¹ 1. ዮናስ ጐዱግ ዓሲዅል ኣኾ ፡ ኒ ጃርሊ ጠለዪዅ። ² 2. ይጅርበትሊት ጐዅ፡ ጃርሊ ዋዕዩዂን፡ ኒኻ ዋንስዅለ። ስኦል ጐድጐል ኣኾ ዋዕይዅን፡ ኣንትኻ ይደሃይሲ ዋስሪዅለ ዩዅ። ³ 3. እንቲ እን ቆርሊ፡ ለበካ በሓር ነበክል ማልድዅለ፡ ኩርር ክልውዅለ፡ ናውክ ኣፍሉት ይዳግድ ገምፈሎ ደኩዂ። ⁴ 4. ኣንኻ ነዋ ይዅን፡ ኩዕልል ጃብልድ ዳገንስዅን፡ ደኣም ድሞ ኩልጝን ሻትክሊ መኸልትያ ግን። ⁵ 5. ዓቚ ይፍዂተል ኣኽራሲክ ክልውርዅለ፡ ቆር ይገብሊ እርጉዅ፡ ሻጝኪ በሓሩ ይኣዅርሊ ለዋለይስዂለ። ⁶ 6. መሰረት ጊታዂሊ ገምዅን፡ ስሪር ብሪው ድመሲ ይዳግል ኣኹዅ። እንቲ ደኣም፡ ዎ ይኽር ጃር፡ ይርሕሲ ግብልድ ፍድሪዅላ። ⁷ 7. ይፊዅት ይጅዊል ቅልስሮሰና፡ ጃርሲ እልብድዅንሉ። ይጠሎት ኲሊጝን ሻትክሊ ትውዅ። ⁸ 8. እን ብጒትሊ ቀልብ ገምደው፡ ናገድ ኣስተኲ። ⁹ 9. ኣጛ ደሃይድ ሓምደ ስኲስየካ፡ እን ተመባጽዓዅሲኻ ሃብየሉ ግን፡ ደኣና ጃርልድ ግን። ¹⁰ 10. ጃር እን ዓሰስ ኣደድዅሉ፡ ንኻ ዮናስቲ ብራ ዳፍፍሊ ፍድዂሉ።