ፊኻ - 20

1 1.ባብ ቆሩኹ ላኽ በሄር ስልስላ ኒናንተል ሻኻኹ መልኣኽ ኻ ሰሚልድ ገሙእንጉሲ ቃልኹን ፡፡ 2 2. ኒኽር እን ሰብርሲ ፡ እን እማኒኹ ምራወስ ፡ ሻኹሉ ፡ ኒን እን ድያብሎስ እን ሰይጣን ግኒ ፡ ሰሕ ኣመራኽር እንሸውኹሉ ፡፡ 3 3. እን ስሕ ኣመራ ተመምራሲክኻ ፡ ቆርሊ ማልኹሉ ፡፡ ኒደምቢ ቆሚያትሲ ሰሓድጊንሎም ዮ ኽር ፡ ኣበዶ ኒዳግል ሓተምኹሉ ፡፡ ኒደንቢ ከለላ ወከት ደምቢ እንክስትሮ ኣስተሃላኹ፡፡ 4 4. ዛፋናትር ቃልኹን ፡ ናልኽር ኮፍ ይኑኹ ፡ ፍረድር እውስትኹሎም ፡፡ ርሕ እና ምስክር የሱስ መታንዲ ቆል ጃሩኹድ ማንኽር ሰየፍሰው ፡ እን ሰብርዲ ኒተካዲት ሰገድጋው ፡ መሕተምር ናብሶትል ዋሪ ናናትተል ከለብርገውኻ ቃልኹን፡፡ እነን ክረገው ኣኽኖ ክርስቶስዲ ስሕ ኣመራ ነገስኑኹ ፡፡ 5 5. እና እን ከብተው ክረው ላኪን እን ስሕ ኣመራ ተመምራሲክ ርሕ ኣርኒኒክ፡፡ እነኒን እን ጃበራ ጉና ክረዉኹ ግን ፡፡ 6 6. እን ጃበራ ጉኒል ዕድል ሻኹ ብጹእዲ ቅዱስዲ ግን ፡፡ ጃሩኹዲ ክርስቶስሩኹዲ ካህናት ኣኺድኖ ፡ ኒድኽር ስሕ ኣመራ ነገስድኖ ግራ ፡ እን ሊነር ክራ ነል ስልጣን ሻኽላ ፡፡ 7 7. እና ስሕ ኣመራ ተመመሴናኻ ፡ ሸጣን ንሽዊልድ እንክስትሮ ፡ 8 8. እማ እን ሰጃ መኣዝን ብሪውል መንደርተው ቆሚያትሲ ፡ ጎግዲ ማጎግዲት ሰሓድሮሎም ፡ ሓርብድር እክብሮሎም መታን ፡ ፊሮ ግን ፡ ናሺብር ብታ በሓሩርሰናክ ግን ፡፡ 9 9. እን እዳናኹ ብራ ኣወይሲኻ ፍኑኹ ፡ እን መስከብ እን ሻትካንዲ እንከልሱራ ዕርዲራዲት ከለውንኹላ ፡፡ ሰሚልዳ ላኻ ገሞ ቂኹሎም ፡፡ 10 10. እን ሰሓደኹሎም ድያብሎስ ኽር እን ኣራዊትዲ እን ነቢ ብኑኹዲ ማልስናኹሉ ዲጋ ላኺኹዲ ዲንዲትል ማልስቱኹ ፡፡ ዲማ ደይምድር ቂርዲ ገርክዲ ጀረብድኖ ግን ፡፡ 11 11. በሄር ጫዕዳኹ ዝፋንዲ ኮፍያኹሉዲ ቃልኹን ፡፡ ብረዲ ሰማዲ ኒገሽልድ እግርኑኹ ፡ ኣካንኽር እረርስለሎም ፡፡ 12 12. ክረው ኽር ፡ በህሊንዲ ግናቲትዲ ፡ እን ዝፋን ጃብል ደውይኖ ቃልኹን ፡ ኣክትበትር ቀልዕሱኹ ፡፡ ኣሪኹ ክታብር ቃልዕሱኹ ፡ ኒንኻ ክታብ ሂወት ግን ፡፡ እን ክረውር ፡ እን ኣክትበትል ድያሰና ፡ ናናግብርሰና ፈደይስኑኹ ፡፡ 13 13. ባሕርል እን ንርትል ህምበው ክረውሲ እውቲ ፡ ክራዲ ሲኦልዲኽር ናል ህምበው ክረውሲ እዉኑኹ ፡፡ ላኹክ ናናግብርሰና ፈረድስኑኹ ፡፡ 14 14. ክረዲ ሲኦልዲ እን ዲጋ ላኺኹሊ ማልስትኑኹ ፡፡ ኒን እን ሊነር ክራ ግኒ ፡ ማለት ዲጋ ለኺኹ ፡፡ 15 15. ኣኻኹ ኣኺን ክታብ ሂወትኹል ከተብሶ ኣረርስጋኹ ፡ እን ዲጋ ላኺኹል ማልስቱኹ ፡፡