1 ኢየሱስ፡ድግምድ ጋቢሮሎም ተርሲዅ፡ላግርዋ፡ጀቢባ ካና ተከሉዅ እማ ኬለብዅሉ፡ደቅዶቊሰ ናኽር ጎቕ ግኽዲዅ ልጝን ሺራዅ ገበሮኻ፡ተከወውድ ምዳሶሎም ሺሽዶ ፈሩዅ። 2 አኾ ሰነኻ እን፡ ኒ ምዳሰውድ፡ኒገፍሲ ናቅስሮሉ ኒ ገንሺነስ ፈስኹሎም፡ 3 ሻኽኖሉ ግምብድ ጠዓምብኖ ናን ካያ ወንተስንዅሉ። 4 ይኸ ሐዲስድ ገንሺና ኤሪዅ እንሻቕዅሎም።ናውኻ ኒስርስ ክርጝድ መድኖ ጀኺነ ዳገንኑዅሉ። 5 ኤሪዅ፡እንሻቕዅሎም ኒስር ሻኽኖ፡ኩኖ ባርንዅሉ።ኤሪው ገሪውር እንሻቅዅሎም፡ነስር ኤድኖ ላውስኻ፡ኩነዅ፡ላውስኻ ጠዓምብኑዅ። 6 ላዅ ኒዅራ ትክሰ እንከሉ ሰጛዅሲ ኒ ለበከድ “እንደ ይዅረሳ ስማርድነሉ” ዮኻ፡ደንቢረድ ኒት እንሻቕዅሎም። 7 እን ኤረስ “ኒን እንለዋዅ ግን፡ለዃና ብረስ ይነሹሺ ለውኖ ኩንንሉ” ይኖ ኰድጚኒዅ እማ አድኖ ኩኑዅሉ። 8 ጭንድቅልድ ፍድኖ ከደን ማልንዅሉ። 9 አደራ ናን ውራ እሲራ ተካኹንኩም?ኒላውድ ፈሮ እን ኒምዳሰውሲ ድሂስሮ ግን ጭንድቅ ስኻ ኤሪውድ ምዳስረሉ። 10 በነየንቲ ቃበብኖ ማልነሪ ክርጛ መሔገይድ ድኩር አኽቲ። 11 ጃርድ አኻዅ ግን ይና ገሸል ሽኻርቶ ቋልስቱዅ ያዅክቱብሲ አንበብድግድናኽርማ ይኹሎም። 12 እና ድግም ናድ አኸት አርእስትኹሎም ሻኽድኖሉኻ ጀረቢኒዅ ደአም ከወልድ ጓቊትንነዲን ባርኖሉ ፈርኑዅ። 13 ፈሪሳንልድር ሄሮድሳንልድር ኒጋብድ ከቲስድኖሉ ይኖ ኒል እንሻቅንኹሉ። 14 እንትኖኻ “መምህር እንቲ ነስር እንደስር ይኖ ጎለልግሪ ላዅሲ ስማርግሪ አምር ገሽ ማኻልትግሪ ጃር ጉግሲ መሄድረት አርእንኹንካ።ናን ኩድ ውራ ተካኹንካ ቄሳርሲ ወርኮራ ፍድና ዋጅብማኒ አኽላ ዩኑ ወንቃርንኹሉ። 15 ናኰድጛ ምቊልናሩዅሲ አስተብሀልድነዲን “ውሪዅ ኰለፍድደናኹንለ እንደ ላሰወልዲረስ ናቅሰለ ቋልድያ” ይኹሎም። 16 ናዋ ናቅስኑኹሉ ኒኻ “እና ክታብዲ ገሽዲ አውሩ ኹኒ?” ናዋ “ቄሳርዱኹ ዋ” ይንኹሉ። 17 “እማ ኒን አኾ፡ደምቢ ቄሳርድዅሲ ቄሳርሲ ጃሩዅሲኻ ጃርድ እዋ” ይኹሎም።ንድኻ አስደመምኖ አላ ጋዶ ግን-ኒና ይኑዅ። 18 ላው ክሪልድ ጉና እላ፡የው እንትኖሉኻ ነዋይኖ ወንቀርኑኹሉ፡ 19 ሙሴ ላዅ ዳን ሻዅ ክኻንተን እዃርጊ ክረን ኒዳን ኒዳንድ ፈደና ጉድሮ እን እዅነት ለውሮ ህምበኩሉ ዮ ከተቦ፡ባሩዅና። 20 ናን ለጘታ ሻን ሰጘነኲ እን ቅዳዅ ክኻንተኻ እዃርጊ ክሩዅ፡ 21 ሊጘራ፡እን ባይኦረት ለውዅላ ኒንኽር ባርጊ ክሩዅ። 22 ሲዅርር ዔስዅላ፡ና ሃቢነ ለጘተክ ትውኑዅላ፡ናውካ እዃርግኒ ክርኑኽ። 23 እን እዅናኽር ክርቲ ክሪልድ ጓናከክ ለጘተክ ክኻንቲነላ ሰጚኒነዲን ናልድ አውኒ ግን ንራጝ አኽሮ ህምባዅ ይንዅሉ። 24 ነውዮ ወንተስኹሎም ክቱብሲኽር ጃር ሒልሲኽር አርእምብነድ፡እንትን ከትደነኲ እንኩድኑዅ። 25 ክሪልድ ጓናከክ ዓስተርሲ መላእኽቲ ጃሩሰና አኽድኖ ግን ግራ ክኻንተውር እልኒ ክኻንሰውር 26 እንትን ክሪውድ ጉነድ ሙሴር ክቱብሊ እን ጃር ገርበትሊ አን ጃር ክሪውኽ አኽሊ ዮ ጋቤዅሲ አንበብድድኒማ? 27 እማ ኒ ጃር ህምበውዱኽ፡ግራ ክሪውዅ አኽላ፡ንድ ገሪዅ ከትደነኲ እንኩድኑዅ ይዅሎም። 28 ከታበንልድ ኒል፡ዲወዅ ኢየሱስዲ ጉድዕድዕ ዩኑ ዋስዅሎም ኒኻ ትክሰ ወንተሱሎም ዋስነዲን፡ነዋ ዮ ወንቀርዅሉ፡ “ናድከልድ ኩጛዅ ትእዳድ አዊንግን”፡ ይኹሉ። 29 ነዋ ዮ ወንተስዅሉ፡ናድከልድ ኩጛዅ ታእዳድ ጃበራ ኒን፡ግን ዎ እስራኤል ሸኑሪ ይነአደራ ጃር ላዅ ንካያ-ግን ኒንኻ አሪዅእላ። 30 ጃርሲ ኩለበከዲክ ኩፊዅዲክ ኩሒልዲክ እንከሊ ያዅ ግን፡ኒን ግን፡ጃበራ ትእዳድ። 31 ሊጘርር ኒተካዅ ግን ኩጨረስ ኩፊኹትሰና፡ሀብረ እንከሊ ያዅ ግን።ኒልድ ኩጛዅ አሪ ትእዳድ እላ ይዅሉ። 32 ከታባኻ ትክስረ ጋብሪዅ መምህር እምንድክ፡ጃር ላዅ ግን ኒንኻ አሪ ጃር እላ። 33 ኩለበከዲክ ኩፊዅትዲክ ኩሒለትዲክ እንከልና ኩጨረስኽር ኩፊዅትሰና ሀብረ እንከልና፡ኒን ናድከልድ ቊርባንልድር ሰደቐትልድር ፍረኢርሳኹ ግን፡ 34 ፈጠኖ ወንተርሰትሉ ቋልነዲን “እንቲ ሲመር፡ጃቱዅልድ ሺርዶ እልላ” ይኹሉ።ንድ ደምቢ ላዅ ደይዖ ወንቀርዶሉ ገረስላ። 35 ቤት መቅደስሊ ክንሱንሲክ “ከታበን፡አዋ ሃቢነ ግን፡ክርስቶስቲ ዳዊትዅራ፡የናኹንሉ’ ዮ ወንቀርዅሎም። 36 ኒ ላውድ መንፈስ ቅዱስድ ትንክብሶ፡ “አደራ ይአድረስ” ኲኣፋይትስ ኲልኩኳ ስቘይሲ እሲሪሲክሎም ዪላውል ጀጋሕ ዪ ይኹሉ፡የኲ። 37 ዳዊት ኒላውድ ያደራ ዮሉ ዋኑ አዋኸ ግን ኒ እዅራ አካዅን እን እክ ከላእ ኻ ፈርሕዶሎም ሸኑራኑሉ፡እርግኑዅ። 38 39 38-39.መሀርዱኹሎም ነዋ ይኹሎም እንጫ ቃማትሽ ሺረው ሰሪነርክ ደላህ መላህ የው ከታበንልድ ፈጠነና ዕርዲሪልር ደባንማ ይስትድኖ እንከለው ቤት ጸሎትሊ አከጝር ነብሪል ቂጦታተል በደራሪጝ የው 40 ነበንቲ ባይኦት ልጝንትትሲ ቋው፡ቋላዅክ ጀንጀንዶሎም ቃዕረታትሊ ጸሎታት ሺረው እሰው ነስ ፍርድ ሒለቱዅ ጨበረኩሎም። 41 እን ኒል ሞባእሲ ገምደናዅ እን ድቢዅል ጀጋሕዮ ከው ሞባእ እንድቢል ገምደውሲ መኸልቱ ግጁዅ፡ገሪው ገድ ሻዋ በጃኽዲነክ፡ሞባእ ገምደውሲ ቋሉዅ። 42 ባይኦራ ድቡሪ እንትሮ ለጛ ሰንትም አከው ገምድቲ። 43 እንሲን ኒታለይቶትሲ ኒል ሽጎ “እምንድክ ይየኩም እና ባይኦራ ናድከልድ በጃኽድሮ ገምድቲ የኩንኩም፡ 44 ናው ክሚነ አወይሲ ከብተውልድሎም ገምድኑዅ።ኒንኻ ንሪ ክምረውልድ ንር ሙነትሲ ኡቲ” ይኹሎም።