1 1.ጳውሎስዲ ጢመትዎስትዲ ገንሺን የሱስ ኽርስቶስሩ እን ፍሊሊጲሩ የሱስ ክርስቶሲ ህምበው ናዉክ ሻትካን፡እን አጲስቆጶሳዲ ድያቆናትዲ፡ 2 2.ጃርልድር ይና ኣደራ የሱስ ክርስቶሲ ሰላምዲ ገዲ እንተዲ ኣኽኒ። 3 4 3-4.እልብደኩኩ ሺባ ወክትሊ ይጸሎትሊ ናድካ መታን ፈረሓትድ ዲማ ጃርሲ ሓመደኹን እንኩኹን ። 5 5.እን መቅሪሕ እንታኹ ውንጌልድ እዳንድና እን ጃበሪልድ ዮ ናን ኣኽታሲ፡ 6 6.እን እንተል ተርያኹ ኪዳ ግብርኻ፡እን ግርጋ የሱስ ክርስቶስር ከም ተመምደቱሉ፡ኒስ ኣርኦ ህምበኩን። 7 7.ይንሽወድ ኣኽን ወንጌል መታን ይኣመጫረይድነዲ ይተብነዲ ኒዀርክ ገድ ይዲ በንስድነኽር ኣኽድንነዲ፡ይለበኪል ሰበት ዋንትዲነት፡ናድካ መታን ነወያኹ ሓሰብያ ትክያኹ ግን። 8 8.ራሕመት እየሱስ ክርስቶስርኹድ ኣዋህቤ ሰፍለልተትኩም ጃር ይምስክር ግን። 9 10 11 9-11.ክብሪ ጃሩኹዲ ሓምደዲ የሱስ ክርስቶስድ ኣረርሳኹ ፈደና ጨደቕኒኹ እታኽትኖ፡እን ጊርጋ እየሱስ ክርስቶስ ዕንቅፋት እንግገው ጫርያን ኣኽትኖ መታ ፡እንኪዳኹሲ መርመርትኖ፡እንታ እንከልስጝና ኣምርድር ኣስተውዓልድናድር ገሪኹ በጀኹ ፈርዶ ሺወኩን እንኩኹን። 12 12.እማኻ ይሻን እን ጌያኹለ ተዓብ እዳና ወንገሉኹድ ገሪዅ ከም ነፍዓት፡አርእትኖ ጀረበኩን እንኩኹን። 13 13.እን ይንሽዋ ክርስቶስድ ኣከት እን ዋነውክ ተከውንቲ ኣከነንር ናውክ ኣከውሊ ገሀድሱኹ። 14 14.በጀኸው እንሻንልድኽር እን ይንሽወድ ይናደረድ ተብኖ፡ጒኢ እንገት ቆል ጃሩኽሲ ድውኒል ገሪኹ ሐጠርኑኹ። 15 15.ናበልጛ ቀንአትድ ዋኸዲ፡ናበልጛ ትክያኹ ምራድድ እያሱስቲ ሰበከናኹ እንኩኑኹ። 16 16.እንላገፍኻ ወንጌል ተብነድ ከም መደብስነስ ኣርእኖ እንከሊሲ ሰበከናኹ፡ 17 17.እን ላናገፍኻ ንሽዋ ይኹድ ዳግሊ ጅርበት ናቅስድኖለ ሓሰብኖ ቅኖነድ ኣኽጊ፡ደልበብነድ ክርስቶሲ ሰበከናኹ እንኩኑዅ። 18 18. ውረኒኻኒን ? ምስምሰድር እኽን እምንድር እምንድር እኽን ክርስቶስ ሰበክሳኹ ኣንኩኹ።እማ ንድ ፈርሓኹን እንኩኹን፡ፈርሒያኽር ግን። 19 19.ኒጛ እንታ ጠሎትዲ ካባና እየሱስ ክርስቶስዲሲ ይደኣነድ ኣከት፡ ኣርኦ ህምበኩን። 20 21 20-21.ይድ ይሪሕ ክርስቶስ ግን፡ኪራ ይኹር መኽሰብ ግን።እን ይሀረር ይነዲ ይሳደዲ ገለ ላኽድክ ስማርጊን፡ናጝር ዲማ ተብነድ ፡ርሕድ ኣከንር ወሪ ክረድ ክርስቶስ ይስኸድ ከበርዶግን። 22 22.እን ይስኸድ መንደርትና ፈድና ይክድመቱኹ ኣከን፡ኣዊስ ከም ፍሪረት ኣርእሊኒ። 23 23.እና ለጛ ነድ ጨነቕሰኩን እንኩኹን።ይድ ገሪኹ ኪዳኹ ግን እማ፡ስብድስትያ እማ ክርስቶስዲ መንደርትያ ሃረር የኩን። 24 24.እማኻ እን ስኸድ ጊጅና እንተድ ገሪኹ ጀረብዱራ ግን። 25 26 25-26.ሕዲስድ እንተል ይወንተርና እንታ ወርዲትና የሱስ ክርስቶስድ ይል በጀዀሮ መታን፡ኰዶ እን እምነት እታኹድ ኩጙና ፈርሓትዲ ድየት ተረድኦ፡ናድክድኻ መንደርተት ኣርኦ ህምበኩን። 27 27-28.እን ተጣረረውልድ ላጋርድ ድኳ በኻኽርግድኒ ኒን ናድ ድዳ እንተድኻ ደኤና እሻረት ግን።ኒንና ጃርልድ ግን፡እንቶ ቋሊየኩም ኣከን ወሪ ዋነጊ፡እምነት ወንጌሉኹሊ ልፊኹትድ ይዲ ተጋደልትኖ፡ላ መንፈስድ ቀጥ ይድኖ ደውይድኖ ዋስየር መታን ፡ላርታ ወንጌል ክርስቶሲ እንታ መናበረት ኒውክ ኒድ እውስታኹ ኣኽኒ። 28 29 30 29-30.እን ይል ቋልድናኹ ናጝር ናጝር ይል ዋስደኖ ህምብደናኹ፡ናጝር ኽዕድዕ ኒሰና ያኹ ጌዩኹም፡ዮሱስር መታን ተዓብ ብትኖግን ግራ ኒድ እምንትኖ ካያ ኣኽድኒኒ ገድ ንእውስቶኩም ህምባኹ።