ዕርዲራ ዓመጨንተዲ ረዀስረሪዲ ገፍዕረሪዲት መላላ! ² ንሪ፡ ወላ ላዅድ አደድሰላ፣ ላዅዱዅ ኰድጘስ ዋሰላ፣ ጃርሊ ኰዶ፡ ጨግዕስተላኽር ስኵረላኽር። ³ ንር ስልጠቱ ገመን ህድረውሰና ግን፣ እን ንርቲ ሓከመውኻ፡ አመሪሲ የገው፡ ትዅል ኵንⶖ ግን። ⁴ ንር ነበዋትኻ፡ ክቡራንዲ ምለንትዲ ግን፣ እን ከድ ንሩዅር፡ ልጝን ሻትክሲ ረዀስደነኵ፡ እን ፍቲሕ ዳግልኽር ዓመጨነኵ። ⁵ እን ንርትል ህምባዅ ጃር ጫድቕ ግን፣ ኒዀርስክ ከተላ፣ ቂልስጊ፡ ብሪ ክስጚ ሺባ ፍርድ እምንዅሲ እወኵ፣ እን ዓመጨውኻ ስማረኒ።

⁶ “እን ከውሲ ድሂስዅንሎም፣ እን ናመሐገስኽር ፋሕ ሲዅንሉ፣ ላዅ ድኳ ናድ ደኵጊና፡ ናደርፍፍሲ ጂብድዅንሎም፣ ናዕርዲራታትስኽር ላ ኣዳም እጝገው፡ ከው መንደርቱለን ሰጘገውሰና ኣኽኖ ድድንዅ። ⁷ ኣን ይኸ፡ እን ዕርዲረት፡ ‘እምንድክ ጒኢቶለ ግን፣ ኵከቲንልድር ወንተርቶ ግን’ ይዅንላ፣ ንድ ሰበት፡ ንር መስከብ ድድሮ ኣኽላ፣ እን ይጫዓትኽር ንርትል ገእየላ።

ናውኻ እን ምቝላ እስኒል ኰዶ እምንድክ ጂብኑዅ።

⁸ ጃር ንሰና የኵ እⶖኵዅ፡ “ብራ ንርኾርክ ለኻ ይቀንአትዅድ ወሓጥስታሲክ፡ ጨዓትዲ በሀር ይሓርቕርቖትዲት ናአወይሲ ብቝስያ፡ ቆምይትዲ ሲመር ብሪውዲት እክክብየሎም ግን እማ፡እን ኣን ፈረዳ ግራጋ ኣኽራሲ ጨበረለ።

⁹ “እን ወክት እንድድ፡ ከው ናውክ ስⶖ ጃሩዅሲ ሽጝድኖኽር ላት ኣኽኖ አገልገልድድኖሉኽር፡ ናአብሲ ነገይድያ ግን። ¹⁰ እን ወረፍ ኢትዮጵዪውድ ካርጝሊ ኣኽኖ አምለክደውለ፡ እን ፋሕ የው ይእክ፡ ሞባእ ነቕስድኖለ ግን። ¹¹ እንሲን ኣን እን ኵከበርስነድ ባህ ዩሎም እርገውሲ ኵነበክልድ ፍድየሎም ግን፡እንቲ ኰዶ ኒድ ደምቢ እን ሻትክ ጊራ ይዅሊ ከበርስቶ ኣኽላ፣ እን ግርጋ እንድሂሲ፡ እን እንቲ ይት ዓገብራዅ ኵግብር ስማርቶ ኣኽላ። ¹² ኵነበክል ሕጉድዲ ድቡርዲ ባርያ ግን፣ ናው ይኸ፡ስⶖ ጃርዅሊ እምንስድኖ ግን። ¹³ እን እስራኤልዱልድ ከብተው፡ ዓገበንኽር ብⶔተንኽር፣ ናአብልኽር ምለንታ ላንቂ ኣርስሮ ኣኽላ። ቍድኖኽር ገኝጅድኖኽር ግን፡ ጒኢሳዅሎም ኰዶ ላዅ ድኳ እላ።”

¹⁴ ዎ ጽዮንድቝራ፣ ዘመሪ፣ ዎ እስራኤል፣ እልል ዪ፣ ዎ ኢዮሩሳሌም፣ ኵለበከዲክ ፈርሒ፡ ረይሕስትኽር። ¹⁵ ጃር እን ኵል ገምርድ ሻዅ ቀጥብሲ ኵልድ ሺሽድዅ፣ ኵኣፋይትስኻ ዳገንዅሎም፣ ጃር እን ሲም እስራኤልዱዅ ኵዲ ግን፣ ናንዲ ደምቢ፡ ላዅ ጒኢሳዅ ሻኽላ። ¹⁶ እን ግርጋ እንድሂሲ ኢዮሩሳሌምቲ ንሰና ይድኖላ ግን፣ “ዎ ጽዮን፣ ጒኢትግ፣ ኵናንትትር ገረርጊ። ¹⁷ ኵአደራ ጃር ኵንበል ህምበኵ፣ ኒ ሒለቱዅ ደአንዱራ ግን፣ኵድ ገሪዅ ባህ የኵሉ፣ ኒእጝከሊስኽር ፊዅድሮኪ ግን፣ መዝሙርድር ኵል ኒከበርነድ ባህ ይሮሉ ግን።”

¹⁸ “እን በዓላታ ኣኽርድ ሸኸው ናኣክና ብነድ ጎሀይራዅስኽር እን ኵምዅር ጀኸንዅስኽር፡ ኵልድ ሺሽድያ ግን። ¹⁹ እን ወክት እንድድ፡ እን ሽብውደውሲኪ ቀጽዕየሎም ግን፣ እን ደልጓሳንስኻ ደአንድየሎም ግን፣ እን ፋሕየውስኻ እክብየሎም ግን፣ እን ናው ኒል ጀርበት ብትናዅ ብራ ኒልክ፡ ሓመድሰውዲ ከበረውዲ እስየሎም ግን። ²⁰ እን ወክት እንድድ፡ እክብየኩም ግን፣ እንታ ኮልኽር ወንስየኩም ግን፣ እንታ ዕልል ቋሉⶖጕሲ እን እንተልድ ወረርኖ አድኖ እርግነውሲ ውንተሶሰና፡ እን ከው ናድካ ነበክል ክብርዲ ሳቡርዲ እውየኩም ግን” የኵ ጃር።