ፊዃ 4

1 እማ ገድም ኒፊኺል ቱኖ ሳዳ ዋነና ደንቢ ፡ ኣርእስተላ ላኹ እንተልድ ደንቢራ ከብተ ዋንተጊን ጉኢትንን፡፡ 2 ይነድኽር ናሰና ፡ ብሽራት ድውስተነ ህንባኹ እማ ፣ እን ዋስናኹሉ ቆል ፡ እንዋሰውዲ እምነትድ ሕበርሲጋኹ ኣኽነዲን ላኪን ፡ ነፍዕለሎም፡፡ 3 ኒግብር እዲና መሃድሱሩ እብጉሲ ዱጙሳኹ ኣኩ ፡ እን ይሓሩቀትድ ይፊኺል ትወኒ ዮ መሓለኹሉ ፡ ያኩ ሰና ይን እምናኽር ኒፊኺል ቱኖግን፡፡ 4 እን ለጞተሪ ግርጋ ሰባትድ ፡ ገለ ኣካንሊ ኒሰና ጃርኻ ኒድክ ኒክድመትልድ እን ለጞተሪ ካረትል ፊኹኽ ዮ ህምባኩ፡፡ 5 ኮዶኻ ኒል ይፊኺል ትወኒኒ ዩኹ ፡፡ 6 እማ ገድም ገለ ካው ፡ ትወውላ ከብትረ ወንትርነዲ እን ሰልፍ ብሽራት ድዉስተውሎምስኻ ናእማና ብንድ ፣ ቱድኖ ገረስኒ፡፡ 7 እማናኻ ንኪ ፡ ንኪ ዳሃይሲ ዋስደናን እንተላበካስ ተብድጋ ይስታኹሰና፡ ገሪ ወክት ደምቢ ዳዊትድ ንኪ ፡ ኒ ይነድ ሓዲስድ ላኳራ እሙሪ ኳራ ፡ መደባኩ እንኩኹ፡፡ 8 እያሱ ፊኽዳኹሎም ኣከንታ ፡ ኒደንቢ እሪ ግርጋ ሰባትድ ጋበጊድ ሻኹግን፡፡ 9 - 10 እማ ገድም እን ኒፊኺል ትዋኹታ እን ተጃር ኒኪድመትልድ ፈኹስተና ንኽር ኒክድመትልድ ፊኾ ህምባኩ እማ ፡ እክ ጃሩውድ ፊኻ ሰንበሩኹ ከብትረሎም ህንበቲ፡፡ 11 እማ ላኽ ድካ ፡ እን ኣዘስትና ብኒልድ መሰል ኣዶ ለብጊን፡ እን ፊኻ እንድሂትል ቱኖ ለመላም ይንን፡፡ 12 ቆል ጃሩኹ ወነኹዲ ሰለጥዳኹዲ ግን እማ ፡ ለጛ ኣብ ሻኹ ሰፍልድ ጠበጣኹ ግን ፤ ፊኹዲ መንፈስዲ ይና ኣካልሲ ፈለለያኹዲ ኣንጉዕዲት ፈለይራሲክ ተከናኹ ፡ ሕልነዲ ለበካ ሓሳብዲትልኻ ፈረዳኹ ግን፡፡ 13 እን ጠብጣብ ኡዉናኹላ ኒዕልላ ጃብል ፡ ኒውክ ብስታኹ ቃልዕዲ ግን ግራ ፡ ኒጃብልድ ትብታኹ ሙሁድ እላ፡፡ 14 - 15 ገድም ሓራምድ ኣኽገትክ ኒድክድ እና ፡ ይናሰና ፈተንሳኹ ግን ግራ ይና ቂልስጝ ረሓምሮልና ገረሳጋኹ ከዳ እወጋኹ ሻኽኒኒክ፡ እማ ሰመድ ደኳኹ በሄር ከዳ እዋኹ የሱስ ጃርኹራ ዋነና ደንቢ ይና እምነትሲ ትብድኒን፡፡ 16 እማ ምሕረት ኣርኖር መታን ፡ ይናሽግር መታንልኽር ይናረድኤት ኣካኹ ኣርኖ ፡ ሓጠርድ ዝፋን ገዱኹሊ ስኩርንን፡፡