ፊዃ -19

1 1.ኣኽን ግራ ኣጵሎስ ቆሮንጦስትል ዋኑ፡ጳውሎስ እን ኣዋኹ ዱለትድ ዶኰ ኤፌሶንትል እንቱኹ፡ብጅኽየው ታለይቱት ኣሩኹ እማ። 2 2.እምንድነሰና መንፈስ ሻትክማ ከለብርድኑኹን ይኹሎም ? ናዋኻ ኢፋልና መንፈስ ሻትክ ዋነት ድዃ ዋሲኒ ይኖ ወንተስንኹሉ። 3 3.ንኻ ኣወያኹ ጥምቀትድ ደአም ጠመቅስድኑኹን ይኹሎም ? ናውኻ የውሃንስር ጥምቀትድ ይንኹሉ። 4 4.እንሲን ዮውሃንስ ታዲ እንኒደንቢ እንተራኹድ ማለት ዮሱስ ክርስቶስድ እምንድኖ እን እክሲ ድዉ ጥምቀት ንንሕስትኒኹ ድግን ንጠመቅዳኹሎም። 5 5.ኒስ ዋስነሰና ስጙ ይናደራ ኢየሱስ ክርስቶስርኹድ ጠመቅስኑኹ። 6 6.ጳውሎስ ኒናናሲ ገምደሰነክሎምኻ መንፈስ ሻትክ ናል ገሙኹ።እንሲን ኣሪ ጋብድ ጋቢኒኹር ተነበይኑኹኽር። 7 7.እን ከው ናውክኻ ሽከለጛ ኣከው ኣርግኑኹ። 8 8.ጾሎት ልጝንሊ ዔሶ ሜሪ ጃሩኹ ሰበትድ ድዊኹሎምኽር ፈሀምድኹሎምኽር፡ሰዃ እርበስ ሓጠርድ ጋቡሎም እርጉኹ። 9 9.ገለ ብጂኽየው እንደርብሲ እን እክ ጃብሊ ጂብዱኑኽር ተብኖ እምና ጉሽነሰናኽር ናልድ ሸሊቱኹ።እን ታለይቱትሲ ፈለዮ ክሰረድ ክሰራ ልጝን ሚህሮሩዅ ጢሮስትል አዀ ጋቡሎም እርጉኹ። 10 10.ኒን ኤስየትል እርገው ናውክ ኣይሁዲ ጸሪኣውያንዲ እን ቆል ጃሩኹሲ ዋስድናሲኩሉ ለጛ አመራ ካምል ተለለዩ ፈሩኹ። 11 11.ጃርኻ ጳውሎስር ናናድ ገሪው ናት ናቱ ተኣምር እሲኹ። 12 12.ኒዳግልድ ኒሰረነስ ኣድኖ እን ሽኹሽቶ ህምበውሊ ገምደናኲሎም እማ ናሹኹዳ ባረኩሎም፡ሙቁል መናፍስትኽር ናልድ ፉኑ እርግኑኹ። 13 13.እን ጥባስ እሱኑ ጅልወው ኣይሁድኻ ገሪው እን መንፈስ ምቁሊኹ ሃደረውልምሲ እን ጳውሎስ ሰበካኹሉ የሱስድ ሸሪስነኩንኩም እንኩንኹን ይኖ፡ሱጝ ይናደራ እየሱስ ክርስቶስሩኹሲ ሽጚስድኖሎም ፈተኑኹ። 14 14.እን ኒስ እሰውኻ፡ለጛታ ቁር ላኹ ኣስቄዋ ይስታኹ ኣይሁድሩኹ ከዳ አዋዅድ ቁር ግን። 15 15.እን መንፈስ ምቁሊኹኻ የሱስቲ ኣርእኹንሉ ጳውሎስትኻ ከተሊሉ፡እንቲንኻ ኣውረው ግን ዮ ወንተስኹሎም። 16 16.እን መንፈስ ሙቅሊኹ እርጋኹሉ ኣዳምኻ ኣዶ ጋጚኹሎም፡ካያ ኣኽኖ ለኸንትኖ እን ልጝልድ እግርድናሲ ለጛ ናልድ በደራሪን ዮ ቂልሲስኹሎም። 17 17.እና ጋር ኒን እን ኤፌሶንትል መንደርተው ኣይሁዲ ጸርኣውያንዲ ናትከል ኣርእስቱኹ፡ናትከልኽር ጒኢ ገምኹሎም፡ስጙ ይናደራ የሱስ ክርስቶስሩኹኻ ሐመድሱኹ። 18 18.እን እምነውልድኻ ገሪው እን እሲነውሲ እምኑኑኽር ድዉኑኽር እንትኑኹ። 19 19.ገሪው ጠንቋሎ ናክታባትሲ እክብኖ ናትካ ጃብል ሓውሲኑኹሉ።ናኣረኻ ሺብስተሰና፡ኣንኩረጝን ድሪም አኸ አርሱኹ። 20 20.ቆል ጃሩኹር ናኸ ሒልድ ኩጝኹር ተቡኹኽር። 21 21.እና ጋርኒን ድጙስተሰና ጳውሎስ መቆዶንየዲ ኣካየዲሲ ደኮ፡ዮርሳሌምትል ፈርዶ ኒ መንፈስድ ሓሰቡኹ እማ፡ኒል ጌየሰናኽር ሮሜትኽር ቋልየላ ሸኹን ዩኹ። 22 22.ለጝ ኒካበንቲልድ፡ጢሞቴዎስዲ ኤራስጦስንዲት መቆዶንያትል ፈስኹሎም።ንኻ ኤስየትል ገሪ ኣርፍፍ ድዩኹ። 23 23.እን ወክት እንዲል እና ጋር ንድ ገሪኹ ዕግርግር ኣኹኹ። 24 24.ዲሜጥሮስ ይስታኹ ላኹ አርጤመሲ ኣከኹ መቅደስ ወርኪኹ ከደማኹ እን ሸኻ ከደመውሲ ገሪው ከሰብዱሎም እርጉኹ። 25 25.ነዲ እን ናክድመትድ ሕበርሰውሎምኽር እክቦ ንሰና ይኹሎም፡ይሀው ይን ነፍዕስትናኹ ና ክድመት ኒልድ ኣከት አርእድኑኹ እንኩድኑኹ። 26 26.እና ጳውሎስ፡እና ናንድ መሀድሰውሲ ኣማልኽቲ ኣኽኒ ዮ ኤፌሶንትል ካያ ኣኽጊ ንርትክ ኤስየትል ገሪው ከውሲ ከም ሰሓደትኺር ከም ለብደትኽር ቋልደነኩር ዋስደነኩር እንኩድኑኹ። 27 27.እን ንርውክ ኤስያዲ ንርውክ እድንየዲ ኣምለኽደውላ በህሪ ኣርጤምስ መቅደስ ብላሽ ሺብስትጊን ንር ክብርኽር ለተቅ ይጊንኽር ጋራ፡ይነ ኪድመት ቀንጠብስጊን ካያ ኣኽላ ጒኢሶና ህምበዅ። 28 28.ኒስ ዋስነሰና ሰቑደምስነድ እንተኽትኑኹ እማ ናደሀይሲ ክብሲነ ኣርጤምስ ኤፌሶን ድኮውሲ በህሪ ግን፡ዩኑ ውጭጭኑኹ። 29 29.እን ዕርዲረትልኻ ዕግርግር ኣኹኹ።ጋይዮስዲ ኣርስጠርኮዲ መቆዶንየሩ ጳውሎስር ጨርሲ ጐሰሱኑ ላገሽ እን ጐልያ ኣካንሊ ጋጚኒኹ። 30 30.ጳውሎስ እን እክ ነበክል ቱሮ ጀረበሰና እን ኣለይቱት ገብንኹሉ። 31 31.እን ኒእንከለንቲ እርገውልድ በህሊን አስዪውልድ በልጝኻ እን ኣካን ጐልዪኹል እንትጊን እንሸቅኖ ሺዊኒኹሉ። 32 32.እን ዲባ ዕግርግር ዩኑ እርግኑኹ እማ እና ብጅኽር ውራ ሰበትድ እክብስኖ ዋኒነት ኣርኡኑ እርግኒ እማኻ ናበልጝ ንሰና ናበልኝ እንድሰና ዩኑ እርግኑኹ። 33 33. አይሁድ እስክንድርዮስቲ ጃብራ ኣኽራሲ ደረክነሰነሉኻ፡እንደን እንከው ነበክልድ ወተርንኹሉ።እስክንድርዮስኻ እን እክሲ መጐትሮሎም ጀረቤ ኒናንድ ሓበርኹሎም። 34 34.ኣይሁድሩኹ ኣኸት ኣርእነሰናኻ ኤፌሶንዱር ከው ኣርጤሞስ በህሪ ግብ ዩኑ ናውኩ ላቆሉድ ኣኽኖ ለጛ ሰዓት ኣከኹ ውጪጭኑኹ። 35 35.እን ዕርዲሪኹ ካትባይ እን ኣክሲ ሃዳእያ ይኹሎም፡የሀው ኮው ኤፌሶንሩዲ ዕርዲራ ኤፌሶንሩዲ እን መቅደስ በህሪ ኣርጤምስርኹ እን ሰሚልድ ገማኹ ንምስሊዲ ከም ተከውረት ኣርእጋኹ ኣዳም ኣወያኹ ግኒ። 36 36.እማ ገድም ኒን በረይሰጋኹ ጋር ኣዀ ደንቢ፡ሃዳእይትኖ ሃወክስድኖኽር ላጋር እሲትኖ ተገበኣኹኩም። 37 37.እና ከው ነን እንታ ሻትክ ልንሲ ስወግኒን እንታ ጃርሲኽር ጀኸግኒ ግን ናዕስድኖሎም ህምብደናኹ። 38 38.ዲመጥሮስዲ እን ኒዲ ከደመውዲ ጋር ክመነን ግርጋ ዲቢኹዲ ምስሌናታተኹዲ ህምበኩሎም ናሹናሹ ሸከዪኒን። 39 39.እና ጉድናኹሉ ጋብ ኣሪ ጋርድ ኣከንኻ እን ሰርዕስቶ ህምባኩ ዲቢል ቀረጭስኒ። 40 40.እና ዕግርግር ንድ ሰበብ ሻኽግናኽር እኽነውድ እና ንኪ እስነኹ ታዕታዕድኽር ሽከይስግኒን ጒኢትናኩን እንኩኹን። 41 41.ንሰና ዮ እንዲበስ ፋሕሲኹሉ።