1 1.ኣኹኽኻ ናልድ ፈለይስኖ ዶናክድ ብርፍይነሰና፡ይና ደርብ ቀንዕድኖ ቆስትል እንትንኹን።ኒብርክስነድ ሮዳስ፡ኒሰናኽር ጳጥራስትል ጌይንኹኝ። 2 2.ፊንቄትል ፈርደሪ ዶናክ አርነሰናኻ ንርድ እስነ ብርፍ ይንኹን። 3 3.ቆጵሮሲ ቅብሊስኖ ቋልነሰነላ፡ይና ሸንገብድ ባርኖላ ሶርየትል ኣኽታሲ ይንኹን።ሙኹር እን ዶናክሮኹ ጢሮስትል ገማኹ እርጉኹ እማ ንርትል ቱኑኹ። 4 4.ታለይቱት አርንኹን እማ ንርትል ለጛታ ኻራ ሓቀፍንኹን።ናው መንፈስ ሻትክድ መርሕስትኖ ጳውሎስቲ ዮርሳሌምትል ፈርጊን ድዊኒኹሉ። 5 5.ኣኹኹኻ እን ግርጋስ እንደስ ደኩስነሰና፡ብርፍይኖ ፍንኹን።ንዉኩኻ ናእኲንዲ ናቊርዲ ኣኽኖ እን በራ ዕርዲሪኹሊ ኣኽራሲ ስብድንኹና።እን ሸልል በሐርሊ ኣኽኖክእ እብርክ ይኖ ጠለይንኹን። 6 6.ይነሹርሹ ኣጀርጋ ይንትጝነኻ እንዶናክሊ ዓረግንኹኑ፡ናውር ናልጝንሊ ወንተርኑኹ። 7 7.ይንኻ ዶናክድ ፈርነስ ድጝነሰና ጢሮስትልድ ጲተልመዮስትል ጌይንኹን።እን ሻንሲ ሰላም ይኖኻ ኣዲ ላግርጋ እርግንኹን። 8 8.ኒብርክስጛድ ንርትልድ ፍኖ ቂሳርያትል እንትንኹን።ፍሊጶስ ወንጌላዊረል ልኝሊ፡እን ለጛተትልድ ላኹ እርጋኹሊ ቱኖ ኒል ሓቀፍንኹን። 9 9.ኒ ትንቢት ጋበው ሰጃ ደናግል እንቃቕ እርግንኹሉ። 10 10.ገለ ግርጋት እስነሰና ጋይዮስ ይስታኹ ነቢ ይሁደትልድ ገሙኹ፡ 11 11.ይነል እንቶኻ ቅናት ጳውሎስሩኹሲ ኣዶ ኒናንትዲ ኒልክክዲት ኒድ እንሸዉኹ እማ እና ቅናት ንሂር ኣደረስ ኣይሁድ ዮርሳሌምትል ንህቢነ እንሸውኖ ቆምያት ናንሊ ድኩስኖ ኡድኖሉግን ያኹ መንፈስ ሻትክ ይኹሎም። 12 12.ኒስ ዋስነሰና ይነዲ እድገቁርዲ ዮርሳለምትል ፈርጊን ሲውኒኹንሉ። 13 13.እንሲን ጳውሎስ የሀው ስርደነኽርኽር ይለበከስ ከርደናኽርኽር ውራ እስደናኹን እንኩድንኹን፡ስጙ ይናደራ የሱስ ክርስቶስርኹ ሰበትድ ዮርሳሌምትል ክረድኽርግን ግራ ንሽወድ ካያ ኣኽሊኒ ደለሞ ህንባኹ ዮ ወንተስኹሎም። 14 14.ዋስና ጉሸሰነክናኻ ጃር ፍቓድ ኣኽኒ ይኖ ሃዳእ ይንኹን። 15 15.እና ግርጋ ንደንቢ ደለምኖ ዮርሳሌምትል ፍንኹን። 16 16.ገለ ብጅኽየው ታለይቱትኻ ቂሳርየትልድ ይነዲ እንትኑኹ፡ምናሶን ቆጵሮስዱኹ እማኒኹ ታለይቱረትል ቱኖኻ መርሕንኹና። 17 17.ዮርሳሌምትል እንትኖሰናኻ እን ሻን ፈርሐትድ ከለብርንኹና። 18 18.ኒብርክስነድ ጳውሎስ ይነዲ ያቆብትል ገይኡኽ።ናውክ እን ሽማገለታትኻ ኒል እክብስኑኹ። 19 19.ሰላም የሰነክሎምኻ ፡ጃር ኒኣገልግሎትድ ቆምያትሊ እሰኹሲ ላኹ ላኹድ ጠለለይድ ድዊኹሎም። 20 20.ኒስ ዋስነሰና ጃርሲ ሓመድኖ፡ይንኹሉ ዎ ይናዳን ኣይሁድትልድ ውሪከው ፍላሳ ከም ደኣነት ቋልዳኹ እንኩሩኹ ናውክኻ ፍትሕድ ቀንአት ሸኽኑኹ። 21 21.ቆምያት ነበክል ህምበው ናውክ ሙሴትልድ ሺርድኖ ናቁር ሰመተርስግኒ ናፍትሕድኽር መንደርትግኒን ከም መሀርድረት ዋስኖልካ ህንበነኩ። 22 22.ኩእንተርነስ ዋስኖ ናዉኩ እክክብስግኒ ከብቲድኖ ኣኽኒ እማ ውራ እስቲን። 23 23.እማ ናይን ይናኹሲካ እሲ፡መብጸዓ ሻው ሰጃ ግርዋ ህንበነኩ፡ 24 24.ኩዲ ኣዲሎም እማ ናዲ ነስሕስቲ። ናኣዀርሲ ሊሽትድኖ ናአብሊክ እንቲ ኣደኽዲሎም።እንሲን እንቲ ኩላውድ ድኳ ፍትሕሲ ከም ተከዉ ወንተተርደትኽር እን ኩሰበትድ ዋስናኹሲ ኒዉኹ ብላሽ ኣኸት ናዉክ ኣርእድኖግን። 25 25.እን እምነው ቆምያት ሰበትድኻ ኮድጙነ ጣዖትድ በረኽሳኩዲ ብርዲ ለለቕሰኹዲ ፋይትነዲትልድ ሓረምስድኖ ኣዘዝኖሎም ህምብናኹ። 26 26.እንሲን ጳውሎስ እን ከውሲ ሸዀ ኒብርክስጛድ ናዲ ነስሕስተሰና፡ላኹኩ ኒሰደቀት ስኩስሮ ናለጭሕና ግርጋ ከም ተመመት ድዊሮ ሻትክ ልጝንሊ ትዉኹ። 27 27.እን ለጛታ ኳራ ተመምሮ ስኩረሰናኻ ኤስየትልድ እንተው ኣይሁድ ሻትክ ልጝንሊ ቋልነሰነሉ፡ናዉክ እን እክሲ ዕግርግርሲነ ናናትትሲ ጠለቅኖ ሸኽንኹሉ እማ፡ 28 28.የው ኰው እስራኤልዱ፡ላኻ ካበና።እን ኣዪ ዱለትሊ እና ኣክንዲ እና ፍቲሕ ንዲ እና ኣካን ንሂዲ ተሰማማዓገኹ ናትክ እክሲ መሄርዳኹ ግርዋ ኒን ግን።ኒድ ኣወይሲኻ ጸርኣውያንዱስ እና ሻትክ ልጝንሊ ቱሶ እና ሻትክ ልጝንሲ ረኸስዳኹሉ ይኖ ጨርሕኑኹ። 29 29.ስልፍ ጥራፊሞስ ኤፌሶንዱኹ ናዲ ዕርዲረትል ቋልኖሉ እርግኑኹ እማ ጳውሎስ እን ሻትክ ሊጝንሊ ቱሳኹሉ ተከሎም እርጉኹ። 30 30.ንርዉክ እንዕርዲራ ዓገርገርኑኹ፡ኣኹኹኻ እክብስኖ ጳውሎስቲ ሻትክ ልጝንልድ ከደን ወተርንኹሉ።ኒድ ኒድኻ እን እድሲ ኣበድንኹሉ። 31 31.ኩድኖሉ ጀረቢነሰናኻ ንርውክ ዮርሳሌም ከም ረበሽትረት እን ሲም ስሑኹሊ ጋብ ጌይኹሉ። 32 32.እንሲን ጭፍራ ናሓላቁዲክ ሸኾ ናል ኣኽራሲ ጋጚኹ።እን ሲም ስሒኹዲ ኒጭፍረዲት ቋልነሰነኻ ጳውሎሲ ጣዓንብነስ ባርኑኹ። 33 33.ኒደንቢ እን ሲም ስሒኹ ስኩሮ ሸኺስኹሎም፡ለጛ ሙቁሕድ እንሽውድኖሉኻ ኣዘዙኹ፡ኣውኒ ኣከትኽር ውረኒ እሰትኸር ወንቀሩኹ። 34 34.እን እክ ናሶጥሲ ክብሲነ ናበልጝ ንሰና ናበልጝኽር ንሰና ዩኑ እግኑኹ።እን ጭራሕ ሰበተብ እን ኣኸውሲ ዋስና ብነሰናኻ እን ኣካንሊ ጌሲድኖሉ ኣዘዙኹ። 35 36 35-36.ገሪው እክኻ እንደረይሉ ይኖ ጨርሑኑ ተለዩኑሉ እርግኑኹ እማ እን ዓረጊሰኒል ጌዮሰና እን እክብሰው እክ ጐድግኒኒ መታን ይኖ እን ጭፍራ ምኹርንኹሉ። 37 37.እን ኣካን ሕክሙኹሊ ቱስድኖሉ ጀረቡነሰነካ ጳውሎስ እን ሲም ስሒኹሲ ጋብያካ ፍቓድ ኡተመለ ይኹሉ፡ንኻ ጸርኢ ጋብማ ኣርእሮ፡ 38 38.እና እርፍፍ ነድ ጃብ ደውሸት እስረ ሰጃ ሲሕ ኹወንቲ ሩሑ ከደንሊ ፍድራኽር ግብጺሩኹ ኣንቲ ኣኽለማ ይኹሉ። 39 39.ጳውሎስኻ ኣናዲ ኣይሁድሩኹ ግርዋ ጠርሰስ ቀርያሩኹ እን አርእስትረሪ ታንታርዋ ግን፡እና እክሲ ጋብያ ፍቓድ ኡቶለ ሺወኩንካ እንኩኹን። 40 40.እንሲን ጳውሎስ ፍቓድ እውስተሰና እን እክሲ ኒናንድ ሓብረ እዉኹ፡ትምይነሰናኻ እብርእይሽእጢር ጋብድ ጋቢኹሎም።ነወዮ፡