1 1. እናሓን ገድም ፡ እን ገንሻል እን ደብሪ ጽዮንሊ ደውዮ ፡ ኒሱንዲ ኒኽርድ ሱንዲ ናብሶትሊ ከተብሰውሎም ሊኽዲ ኣርቢያዲ ሰጃ ስሕ ኻ ፡ ኒዲ ቃልኹን ፡፡ 2 2. እን ደህይ ገሪ ዓቅሰና ፡ ገሪኹ ደሃይ ህድድኒኹ ያኹ ሰሚልድ ዳሃይ ዋስኹን ፡፡ እን ዋሰኹሉ ደሃይኻ ዳሃይ እን ከው መሰንቆርው ሰና ፡ መሰንቆታት ደርደርኑ እንኩኑንሲክ ሰና ግን ፡፡ 3 3. እን ዝፋን ጃብዲ እን ሰጃ እንስሳ ጃብዲ እን ሽማግለታት ጃብዲትል ሓዲስ መዝሙር ዘመርኑኹ ፡፡ 4 4. ኒን እን ደናግል ግን እማ ፡ እኺንዲ ረኸስኒ ፡፡ ናው እን ገንሸል ፋራኽሊክ ተለየውሉ ግናው ፡፡ ናው ጃርዲ እን ገንሸልዲሲ ባቅልል ኣኽድኖ ፡ እን ኣዳምር ቁርልድ ጅብስተው ግናው ፡፡ 5 5. ናኣብሊ ብን ኣርስላኒ እማ ሕፍቲራ ሻኽገው ግናው ፡፡ 6 6. እና ብሪል መንደርተውዲ ናውክ ቆሚያዲ ዓለታትዲ ቃንቃታትዲ እክዲ ሰበክሮሎም ኻ ፡ ዲማ ዳይሙኹ ወንገል ህንባኹሉ ኣሪኹ መልኣኽ ሳማይ ነበክሊ ሰለል ዩንሰናክ ቃልኹን ፡፡ 7 7. ሒለቱኹ ደሃይ-ኻ ፡ እን ፈረዳኹላ ወክት ገይእቲ እማ ፡ ጃርሲ ጉኢተሉ ክብርኽር እወሉ ፡ እን ሰመዲ ብረዲ በሓርዲ ዕልል ዓቀዱሲ እሳኹሲ ፍግም የሉ ፡ ዩኹ ፡፡ 8 8. ኣሪኹ መልኣኽ-ኻ ፡ እን ወይኒ ንርሓርቆቱኹ ንርቃሓብና ናትክ ቆሚያትሲ ጅእስረሪሎም ፡ በሄሪ ባቢሎን ለብቲ ፡ ለብቲ ፡ ዩንሰናክ ተለይኹሉ ፡፡ 9 9. ኣሪኹ ሲኸር መልኣኽ ኻ ተለይኹሎም ፡ ሒለቱኹ ደሃይድ ንሰና ዩ ፡ ላኽ ድካ እና ኣራዊት ኒዲ ኒተካዲት ፍግም የን ፡ ኒብሶትሊ ወሪ ኒናንሊኽር ማሕተም ከለበን ፡ 10 10. ንኻ ኮዶ ጸዋእሊ ኒሓሩቀትሲ ሕበር እንገት ፡ ቀድሕስታኹ ወይኒ ማዓት ጃሩኹ ጅእሮግን ፡ እን ሻትካን መለእክቲ ጃብሊ እን ገንሸል ጃዲትል ላኻዲ ዲነዲ ሰቀይሮ ግን ፡፡ 11 11. ትዳ ስቃዩኹ ዲማ ዳይም፡ ፍከ እን ኣራዊትድ ፡ ኒተካዲ ፍግምያነው ፡ ላኽ ኻ ፡ ማሕተም ኒስኑኽ ከለበን ፡ ቂርዲ ገርክዲ ዕርፍቲ ሸኽኒ ፡፡ 12 12. እን ትእዛዛት ጃሩዲ እምነት የሱስ ተከወው ሻትካን-ኻ ፡ ናትዕግስቲ ናራ ግን ኒህንባኹ ፡ ዩኹ ፡፡ 13 13. ሰሚልዳ ፡ ከተቢ ፡ እን ንደንቢ ኣደራድ ክረው ክረው ሻትካን ግን ፡፡ የዋ ፡ ናግብር ተለይሮሎም ግን እማ ፡ ናጻዕሪትልድ ፊኹድኖግን ፡ ያኹ መንፈስ ፡ ያኹለ ዳሃይ ዋስኹን ፡፡ 14 14. ቃልኹ ኽር ፡ እናሓን ፡ ጫዕዳኹ ብካና ፡ ኒኣኾርሊ ኣኽሊል ደሃቡኹ ፡ ኒናንተልር ጣብጥ ማሽር ህንበኹሉ ኣዳሚንዱኹራ ተካኹ እን ቡካኒል ኮፍዮ ቃልኹን፡፡ 15 15. ኣሪ መልኣኽ-ኻ መቅደስልድ ፎ እና እን ቡካኒል ኮፍዮ ህንባኹሲ ፡ ወክት እሽርኒኹ ኣቅቱኹ ፡ ዮ ዋዕ ያኹ ደሃይድ ሽንኹ ፡፡ 16 16. እና እን ቡካኒል ኮፍዮ ህንባኹ-ኻ ፡ ኒ ማሽርሲ ብሪል ገምዱኹ ፡ ብራኽር እሽርሲቲ ፡፡ 17 17. ኣሪ መልኣኽር እና እን ሰሚል ህንብረሪ መቅደስልድ ፊኹ ፡ ኒኽር ጣብጥ ማሽር ሻኹኽ ፡፡ 18 18. እን መስዊኢልድ ኻ ለኻዳግን ምልክ ሻኹ ላኹ መላኢከት እንቱኹ ፡ እን ጣብጥ ማሽር ሻኻኹሲ-ኻ ዋዕያኹ ደሃይድ ሽኑሰናክሉ ፡ እና እስካል ወይኒ ጊኹ እማ ፡ እን ጣብጥ ማሽር ኩኹሲ ፈስርዶ ፡ እን ብሪው ኣስካል ወይኒ ኽተቲሉ ፡ ዩኽ ፡፡ 19 19. እን መላኢከታ ፡ ኒማሽርሲ ብሪል ገምዶ ፡ እን ብሪው ወይኒት ከተትኩሉ እማ ፡ እን በሄር ጸመቂሰኒል ጃሩኽ ቁጥዒል መልኹሉ ፡፡ 20 20. እን ጸመቂሰና ኻ ፡ እን ከደን ዕርዲሪኹሊ ጸማቅሱክ እማ ፡ እን ጸሞቂሰኒልድ ስሕዲ ወልታ ሊኽዲ እስታድዮስ ኣካኹ ፡ ልጋማት አፍራሱሊ ገይእራሲክ ብር ፊኹ ፡፡