ፊዃ 14

1 እን እምነትድ ቂልሳኹ ተጠራጠርናድ ተኸራኸርግድግኒ ከለብረሉ፡፡ 2 ኒትክ ቁና ፡ ፈቀድሰትሉ እምናኹ ህምባክ፡ እን ቂልሳኽ ላኪን፡ ኣምራ ግን ኒቃኽ፡፡ 3 ጃር ከለብራኹሉ ግን እማ፡ እን ቃኽ እንቃጋኽሲ ቃበብጊንሉ፡ እን ቃጋኹር እንቃኹሊ ፈረድጊኒ፡፡ 4 እንቲኻ ኣሪ ገንሺንሊ ፈረድራኽር ኣወይራኽር ግን፡ ኒ ኒኣደረድ ግን ኒዳውያኽ፡ ወሪ ለባኽ፡ ላኪን ጃር ዳውሲሮሉ ገረሳክ እማ ደው ዪሮግን፡፡ 5 እን ላኽ ላካራት እን ኣሪሪትልድ ትክሰ ፈላየኩላ ፡ እን ላኽካ ናትክ ግርጋትሲ እርዋድ ግን ኒቃለኹለን፡ ላኹክ ኒፍክረትድ ኣርእስታኽ ኣክና፡ 6 እን ግርጋት ጠንቃቅሳኩላ ኒኣደረድ ዮ እሰኩሉ፡ እን ቃኹር ኒጃርሲ ሓመዳኽ እማ፡ ኒኣደረድ ዮ ግን ኒቋኽ ጃርስኻ ሓመዳኹሉ፡፡ 7 ይነልዳ ላኽ ድካ ኒሹቲ ዮ መንደርታኽ እላኒ እማ፡ ኒሹቲ ክራኽ ኮዶ ላኽ እላኒ፡፡ 8 ይናርሕድ መንደርትናን፡ ይናኣደረድ ግን መንደርትናኽ፡ ወሪ ክርናን ይና ኣደራድ ግን ክርናኽ እማ፡ ይና ርድ መንደርትናን ወሪ ክርናን፡ ይና ኣደሪው ግን፡፡ 9 ንድ ሰበትድ ግን ኮዶ ክርስቶስ ኣደራ ክሪውዲ ህምበውዲር ኣኽሮ ዮ፡ ክራኽዲ ገኽዲ፡፡ 10 - 11 ኣን ዋነኽር ግን ያክ ጃር፡ ኒውክ ግርፍፍ እብርክ ይሮለ ፡ ኒውክ ላንቅኽር ጃርድ ሓመድሮ ግን፡ ያኽ ክቱብ ግን እማ፡ ናውክ ቂጦራ ፍርዱኽ ጃሩኹድ ጃብል ደው ይድኖግን፡፡ ውሪኹ ደኣም እንቲ ኩዳንሊ ፈረድራኹን፡ ወሪ ውሪኹ እንቲ ኩዳንሲ ቃበብራኹን፡፡ 12 እማ ገዲም ላኹክ ኒሹሩኹድ፡ ጃርሲ ጠብጣብ እውሮግን፡፡ 13 እማ ንሹር ይናሹትል፡ ፈረድግኒን፡ ላኽ ድካ ኒዳንድ ዓንቀፊሰና ወሪ ሓንኮሊሰና እሰጊንሉ፡ ደኣም ኒስ ፈረዳ፡፡ 14 እን ሙቅሊኹድሰና ሀበ ቃላኹሉ ደኣም፡ ንድ ግን ሙቅሊኹ ኣከኹሉ ግን ግራ፡ ኒኣኸርድታ ገለ ሙቅላ እካ ክም እንግጋትሉ ይና ኣደራ የሱስድ ኣርእኹክ ፈሃሞሉኹር ህንበኩን፡፡ 15 ኩዳን እን ኩቁናድ ጋሃያን፡ እማ እንከሊሲ ኣኽላኒ እንቲ ፈርዳኽ ህንብራኽ እማ፡ እን ክርስቶስ ክራኽሲሉ ኩቁናድ ድሂስግሉ፡፡ 16 - 17 ሕክም ጃሩኽታ መንፋስ ሻትክድ ጭድቅዲ ሰላዲ፡ ፈርሓዲ ግን ግራ፡ ቁናዲ ጅእናዲ ኣኽላኒ እማ፡ እን እንታ ትክያኹሲ ጀኺስጋሉ፡፡ 18 እን እና ንሰናድ ክርስቶስቲ ፡ ኣገልጋልዳኹ ጃርሲ ባህሳኹሉ፡ ከውድኽር ፈተንሳኽ ግን፡፡ 19 እማ ገዲም ሰላምር ፈለኺር ኽር ፡ ይናሹር ይናሹትል ኮዳኽዲት፡ ፈለኺር ተለላይንን፡፡ 20 እን ጃርድ ክድመትሲ፡ ቁኒኹድ ሰበብድ ፋሕሲጋሉ፡፡ ኒውክ ላጭሕ ግን፡ እን ነግ ፈረግ ዮ ቃኽ ኣዳምድኻ ሙቅላ ግን፡፡ 21 ኩዳን ዓንቀፍሰኹሉ ሓጀታ፡ እስቲጊኒ፡ ስኻ ቁና ብና ወሪ ወይኒ ጅእና ብና ትክያኽ ግን፡፡ 22 እንቲ እምነት ሸኽረኽርር ጃር ጃብል ክሹቲ እን ትክያኹድ ዮ ፈተናኹሉ ሓጀተስ፡ ኒኣኺርሊ ፈረዳኽ ከለብርሳኽ ግን፡፡ 23 ላኪን እምናትልድ ኣኽጋኹክ ኒውክ፡ ሓራም ግን እማ፡ እን ነግ ፈረግ ዮ ቃኹ፡ እምነትድ ቁጋኹ ኣኽነዲን ኮነንሳኽ፡፡