ሽከር ፊዃ (ፊዃ-10) ድቅሩር

1 ኒልድ ጐ ይሁድ ብሪል ኒራ ዮርዳኖስር ካርጝል እንቱዅ ኮዶኻ ከው ገሪው እንትኑኹሉ፡ኒኻ ኒ እማኒሰና ክንሲሮሎም ተርሲዅ። 2 ኒል እንትኖኻ ወጠንድኖሉ “ግርዋ ኒእዂነት ደቀርዶ ገረሳዅማ” ይኖ ወንቀርኑዅሉ 3 “ሙሴ ውራ መዀኾኩም ህምባዅን” ይኹሎም። 4 “ግርዋ ንርድቅሩርዅ ፍትሕ እዎ ደቀርዶላዋ” ይንኹሉ። 5 እንታለፈካ ምቊልናርድ ግን ኒስ ንከተባዅልኩም። 6 ሰልፍ መሀዱ ግርዋዲ እዂነዲ ሀበ ግን ኒመሀዳዅሎም። 7 መታን ግርዋ ኒኽርዲ ኒገነዲት ባሮ ኒ እዂነዲ ለጛ ስኻ ኣኩኑ ላስካ አከነኲ። 8 ደምቢኻ ላስኻ አከነኲ ግራ ለጛ አኽኒ፡ 9 ጃር እንሸዋዅሲ አዳም ሲደጊንሉ ይኹሎም። 10 ቱኖሰና ኰዶ ኒታለይቶት ወንቀርንኹሉ። 11 “ግርዋ ኒእዂነት ደቀሮ ኤሪሪ ክኻንተን ንርዲ ደነዩዅ። 12 ኒሰና እዂና ንራጝሲ ባርዶ አሪ ግርዋል ቱረን ደነየቲ” ይኹሎም። 13 ናንሲ ገምድሮሎም ኒል ናቅስንኹሎም፡እን ናቅሰውሲ ደአም ኒታለይቶት ዋኺትንኹሎም። 14 “ይገሎም ባራ ግናቲት ይል እንትድኖ፡ሲመር ጃሩዅ ናሰና የውዱዅ ግን” ዮ ዋኺትኹሎም። 15 “እምንድክ የኩም ሲመር ጃሩዅሲ ናሰና አኾ ከለብርጋኹክ ትወለሉ”። 16 ኒ ናሓርሊ አደክ ላዅ ላኹድ ኒ ናንሲ ገምዴክ ገውርኹሎም። 17 ጉግድ ደኩኻ ላ-መንደላይ እንቶ ኒጃብል ሐርበጡዅ እማ “ዎ መምህር ደባኑዅ ዲመር መናበርትሲ ለውያ ውራ አሰን ኪዳኹንለ” ዮ ወንቀሩኹሉ። 18 “ውሪዅ ደባኑዅ ይራኹንለ፡ላዅ ካያ ግን ደባኑዅ ንኻ ጃር ግን፡ 19 ትእዳድሲ አርእሩዅ ደነይግ፡ኩውግ፡ስወግ፡ብንድ ሸርግ፡ከየንግ፡ኩኽርዲ ኩገነዲት ሳቢ፡ሃሽከብግ” ይኹሉ። 20 ኒኻ ‘መምህር ነሳ እማና ይሽጉድ ተርሰ ተከውኹንሎም” ይኹሉ። 21 ትግሰ መኸልትኹሉ እማ እንከሉኹሉ “ ፈሪ ላሪ ከብትረካ ህምበቲ ክምረውሲክ ክድሮ ድቡራንድ በንደ ጒ ኩመስቀል ምኹርዶ ተለዪለ ዓስተርሊ ገድ ተበብቶ ግን” ይኹሉ። 22 22.ኒኻ ገዱዅ እርግነዲን ነስ ተካ ጋብሲ ዋሰሰና ገሪዅ ቊርቊርቶ ኒልድ ስርግዩዅ። 23 እን ኒል እርገውሲ መኸኸልቶ ኒታለይቶትሲ “ገድ ሻዅ ሲመር ጃርኹል ቱሮ ገሪዅ ተባዅ ግን” ይኹሎም። 24 ነስ ተካ ጋብሲ ዋስነሰና ፍክር አኾሎም ባኻኽርኑዅ ኢየሱስ ኰዶ ወንተሶ “እንትን ይቚር ተባብ ሻው ሲመር ጃርዅል ቱድኖ ገሪዅ ተባዅ ግን። 25 አደራ ሲመር ጃርዅል ትዋዅልድ ግሚላ ዕል መርቢዅድ ደኲሮ ስዳወኲ ይኹሎም። 26 ኮዶ ትክሲነ ባኻኽርኑዅ እማ እኺርኺርሲ “ንሰና አከን አውኒ ግን ደአንዶ ገረሳዅ” ይስትጝኒዅ። 27 ትክሰ መኻልትኹሎም “አዳምሲ ገረስተላ ግራ ጃርድ ኒውክ ገረስተኩሉ” ይኹሎም። 28 “እናሐን ይን ኒትክ ባርኖ ተለይንኹንካ” ይኹሉ። 29 29.ኢየሱስ እምንድክ ይየኩም ይመታንጝር ወንጌል መታጝር ልጝንዲ ሻንዲ እኽርዲ ገነዲ እቊርዲ ኪሽጝዲ ባራዅ፡ 30 30.እና ብራ ኒልድ ተርሰ ማሕገዲ ጅርበትዲ አከጝር ገነዲ እቊርዲ ኪሽጝዲ ሊኽ እሽባ ከለብርዶ ግን፡እን እንተራወክትልድኻ መንብሮ ዲመሩዅ እውስትሮ ግን። 31 31.ደአም ገሪው ጃበር ሰጘው ደንቢትድኖ ግን፡ገሪው ደምበር ሰጘዋ ጃበር አኽድኖ ግን የኩንኲም። 32 አኽታሲክ ተረገሱኑኻ ኢየሱስ ናጃብ ጃብል፡ገንደላዅሲ ቋልነሰና ፈከርስኑዅ እን-ኒ-ጉርበት ፈሩ እርገዋ ጓቊትኑዅ፡እን ሽካ ለጘት ናቱ ዕጭጭሰሎም ሐዲስድ፡እን ኒል እንትሮ ፈራ ጅርበትድ ጂጝስቲሮሎም ተርሲዅ። 33 “እናሐን ይን ናን ኦየሮሳሌምትል ተረገስነኩን እንኩንዅን።ኒል አዳሚንድዅራ አቅሸታ፡በሀሌንድኽር ከታበንድኽር ሻኽስትሮ ግን፡ናዋ ክራ ፈረድኖ፡አረመንድ ደኩስኖ ኡድኖሉ ግን። 34 ማዓቢድኖሉኽር ጣዓምብድኖሉኽር ኒዳግ ብርጪቕ ይድኖሉኽር ግን፡ኒደምቢኻ ኩድኖሉ ግን፡ደአም ኒሲኾር ግርግል ጉሮ ግን”። 35 ዮሐንስዲኻ ኒል ስኩር ይኖ “እና ሺውናዅሲካ፡ኡቶና ሸንህዲና” ይኑኹሉ። 36 “ውራ እስየልኩም ጀረብደናዅንለ” ይዅሎም። 37 “ኩሲመርሊ ይነት ይነላዅሲ ኩላውል ይነላዅሲኻ ኩሸንገብል አኽኖ ኩምራድ አኽኒ” ይንኹሉ። 38 “እንትን ሺውደናዅሲ ላሪ፡አርእዲኒ፡እን አን ጅኢያፈራ ዋንጨስ ጅእትነማ፡ወሪ ይኸ እን አን ኒድ ጠመቅስያ ፈራ ጥምቀትድር ጠመቅስትነማ”፡ይኹሎም። 39 “የዋ፡ገረስና” ይንዅሉ። 40 እና አን ጅኢያ፡ፈራ ዋንጨስር ጅእትና፡እን አን ጠመቅስያ ህምባ ጥምቀትሲኽር ጠመቅስትና ደአም ይላውዲ ይሸንገብዲትል አክና፡እን እማና ናድ ደለማ ህንበውድ ግን፡አን አኽሊ እዋኽር” ይኹሎም። 41 ሽካ ነስ ዋስኖሰና ያዕቆብዲ፡የሐንስዲር አኾርሊ ሐረቅርኑኹ። 42 ኒገቢል ሽጞሎም “እን ከወል ሰየምሰው ሒልድ ሻከነትሎም፡ናአወይሲ፡አኽኖኽር፡ናምራድሰነክ ሀበነትሎም አርእድኑዅ። 43 ኒሰና አኽሮ አኽላ፡እን እንተልድ ቅድሮ ጀረባዅ እንተንሽቃ አኽኒ፡ 44 እንተልድ ሽጙሮ ሰውሀዅክ ናድክ ንሽቃ፡አኽኒ፡ 45 እንሻቅሮ አኽላ-ኒ እንቶ ህንባዅ እንሸቕስሮኽር ገሪውድ ፍዳ ኒ-ፊዅትሲ፡ደኩሶ እውሮኽርግን ኒ-እንቶ ህንባዅ የኩንኩም” ይኹሎም። 46 ኒታለይቶትዲ ከው ገሪውዲ ድገትል ፋኻ በርጢሜዎስ ጢሜዎስዅራ ይስታዅ ዓረብ ሺዊሮ ጉግ ሸሊ ከፍ ዮ እርጉዅ። 47 ኢየሱስ ናዝሬትሩዅ ንድ ደኮኲየው ዋሰሰና “ኦ ኢየሱስ ዳዊትዅራ ሳኻንቲለ” ዩንሲክ ዋዕ ዩዅ፡ 48 ሰቆቢ ዩኑ ገሪዅ ዋኺትንዅሉ።ኒኻ “ኦ ዳዊትዅራ ሳኻንቲለ ዮ ኮደክ ኮደክ መውዒታትሲ ትብሉዅ። .ኒኻ ኒታዊነስ ማሎ የሱስትል እንቱዅ። 49 ደው ዪዅ እማ “ነራ ሽጘሉ” ይዅ እንሲን ዓረብሲ ጒ ላዅ አረጊ ሽጘኩካ እንኩዅ ይንኹሉ። 50 ኒታዊነስ ማሎ የሱስትል እንቱዅ። 51 “ውራ እስየልካ ጀረብራዅን” ዮ ወንቀርዅሉ።ኒኻ “መምህር ቋልድያ ጀረበኩን” ይኹሉ። 52 “ፈሪ፡ኲ፡አማነት እቢስኹካ” ይኹሉ።ኒኻ ንርድ-ንርድ፡ኒዕልል፡ብስትዅሉ።ኢየሱስር ጉርበትኻ ተለይዅ።