1 ጃር ገሪ ወክትዲ ፡ ገሪ ደርብዲሲ እማና ይና ክልሲ ናብያትድ እሰ ጋበሰናሎም፡፡ 2 እና ደንጎቢው ግርጋትሊ ፡ ይነት እንኒትክሲ ወራሳኹ እሰኹሉ ኒድር ፡ እዲናት መሃዳኹ ፣ ኒኹረድ እሰ፡ ጋቢኹና፡ 3 ኒ ኒክብሩኹ፡ ነጸብራቅዲ ፣ ሽክል ኒኣደቡኹ ዋኑ ኒትክሲኽር ኒሒልቆልድ ምኹሮ ዋኑታ፣ ይና ሓራምሲ ለጭሕድና እሰሳና ፣ እወት ግርማ ላውል ኮፍዩኹ፡፡ 4 እን መልኣኽቲትልድ ገሪኹድ፡ ፍሪርሳኹ ስኝ ወራሳኹድ ፡ ንድ ሓድ ኣኽራሲክ ናልድ ክብዩኹ፡፡ 5 እስከ መላእክቲትልድኻ ፣ ኣውቲ እንቲ ይኹራጊን ፡ ኣን ንኪ ኣኻሩኹንካ ፡ ሓዲስድ ኮዶ ፡ ኣን እኽር ኣካኩንሉ ፣ ንኽር እኹራ ኣከኩለ ያኹሉ ፣ 6 ሓዲስድ ኮዶ፡ እን ባክርሲ እዲናትል ቱሱ እንጉሲኩሉ ፣ ናውክ መላእክቲ ጃሩ ፍግም ይኑኹሉ ያኹ፡ 7 መልኣኽቲ ሰባትድ ኻ፡ ኒመልኣኽቲት ውለውል ኒኣገልገልቲት ሃልሃልያኹ ለኻ ዩኹ፡፡ 8 ኒኹራ ሰባትድኻ፡ ዎይኽር ጃር ኩዙፋን ዲማ ደማይ ፡ መንደርታኩ ፡ ኩመሪር ግምብኻ እምንዲ ግምቢ ግን፣ 9 ጭድቅ እንካልዳኹ ፡ ዓመጭ -ኻ እንጠርዳኹ ፡ እማ ኩጃር ኩጨርልድ ክብሰ ዘድ ፈርሓቱኹድ ቃስሮካ ግን ያኩ፡፡ 10 እማ ይኣደራ እንቲ፡ እማናትልድ ብረት ሰረትሩኹላ ፡ ሰማኽር ኩናንትታ ክድመት ግን፡፡ 11 እነኔን ድድኖግን እንቲ ላኪን መንደርትቶ ግን ፡ ኒውክ ኽር ሰረናሰና በልዶግን፡፡ 12 ሽልቱት ሰናኽር ፡ ትብልቶሉ ግን ቀይርስሮኽር ግን ፡ እንቲ ላኪን ኩእማኒሰና ግን ፣ ኩኣመታትኽር ድጙስትድኖ ኣኽኒ ያኩ፡፡ 13 እስከ መልኣኽቲትልድኻ ፡ ኣውቲ ናልድ ግን ፡ ኩኣባይሲ ኩሉኩካ ዓንቀይል ፡ እሲሪሲኩሎም ፡ ይላውል ኮፍ ዪ ያኹሉ፡፡ 14 ናውክኻ እን ደአና ወረስድኖ ህምባኹሎምሊ ፡ እንሻቅሰው መናፍስቲ ኣገልግሎቱ ኣኽኒማ፡፡