1 1.እንትን ኣኻርስደናኽር ፡ ኒን ትክያኹ ግን እማ ፡ እንዋልደንሲ ኣደረድ ኣዘዝሰተሎም ፡፡ 2 2. ኩኹርዲ ኩገነዲት ከበርዲ፡፡፤ 3 3. ትክያኹ ኣኽሮልካ ፡ ብሪልኽር ኩዑምር ሺርዶርልካ ኒን ሳዳ ሻኽ ሰልፋ ትእዛዝ ግን፡፡ 4 4. እንኝ እክልኽር እንታቁርሲ ኣደሩኹ መኾኹድነድ ፡ ኮድኒስናዲሰሲ ደኣም ለገድደሎም ግን ግራ ፡ ሰቅደሚስጋሎም፡ 5 5. እንትኝ ሻቃሎ እን ስኻድ ከደሚሰውሲኩም ታ ፡ ጉኢዲ ፈጥፋጥነዲ እንታለበካ ገርህድ ፡ ክርስቶስር ሰና እስዲነ ፡ ኣዘስተሎም ፡፡ 6 6. ክርስቶስር ሻቃሎርሰና ኣኽድ እንፍቃድ ጃሩኹሲ ለቤኪልድ እሳ ግን ግራ ፡ 7 7. ከውሲ ኣኽጋኹ ኣደራድ እስደናኽርሰና ኣኽድኖ፡ እንከሊሲ ከደማ፡፡ 8 8. ገንሺን ኣኽን ሓዪስኣኽን ፡ ትክያኹ እሰኹ ላኹክ ጃርልድ ክም ከለብረት ኣርኣ፡፡ 9 9. እንትኝ ኣስያም ፡ ኒሰና እሰሎም ፡ እንናኣደራዲ እንታ ኣደራዲ ሰሚል ክም ዋነት እማ ኒል ገሺ ቃሎ ቃየርና ከም ዋኒገት ኣርእድኖ ፡ ጋቂስነስ ባራ፡፡ 10 10. እማ ገድም ይሻን ኣደራዲ ኒተቢ ሒልዲሲ ፡ ሒሊታ፡፡ 11 11-12. እን የና ለመላም ኣሕሉቅዲ ፡ ኣስያምዲ ጭልሙ ሓከመው እዲንዪውዲ ፡ ኣማራን እካዩዲ ሰሚል ግን ግራ ፡ ስኻዲ ብርዲዲ ኣኽላኒ እማ ፡ ምሕካ ሰይጣኑኹሲ ወንተስና ገርስኖር መታን ፡ ኒውክ ሙኹር ጃሩኹሲ ሙኽራ፡፡ 12 13 13. እማ ሙቁላ ግርጋድ ወንተሳና ገረስትኖር መታን ፡ ኒትክ እስዲነሰናኻ ደውይና ገርስትኖር መታን ህምበውክ ምኹር ጃሩኹሲ ሰራ፡፡ 14 14. ገድም እንታ የውሲ ፡ እምንድ ደበልትድኖ ድርዕ ጭድቁኹ ሰርድኖ ደውያ፡፡ 15 15. እን ወንገል ሰላሙኹሲ ፡ ደለምኒል እንታ ልኩክሊ ሻምፍፍሰና ቱስድኖ ደው ያ፡፡ 16 16. እና ንዲ ኒውክ ፡ እን በዳናኹ ረሰናኹ ሸኻስ ዲሂስትኖሉ ገረስደናኹ ዋልታ እምናቱኹ ፣ ጉዳ፡፡ 17 17. ደኣኒኹ መንቃ ኣኾሩኹ ቱሳ ፡ ሰፍ መንፋሱኹ ማለት ቆል ጃሩኹ ሻኻ ፡፡ 18 18. ኒድክ ጠሎዲ ፣ ሺዋንዲሲ ዲማ መንፋስድ ጠለይዱኑ እና ንድኽር፣ ዲማ ዓቅል እስዱኑ ናትክ ሻትካን ሰባትድ ፡ ጠሎትድ ተግሃ፡፡ 19 19. ይመታንኽር ፡ ይኣብሲ ብደሰና እን ምስጢር ወንገሉኹ ሓጠረድ ድውያ ፣ ቆል እዉስትሮለ ፣ 20 20. ኒሰባትድ ሻኸድ እንሻውሳኽር ፡ እንሻቅሳኽር ግን እማ፣ ይድ ወጃበኹድሰነለ ኣኾ ኒድ ጋብነስ ሓጠሪያ መታን ጠለያለ፡፡ 21 21. ላኪን እንትኝ ይኣዋዪን ኣውድሰና ክም ዋነት ኣርእትኖር መታን ፡ ትኪቆስ እን እንከልሳኹ ይዳን ፣ ኣደረድኽር እምንሳኹ ኣጋልጋሊራ ኒትክ ድዊሮኩም ግን፡፡ 22 22. ይና ከባር ኣርእትኖ ፣ እንታ ለበካ ኽር ደፍእሮ ግን እንተል ፈሳኹሉ፡፡ 23 23. ሳላምዲ እንከሊዲ እምንዲ ፡ ይናኽር ጃርሊድኽር ይና ኣደራ የሱስ ክርስቶትልድ ሻንሲ ኣኽኒ፡፡ 24 24. እን ይና ኣደራ የሱስ ክርስቶስቲ ፣ ደኮጋኹድ እንከላዉሉ ናውክዲ ገድ ኣኽኒ፡፡