¹ 1.ይሁዳ ገንጂና ይናደራ እየሱስ ክርስቶስሩኩ፡ያቆብር ዳን፡እን ይና እኽር ጃርድ እንከልሰው ፡ይና-ኣደራ እየሱስ ክርስቶስድ ተከውሰው፡ ² መሓርስነዲ ሰላምዲ እንከሊዲ በጀኽንተት። ³ እንትን ኣን እንከለውኩም፡እን ደአና በንስነኹ ሰበትድ ቀንአትድ ጸሓፍየልኩም ጀሬበሰና፡እን ላሪ ቅዱሳንድ እውስትረሪ እምና ለመለም ይትኖ ከተቦ ኮድጝዬኩም ላዝም ኣኹኹለ። ⁴ ናላው ከው ሰልፍልድ እና ፍርድ ንድ ጸሓፍሰው፡ጒኢ ጃሩኹ እንግገው እን ገድ ጃሩኹሲ እን ረኸሰትሊ በደለውሎም እን ለኹሲ ኒቱ መለከንተዲ ይናደረዲ እየሱስ ክርስቶሲ ከሓደውሉ ሽልቁ ይኖ ቱኖኩም ህንበናኹ። ⁵ ስሕ ወክት ድኳ አርእደነንሉ፡ይናደራ ኒቆምሲ ብራ ግብጺሩኹልድ ደአንዶ ደንብርጝ እን እምገውሲ ከም ድሂሰትሎም እልብዲሲየኩም ጀረበኩን እንኩኹን። ⁶ እን ናኣካንሲ ባረው ኮዶ ናክብረት ተከውገው መላእኽቲስ ድኳ ዲማ ዳይም ሎካብሊ ጭልም ዓንቀይሊ እን ዓርድሊ እን በህሪ ግርጋ እክቦሎም ህንባኩ። ⁷ ኒሰናኻ ሶዶምዲ ጎሞራዲ እን ናገቢል ሰጘው ዕርዲታት ናሰና ቀሐበው ስኻ ግብር ኣኽጋኹድ ሸመምስኖ እርግኑኹ፡እን ገማኹለን ጅርበት ዲመሩኹ ላኻ ሰክህዳኹ ኣኽኖ ህንበነኩ። ⁸ ኒሰና ኮዶ እና ነጝር ኒሰና እስነክ ናነበኺሲ ናስኸስ ረኸስደነኩሉ ፡ኤርደሲ ስዳውደነኩ፡እን መኣርግታትሲ ከብራንሲ ጀኸነክ እንኩኑኹ። ⁹ ሚካኤል እን ሊቅ ሻትካኑኹ ሙሴ ሰበትድ ድያብሎስዲ ተከራኸሩንሲክ ጃር ዋኺትንኩት ይኹሉ ግራ ፍርድ ጀከን ጋቢሮሉ ደፈርላ። ¹⁰ ነን እን አርእግናኹሲ ጀኸነኩሉ እን ናበህሪሲ እን ምኹ እንግገውሰና ሄዋንሰና እሱነ ኤርአው ኒሰነድ እና ፊኹትሲ ዲሂሰናኹ እንኩኑኹ። ¹¹ ደርብ ቃአልድኹድ ሰበት ፈርነውድ ፡ሰላዲ መታን ከቲና በልዓምርኹድ ጨደፍኑኹ፡አኮበርና ቆሬሩኩድ ኮዶ ድድኑኹ እማ ማላሎም። ¹² ነን እንታ መአዲራ እንከሊሩኹሉ ጂብደንቲ ግናው፡ጒኢ እንገት እንተዲ ቋነኩ፡ናሹቲ ምቃቅረው ፡ውልዋልድ ነራኽር እንደራኽር ደረክሰው ዓቅ እንግገው ብኳና ፍሪተገው ለጛ ወክት ክረው ናስርልድ ምኩረው ፍሪተገው ካን ሓጋዩ ግናው። ¹³ እን አከጃህ እና አኺርኺርሲ ዓፍዓፍሰው ሒለቱ መዓበል በሓሩኹ ብርግርግ የው ሽንግርው ግን፡ነስ ግብያኹ ጭልም ዲመሲ ጨበራኩሎም እንኩኹ። ¹⁴ - ¹⁵ ሄኖክ እን ለጘተር እን አዳም ትልድ እና ነስ ሰበትድ ጋቢኹ፡እናሓን ይናደራ ናትክ ፈደይሮሎም ዮ እን ኣእላፋት ቅዱሳንዲ እንቶ ህንበኩ እን ጃር ጊእንገው ናውክኽር፡እን ምቁላ ደርብድ እሲነኩሉ ኒውክ ምቁላ ግብር፡እን ምቁል ሓራም እሰው ኒሰበትድ ጋቢነው ምቁል ጋብ ሰበትድ ቀጽዕሮሎም ግን፡ዮ ተነበይኹ። ¹⁶ ነን ጉሩምርም የውዲ ፈርሓገውዲ፡ናምራድሰና ወንተተረውዲ ግን፡ቆል ከበርስኒኹ ጋበናኹ፡እናፊኹትሲ ጠቀመናኹድ ደርብድ ገሽ ኣዳማኹሲ ሳበናኹ። ¹⁷ - ¹⁸ እንትጝ እንከልሰው እን ሃዋርያት ይናደራ እየሱስ ክርስቶስሩ እንወክት ደምበሪል ምቁል፡እንከሊሲ ወንተተረው ቃየረው ጉድኖ ግን ዮ ድወውኩም ቆልሲ እልብዳሉ። ¹⁹ 19.ነን ስርርጝና ናቕሰው፡መንፈስ እንግገው፡ና ምራድ ስኺኹድ መርሕስተው ግን። ²⁰ እንትጝ እንከልስድናኽር፡እን ኒልድ ቀደስትረሪ እንታ እምነት እንታ ሹቲ ገበርዱኒንሲክ መንፈስ ቅዱስድ ጠለያ። ²¹ እን ሂወት ዲመሩኹል ገእሳኹ መሓርና እየሱስ ክርስቶስሩኹሲ ጨበርዱኑ እንተሹቲ እንከሊ ጃሩኹድ ተከወላ። ²² እን ናበልጝ ተሸከክሰውሲ ፈህምደሎም። ²³ ናበልጝሲ እን ላኺልድ መንጠልድኖ ኣናገፍደሎም፡ናበልጝሲኻ ኮዶ እን ስኸድ ረኸሳኹ ታኲንሲ ድኳ እንጠርዱኒንሲክ ጒኢሲ ረሓመሎም። ²⁴ እን ኒውክ ለብና ኣኻኹልድክ ተከዋኹኩም ፈርሓትድኽር ኤክጃህ እንገት እን ክብር ጃብሊ ደው ሲሮኩም ገረስታኹሉ፡ ²⁵ እን እየሱስ ክርስቶስ ይነደረዲ ኒቱ ይና ደአንዱራ አኻኹ ጃር ኒድክ ጃብ ወክት ናጝር ንውክ ዲማ ዳይም ክብር ግርመዲ ሒልዲ ምልክዲ አኽኒት፡ኣሜን።