1 1.እንትን አርደት እንትጝር ሰሚል አደራ ከም ዋንተትኩም አራድኖ፡እንታ ገንሺንሲ ትክያኹዲ አስተሃላኹዲ እሰሎም። 2 2.ዲማ ጠሎትሊ እሳ፡ኒድኽር ሓምደድ ተግሃ። 3 4 3-4.እን አንኒድ እንሸውሶ ህምባኹ ምስጢር ክርስቶስርኹሲ ድውዪ ፡ጋብያ ኣስተሃለትለ ገለጺያ፡ጃር እን ኒቆልድ መራ ብድሮልና ይና መታንር ጠለያ። 5 5.ወክት ጅብዲነ እን ከደን ህምበውዲ ጥበብድ ወንተተራ። 6 6.ላኹክ አስተሃለሰና ኣዋህብርዲነ ወንተተርትኖ ዋነትኩም አርእትኖ፡ጋብ እንተው ሽወድ ቀመምሰው ዲማ ገድድ ኣኽኒ። 7 7.ጥኪቆስ፡እን እንከልሳኹ ይና ዳንዲ እምንሳኹ አገልጋሊራዲ አደረድ ዪዲ ከደመንታ፡ኣዋኸ ከም ዋነት አራሲስሮኩም ግን። 8 8.ይና ዋንትና ሰበትድ አርእትኖ መታጝር እንታ ለበካኽር ሀዳሮ ግን ኒት እንተል ፈስኹንኩም። 9 9.ኒድኽር እንተልድ ኣኻኹ እምንሳኹዲ እንከልሳኹዲ ይናዳን ኦኔሲሞስቲ ፈሶሉ ህምባኹን።ናዋ እና ናራ ህምባኹሲ ኒትክ ድዊድኖኹም ግን። 10 10.እን ዪዲ ናን እዋኹ ኣርስጠርኮስ ሰላም የኩኩም እንኩኹ፡እን ኒሰበትድ ትእዛዝ እውስታኹኹም ማርቆስ፡ ባርናባሲ ኒኽርድ ኹራ፡እንተል እንተረን ከለብረሉ። 11 11.ዮስጦስ ይስታኹ የሱስኽር፡ሕክም ጃሩኹሊ ዪዲ አገልገደው ኮዶ ደብነኽር ኣኸውለ ከው ሰመተርሰውልድ፡ኒን ካያ ግን። 12 12.እን ላኹ እንተልድ ገጝጂና ክርስቶስ የሱስሩኹ፡ኒድክድ እንሳኽስድኖ ምራድ ጃሩኹ ተረደአው ኣኽድኖ ደው ይትኖ፡ዲማ ኒጠሎትድ ለመለም የኩኩም ኣጰፍራስ ሰላም ያኹኩም። 13 13.ኒ እንታ መታጝር እን ሎዲቅያዲ ሂራጵሊስዲ ህምበውዲሲ ገሪ ተዓብ ዋነቱሉ፡መስከረኩንሉ እንኩኹን። 14 14.ሉቃስ እን እንከልሳኹ ሓኪምዲ ደማስዲ ሰላም የነኩኩም እንኩኑኩ። 15 15.እን ሎዲቅያ ህምበው ሻንስዲ ኒምፋስዲ እን ኒልጝንሊ ህምብረሪ ማሕበርሲ ሰላም የሎም። 16 16.እና ጃውብ ኒኒ እንተል ነበብስረሰና፡እን ማሕበር ሎዲቅዪል ኮዶ ነበብስረት፡እን ሎዲቅያ ትልድ እንተርደሪት እትጝር ነበብድደነትላ እሳ። 17 17.ኣርኪጶስቲ ኮዶ፡እን ይናደሪልድ ከለብርዳኹ ኣገልግሎትሲ ተመምድቶ ጠንቀቅሲ የሉ። 18 18.እና ሰላምታ ኒን ይናንድ ፡ናን ጳውሎስርኹድ ግን።ይንሽወስ እልብዳ።ገድ እንተዲ ኣኽኒ።ኣሜን።