1 1.እን ደንበር ግርጋትሊ በዳን ወክት ከም እንተረት ኒስ አርኢ። 2 2.እንሲን ከው ናሹቲ እንከለው ኣኽድኖ ግን፡ሰላዲ እንከለው፡ዋርዲተንቲ፡ክቡራን፡ተጣረርው፡ናዋልደንሲ ኣዘዝተገው፡ሓመደገው፡ረኸሰው፡ 3 3.እንከሊ ናዕያልድ እንግገው፡ተዳመለው፡ለኸንቲ፡ስዳወው፡ጨካናን፡ኪሰሪ እንከለገው፡ 4 4.ደኩሶ እወው፡ሀወክሰንቲ፡ዓከረርሰንቲ፡ጃርሲ እንከልኒልድ ትክሲነ ሳቡር እንከለው። 5 6 7 5-7.እንስፍሃት ጃሩዅ ሻው፡እን ኒሒልሲኻ ከሓደው፡ልጝንተል ደረክኖ ትወው፡ሓራም እንሰኽሰው እኲን ገሪ ናምራድድ ደረረክሰው፡ዲማ መሀርሰው እን አውእን እምነቱዅ ገይእድኖ መላኪን ገረስተጋዅለን እኲንሲ ምለው፡ኒንግን እማ ናልድ ሺራ። 8 8.እን እያኔስዲ ኣያምብሬስዲ ሙሴት ተቋወምነሰና፡እን ሙዅናዅ ድዳዅ እምነትድ ጀረብስገው ከውኻ ኒሰናኽር እን እምንሲ ተቛወመናዅ እንኩኑዅ። 9 9.እማኻ እንድድሰና ኣኾኻ እን ዓወድናር ኒድክድ ገሀድስሮ ግን፡ኒልድ ደኩኖ ሰለጥደኒኒ። 10 10.እንቲኻ ይንብረትዲ ምሀሮሲ፡ይምራዲ፡ይእምንዲ፡ይዓቅልዲ፡ይእንከልስጝና፡ይዓቅልዲት ትክስረ ተለይሩዅ። 11 11.እን ኣንጾክያዲ ኢቆንዩምዲ ልስጥራዲ ገእያዅለ ስደት፡ጅርበት፡ነወያዅ ጅርበት ምዅርኹን፡ያደራኻ ኒልድክ ደአንድኺለ። 12 12.እማኻ ክርስቶስ የሱስድ ጃር ጒኢትነድ መንደርትና ጀረበው ናውክ ዳገንስድኖ ግን። 13 13.እን እከዩ ከውዲ መለንትዲ ፡ምሉኑኽር ከቲሱኑኽር ጂባኹሊ ገምድኖ ግን። 14 15 14-15.እንቲኻ አውረውልድ ከም መሀርስረት አርእሩዅ፡እን ኩሹግልድ ተርስረ እምነት የሱስ ክርስቶስ ደአነድ ለበኪሳ ቅዱሳን ክቱባትሲ አርኢ፡እንመሄርስረውዲ ፈሀምስረውዲሲ ተቢ። 16 17 16-17.እንቲ ኣዳም ጃሩዅ፡ ኪዳ ግብር ኣኻዅሲ ካያ ደለሚኽር ታምም ኣኽሮ መታን መንፈስ ጃሩዅ ገእያዅሉ ክቱብ መሄርስነድ፡አደብነድ፡ቀንዕነዲ፡ጭድቅዲሲ ኣካዅ አደብነድ ነፍዓዅ።