1 2 እማ ክርስቶስር ኒሰልፍ ጋርሲ በርኖ ፡ ክሪው ክድመትልድ ነስሕስነድ ጃርሲ እምነድ ምህሮ ጥምቀቱኹድ ፡ ናን ገምነድ ፡ ጉና ክሪኹድ ዲመር ፍርድልድኽር ሓዲስድ መሳረት ሰራትግኒን እማ ዳንጎቢል ዳኩንኒን፡፡ 3 ጃር ፍቃድ ኣከንታ ፡ ኒስኽር እሲኖሉ ግን ፡፡ 4 እን ላዶን ብርሃን በሃሰነሎም ፡ እን እንው ጃሩኹስኽር ታመው ፡ መንፈስ ሻትክልድኽር በንሰው፣ 5 እን ትክያኹ ቆል ጃሩኹዲ ፣ ሒል እን ናን እንተርደሪ እድንያትኽርካ ታመው ፡ 6 ለበናን ጃርኹረስ ሓዲስድ ናሺቲ ከርከርድኑኹሉ ፣ ዋድሕድ ኮዶ ቀየረናኹሉ ኣኸውድ ሓዲስድ ንሳሓድ ሓደስትድኖ ገረስተሎምኒ፡፡ 7 እን ገሪ ግርጋት ንርትል ገማኹ ዓቁሲ ጅእረሪ ብራ እን ናሺቲ ነፍዕቶሎም ፡ ጎደውድላ ፍራ ኡረንሎም ፡ ጃርልድ በረኻት ኣቶግን፡፡ 8 እክክምዲ ዳንደርዲ በኮልድረን ላኪን ፡ልኽስትረሪዲ እሸና ገባ ዲትል ግን፤ ንር ኣኺኻ ሓውዪኒል ግን፡፡ 9 - 10 እንጝ እን እንከላው ጃር እን ሻትካንሲ ኣገልጋልድናኹዲ ፡ ኣገልገልድዱኑ ህምብደናኹ እንታግብርዲ ኒሱጙድኽር ፡ እስዲነኹሉ እንታ እንከሊሲ ሙኹራኹ ገፍዓኹ ኣኽላኒ እማ እንተዳ ፣ ኒሰናኽር ጋብነን ኪዳኹዲ ደኣናድ ኣካኹዲሲ እምናኹ እንኩኑኹን፡፡ 11 - 12 እን እምነዲ ሰብርዲሲ ፣ እንሳደት አረረውላ ተኪትኖሎም መታን ግን ግራ ፡ ድንዱዳን ኣኽግኒን ላኽ ደንጎቢል ኣኽራሲክ ፡ ኒሳዳ እንታኽነዲ ተብድነዲሲ እና ተግሃት ኒስ ቃሊያ ጀረብናኩን እንኩኑኹን፡፡ 13 - 14 ጃር ኣብራሃምቲ ሳዳ እዉ እንጉሲኩሉ ፡ ንድ መሓልኹሉ ፡ ኒልድ ኩጛኹ ነኣርጋኹ ኣኽነዲን እምንዲክ ጎውሩ ገውሪየካ ፡ በጃኽዱኽር በጀኽድየካ ፡ ግን ዮ ፣ ኒኣኾርድ መሓልኹሉ፡፡ 15 ኒሰናኻ ሰብርድ ፡ ጨበሩ እንሳዳስ ኣሩኹሉ፡፡ 16 ከው እን ናልድ ኩጛኹድ ግን ናው መሓላናኹ ፡ እን መሓልሳኻ ተብዲስና ኣኽነዲን ፡ እና ሙጉትሲ ኒትክ ድጙኩሎም፡፡ 17 እማ -ኻ ጃር ፡ እን ኒያመማኹሲ ክም ቀየራጋት ፡ እንሳደትድ ወራሰውሲ ትክሰ ቃሊስሮሎም ጀረበሳና መሓልናድ ናበክል ትዉኹ፣ 18 እን ጃር ብጚትሮሎም ገረሳጋኹ ለጛ ቃየርሰጋው ጋር እስነ ይን እን ይናጃብል ህንብረሪ ሳዳት ሻኽኒል ፡ እግርኖ ፍናኽር ገሪኹ ጭንዓትድ ኣርኖግን፡፡ 19 - 20 ንርኻ ማልህቕ ፊኹቱኹሰና ፡ ትሩዲዲ ተብረሪዲ ግን እማ ፣ እን የሱስትል ማዓርግ መልክዕ ጸዲቅሰና ዲማ ደማይሲ ከዳ እዋኹ ኣኾ ፣ መርሓይሰና ይናማታን ትዋኹሉ ጅዋ እንክራሩኹ ቱስረሪና ሳዳ ህንበቲና፡፡