ፊኻ - 18

1 1. ንደምቢ ኻ በሄር መእርግ ስልጠት ህንባኹሉ ሊነር መልኣኽ ሰሚልድ ገሙ ቃልኹን ፡፡ ኒክብርድር ብራ በርህቲ ፡፡ 2 3 2-3. ንኻ ፡ እን በሄሪ ባቢሎን ለብቲ ፡ ለብቲ ፡ መስከብ መጃኒናኹ መስከብ ናድካኹ ርኹሰናኹ መናፍቲዲ ፡ መስከብ ርኹሰ ፈንፈንዳኹ ይስታኹ ኒውክ ጀከልኽር ኣኺቲ ፡፡ ናውክ ቆሚያት እን ቀጥብ ወይኒ ንርቀሓበቱኸ ጅእኑኹ ፡ ነጋውስ ብሪው ንርዲ ቃሓብሉኹ እን ነጋዶው ብሪውር ሒል ብትና ንሩኹድ ተጀርኑኹ ፡ ዩንሲክ ሒለቱኹ ደሃይድ ዋዕ ዩኹ ፡፡ 4 5 4-5. ሰሚልድር ኮዶ ኣሪኹ ደሃይ ዋስኹን ፡ ንሰና ያኹ ፡ እንትን ይ እክ ፡ ሓራም ንሩኹ ሰሚል ኣኽራሲክ ኮሞርሱኹ ፡ ጃርኻ ኮዶ ንር ዓመጭነስ እልብዱኹ እማ ፡ እን ንር ሓራምሊ ሕበርስግድኒን ፡ እንር መዓትልድር በንስድኒን ማታን ፡ ንርትልድ ፋ ፡፡ 6 6. እን ንር ፈደይረሰናኩም ፈደያላ ፡ እንር ግብርሰና እሽባ እሽበላ ፡፡ እንር መከርዳኹሉ ጽዋእ ካዕበት(-) እስዲነ መከራላ ፡፡ 7 7. ንር ለበካድ ሲሚ ኣኾ መንደርትያ ፡ መፍልታና ኣከሊ ፡ ሓዘንኽር ቃለሊኒ ፡ ይሮ ህምበቲ እማ ፡ እንር ኣኮር ከበርደረትር ሓንቅደረትር ኒሰና እስዲነ ፡ ኒኣካንሊ ስቃይዲ ሓዘንዲ እወላ፡፡ 8 8. እማ እን ፈረዶላ ህንባኹ ጃር ሒለቱኹ ግን እማ ፡ እንር ማዓት ፡ ክራዲ ሓዘንዲ ከኣርዲ ፡ ላካረድ እንትሮላ ግን ፡ ላኻድር ሓው ይቶግን ፡፡ 9 9. እንርዲ ቀሓበውዲ ሓንቀቃውዲ ነጋውስ ብሪው ኻ ፡ ትዳ ንር ሓውይኒኹ ቃልኖ ፡ ስሪድኖላ ግን ፡፡ 10 10. ጉኢ ስቃዩኹ ሰበትድ ሺራኹል ደው ይኖ ፡ እንቲ በሄሪ ዕርዲራ ፡ እንቲ ሒለትሪ ዕርዲራ ባቢንትሪ ፡ መላልኪ ፡ መላልኪ፡ ፍርድ ላሰዓትድ እንቶኪ ህምባኹ፡ ይድኖ ግን ፡፡ 11 11. እን ናጋዶ ብሪው-ኻ ፡ ንደምቢ ናእራክሲ ጅባኹሎም እላ እማ ፡ ስርኒኹላ፡፡ 12 12. እራክ ደሃብዲ ወርከትዲ ክቡር ክርናዲ ሉልዲ ሻሽዲ ሰራኹ ፈኹ ሰረንዲ ሃርዲ ሰራኹ ጉምጃዲ ቅዱይ ናቂራ ህንበኹሉ ዋነኹ ከንዲ እራኩ እርኩክ ካንዚሩኽ ኣኻኩ እራክ ኣስራዲሪኹዲ ሻኺኹዲ ክርና በረዱኹዲ ፡ 13 13. ቃርፍዲ ቃረና አምሙንኽር ልባንኽር ቃዲ ቐረናኽር ከርበራዲ ወይኒዲ ዘድር እተው ላቅኽር ሰርናይር ወስዲ በግዲ ኣፍራዲ ከርሾታትዲ ገንሺንዲ ርሕ ኣደሙኽር ፡ 14 14. እን ኩፊኹት በሃግራኹሉ ፋደን ኩሉድ ደኮ ፡ ታሚታኹዲ ድሙቅዲ ክልድ ድዶ ፡ ንደምቢኻ ኒን ዋላ አርስሮ ኣኽላኒ ፡፡ 15 16 17 15-17. እና ንዲ እናንዲሲ ነገዱኑ ንርትል ተጀረው ነጋዶ ጉኢ ንርስቃይድ እንር ካርንሊ ደው ይኖ ፡ ነስኮት ኣከው ርዝቅ ላሰዓትሊ ድዱኹ እማ ፡ እና ሻሽዲ ሰራኹ ፈኹ ታውናዲ ሰራኹ ጉምጃዲ ሰርደሪ ፡ ደሃብዲ ወርከትዲ ክርና ቃልዲ ሉልዲ ቃርደሪ በህሪ ዕርዲራ መላላ ፡ መላላ ፡ ይኑ ስሪኒኹላ ፡፡ ናኹርክ እሕሉቅ መራክብዲ መራክብድ ናና ኣክንሊ ፈረውዲ ያው ባሕረናታትዲ ባሓርሊ ከደመውክ ኻ ሺራኹል ደው ይነኹ ፡፡ 18 18. እን ትዳ ንር ሓውይኒኹሲ ቃልነሰና ኻ ፡ እና በህሪ ዕርዲራ ንሂቲ ኣውኒ ተካኹንላ ፡ ይኑ ዋዕ ይኑኹ ፡፡ 19 19. ናኣኾርሊር ብታ ከፍከፍኑኹ ፡ ስሩኑኹር ሓዘኑኑኽር ኻ ፡ እን መራክብ ባሓርሊ ህንበውሎም ናውክ ቃሊ እራኩድ ተጀረው ፡ ላሰዓትድ ዓነውቲ እማ ፡ እና በሄሪ ዕርዲራ መላላ ፡ መላላ ፡ ዩኑ ጨርሕኑኹ ፡፡ 20 20. እንቲ ሰማ ፡ ንርድ ፈርሒ ፡፡ እንትን ሻትካን ሃዋርያዲ ነብያትዲ ፡ ጃር ንርትል እንታ ፍርድ ፈደይሱኹ እማ ፡ ንርድ ፈርሓ ፡፡ 21 21. ላኹ ሒለቱኹ መልኣኽ ኻ በሄር መጥሓን ኣካኹ ክርና ጉዶ በሓርሊ ማልኹሉ ፡ ንሰና ዩ ፡ ባቢሎን ፡ እን በሄሪ ዕርዲራ ፡ ንሰና ይሮ ነሃርነድ ማልስትቶ ፡ ንደምቢኻ ዋላ ኣረርሰላኒ፡፡ 22 22. ሰሃይ ቃነየው መሰንቆርውር እን ጎሊተያታትዲ እን እንብልውረረ እን ከው መለኸትር ገድም ኩል ዋላ ዋስስታላኒ ፡ ንደምቢታ ደሃይ መጥሓኑኹ ኩል ዋላ ዋስስተላኒ፡፡ 23 23. ናጋዶ ኩ ማልከን ብሪው እርግኑኹ ፡ ናውክ ቆሚያት ኩጥንቁልነድ ሰሓትኑኹ እማ ፡ ንደንቢ ኩል ብርሃን ቀንደል ዋላ በርሃላኒ ፡ ንደምቢ ኩል ደሃይ መርዓዊሪኹዲ ስርጊሩኹዲ ዋላ ዋስስተላኒክ ፡፡ 24 24. ብር ነብያት ሻትካንዲ እን እና ብሪል በረኽሰው ናውክዱ ንርትል ኤርሱኹ ፡ ዩኹ ፡፡