ፊዃ 4

1 1.ገድም ኣን ኣደራድ፡ እንሸውሳኺር እን ሽጝስትናኹሉ ሽጛንሲ ወጀብደናኺር ኣኽድ፡ ወንተተርትኖ ወኾኾኩንኩም እንኩኹን፡፡ 2 2. ሃና ይናዲ ላውሃትዲ፡ ሰብርዲሲ እንተሸር እንተሹትል እንከሊሲ መኹርሱዱኑ፡ 3 3. እን ሕበርስና መንፋስድ፡ ንሽዋ ሰላምኹድ እስዲነ ተከውትኖሉ ለመለምያ፡፡ 4 4. እን ላሳዳ ሽጝነድ፡ ሽጝስትድናኽር-ኻ ፡ ላስኻዲ ላመንፋስዲ ግን፡ 5 5. ላኣደራ ላእምነት፡ ላጥምቃት፣ 6 6. እን ናድካ ኣወይስኽር ፡ ኒድክድ ኽር፡ ኒድክል ኽር ህምባኹ ላኹ ጃርኽር ናድካ እኽር ኽር ንግን፡፡ 7 7. እማኻ እውን ክርስቶስሩኹሲ መከሪሰናድ፡ ይና ላኹ ላኹድ ገድ እዊሳኹና ግን፡ 8 8. እማኻ ኣወት ዓረገሰና ኣስቶ እርጋኹሲ ፡ ማረኹኽ፡፡ኣዳሚንዱኹራስኽር እውን እዉኹ ያኽ፡፡ 9 9. እና ዓረጉኹ ያኻ፡ እን ቆር ኣካን ብሪኹል ክም ገመት ኣከጋንታ ውራኒ ማለት ግን፡፡ 10 10. እን ገማኹ ኒድትሲ ፡ እንታኽሮር መታን ናድካ ሰማ ኣወይሲ ዓረጋኹር ንግን፡፡ 11 12 13 11-13. ናውክ ማህበር እምናትኹሊ፡ ኣርእና ጃርኹሪኹዲ ታምም ግርዋዲ ኣቅታኹ በጥሕ ክርስቶስትል፡ ገይእናሲክ እን ሻትካን እን ግብር ኣገልግሎቱኹሲ፡ ስኻ ክርስቶስሩኹ ሃነጽኒል ታምማን ኣኽድኖር መታን ዮ፣ ኒ ናበልን ሃዋርያ ናበልን ናብያት፡ ናበልን ወንጌላውያን፣ ናበልንኻ ኣረስዲ ኩንሱዲ ኣኽድኖ እዉኹ፡፡ 14 14. ንደንቢ ይን እን ካውሲ ምልናዲ ከቲስናዲ እሳኹ ተንኮል፡ መሃድናድ እንተራኹ ምህሮ ኒውክ ውልዋል ናራ እንደራ ደረክስናኽር ኽር ደሃይስናኽርኽራ ጅርምቢ እኽግኒንታ፣ 15 15. ሻንድ እምንሲ ተላይኑ፡ እን ኣኾር ኣኻኹ ክርስቶስትል ለገድንን፡፡ 16 16. እን ህምባኩ ስኻክ፡ ካበና እን ኒተከኒሰናድ፡ ሻኻኽስቱኽር እንሻሻውሱኽር፡ እን ላኽሲክ እውስታኹሉ መከሪሰናድ እንከሊሲ ከዳምስሮል መታን፡ ክርስቶስትልድ ግን ልግድ ኣረርሳኹኹ፡፡ 17 17.እማ ገድም እን ቆምያት እን ብላሽ ናሙኹድ፡ ወንተተራናኹድሰና ወንተተርግድኒን፡ ኒስ ያኩን ፡ ኣደረድኽር መስከራኹን እንኩኹን፡፡ 18 18. ናው ተባ ለበኪኹ ሰባትዲ፡ እን ናል ህምባኹ ዓዋድናርዲ ናሙኹ ጨልመቱኹ፡፡ ርሕ ጃርኹልድ ሺርኑኹ፡፡ 19 19. ድንደዳን ኣኽኖኽር፡ ጌሃፍስናድ ሙቅላ እስናድ ፡ ፋይትኒል ፈርኑኹ፡፡ 20 20. እንጝ ላኪን ፡ ክርስቶስቲ ንሰና እስዲነ መሃርስድኒሉ፣ 21 21. እን እምን የሱስትል ክም ዋንትረት፡ ዋስድኖላኽር ኒልድ መሃርስደናኹላ ኣክደነንታ፣ 22 22. እን እማና ወንተተርድናኹሉ ፡ ምራድ ስሕተቱኹድ ድዳኹ ድኽና ኣዳምቲ፡ ህይድኖ፣ 23 23. እን እንታ ሙኹ መንፋስድ፡ ሓደስትድኖ እማ፣ 24 24. እን እምንዱኹ ጭድቅዲ ቅድስናዲ ፡ ዋጅህ ጃሩኹድ መሄድሳኹ፡ ሓዲስ ኣዳም ሰራ፡፡ 25 25. እማ ብጚትናስ እንደራ የሉ፡ ላኣካል ግን እማ ፡ ላኹክ ኒጨራ እምን ጋቢን፡፡ 26 26. ሰቅደምስጋ ሓራምኻ እሰጋ፡ እንተሰቅደምስጚል ካራ ለብጊንኩም፡፡ 27 27. ድያብሎስቲ ኣካን እገሉ፡፡ 28 28. እን ስወኹ፡ እን በኹሲ በነ እዋኹሉ ክሚሮታ ትክያኹ እሱ ደኣም ትክሰ ፡ ኒናንድ ከደምን ግን ግራ ወንተሮ ስወጊን፡፡ 29 29. እን ኒድ ዋሰውክ በረኸትድ ኣከው፡ ሃናጽናድኽር ጀረብዳኹ ትክታኹ ኣኻኽ ጋብ ደኣም ጋባ ግራ ፡ ናፍዓጋኹ ጋብታ እንተ ኣብሊድ ፍጊኒ፡፡ 30 30. እን እና ግርጊኹል ፡ ሓተምስድናኹሉ መንፈስ ሻትክ ጃሩኽሲ ጎሃይድጋሉ፡፡ 31 31. ህምባኩ ምረዲ ፡ ናደርናዲ ሰቅደምስነዲ ፡ ታዕታዕ ይነዲ ፡ ጀኻንዲ ኒውክ ጂበዲ ፣ ይስታኹክ እንተልድ ሺሪኒ ፡ 32 32.. እማ-ኻ እን ጃር ክርስቶስድ ፡ ብሕል ያኹድሰናኩም እንተሸር እንተሸትል ፣ ለወሃንዲ ሰኸንተውዲ ኣኽድኖ ብሕል ይስትጛ፡፡