1 11፡1. ገለ ዕቅቱ ዓወድናር ዓቅል እሲትኖለ ጃረቢሪድ፡ እስከ ዓቅል እሰለ፡፡ 2 11፡2. ቅንኣት ጃሩኹ ቀንኣኹንልኩም እማ፡ ላጭሒ ድንግሊሰና ክርስቶስል ስክስዬኩም ማታን፡ ላግርወድ ሓጨዪሶኩም ህንባኩን፡፡ 3 11፡3. እማ-ኻ እን ምራዋ ኒጎርሓትድ ሄዋንቲ ሳሓደሰና፡ ኒሰናኽር ሓሳብ እንታኽ እና ዬሱስትልድ ኣካኽ ገርህናዲ ለጭሕናዲ ኣዊ ኣርእኹን ድድጊን ጉኢታኹን እኩኹን፡፡ 4 11፡4. እማ ገዲም ላኽ ድካ፡ ይን ሰክግናኽ፡ኣሪኽ ክርስቶስ ሰበካን፡ ወሪ እንትን ካብርግደናኽ ኣሪኽ መንፋስ ካለብርደናን፡ ወሪ ኣርግድናኽ ኣሪ ወንገል እንተራንኩም፡ ትክድ ተዓገስዳናኹሉ እንኩዱኑኽ፡፡ 5 11፡5. ኣን እና ኪደው ሃዋርያትልድ ላኽድ እካ ሓዬማኽር ተከሌለ፡፡ 6 11፡6. ጋብድ ዋላ ዓዌድ ኣከን፡ ኣምርድ ኒሳና ኣኽሊኒ፡ ልሳዕ ኒትክድ ኒተክልኽር እንተል ኣርእስናው ጊን፡፡ 7 11፡7. ኣው እንትን ክብ ይትኖ ዮማ ይኣኻርሲ ሉምሰ ወንገል ጃሩኽ እንዳኸድ ሳባካልኩመወ ኣኸውድ ሓራማ እሰ፡፡ 8 11፡8. እንተት ኣገልጋልድያ ዮግን፡ ናልድ ርዝቅ ካለቡንሲክ፡ እን ኣሪው መሕበራትሲማ በትባትኩናን፡፡ 9 11፡9. እንታዲ ዋኑኻ ቤሪት፡ መቆዶንዪልድ እንተው ሻን መልእድኑኹለ እማ፡ ላኽሊ ተቅድሊ፡፡ ኒትክድ-ኻ ይኣኾርዲ ታቅድጊንልኩም ጣንቃቅሳኩን እንኩኹን ጣንቃቅሲያኽር ግነ፡፡ 10 11፡10. እና ክርስቶስር እምን ይል ህንበሳና፡ እና ዋርዲትና ኒን ድውላት ኣካየትል ባሪሳኹ ሻኽላኒ፡፡ 11 11፡11. ውራማታን፡ ኣን እንከላጋኹም ኣኸውድማኒ፡ ጃር ኣርእኽ፡፡ 12 11፡12. እማ-ኻ እና ዋርዲታኹሉ ይናሰና ኣኽኖ ኣርስድኖ ማታን፡ እን ምስምሳ ጃረበውድ ምስምሳ ገረስሮሎም ዮግን፡ እን እስያ ያኽሲ እስያ ጊን፡፡ 13 11፡13. እና ነሳና ያው ካው-ኻ ሃወርያት ቡኑት፡ ምላው ካደማው፡ ናኣኻርሲ ሃዋርያት ክርስቶስሩሲ ታከው ግናው፡፡ 14 11፡14. ሸጣን እካ ኒሹሺ ሻትክ ብርሃን ተከክ እማ፡ ኒን ገረማላኒ፡፡ 15 11፡15. እማ-ኻ እኒት ኣገልጋልደው ናሹሺ ኣገልጋልዳው ጫድቃንሲ ተክሳነን፡ በሀር ጋር ኣኽላኒ፡ ናደንበሪል-ኻ ናግብርሰናክ ኣኽሮግን፡፡ 16 11፡16. ሓዲስድ ኮዶ ያኹን እንኩኩን፡ ላኽ ድካ፡ ዓወድ ኣኸኽር ተከጊንሉ፡፡ ኣካገንር፡ ኣንር ገል ዕቅቱ ኣከው ዋርዲትያ ማታን፡ ዓወድሰና እስዲነ ከለብሬለ፡፡ 17 11፡17. እን እና እምንቶሲ ዋርዲትና ያኽሉ ህንባክ፡ ዓወድናርሰና ግራ፡ ጃርድ ኣኽሊኒ ኣን ያኹኩም፡፡ 18 11፡18. ገሪው ስኻድ ዋርዲተናውልድ፡ ኣንር ዋርዲትያ ግን፡፡ 19 11፡19. እንትን ለበኪው ኣኽድንናዲን፡ እና ዓወድሲ ፋርሓትድ ምኹርዳክሎም እንክድኑኽ፡፡ 20 11፡20. ላኽ ገንጂኒሰና እሰናኩም፡ ላኽ ዋሓጠንኩም፡ ላኻ ሻከንኩም፡ ላኽ ከባርሰንልኩም፡ ላኽ እንተ ጋሺ ጣዓምበንኩም፡ ምኹርደናኩሉ እክድኽ፡፡ 21 11፡21. ይን ሓያማን ኣኽኖ ክምእርግናት፡ ውርዳትኹ ያኩን እንኩኹን፡ ኮዶኻ እና ላኽድ ደፈራኽሉ፡ ዓወድናርድ ግን እን ኣን ያኽ፡ ኣንር ዳይዓኹን፡፡ 22 11፡22. እብራውያን መናው፡ ኣንኽር፡፡ እስራኤላውያን መናው፡ ኣንኽር፡፡ ፈደን ኣብራሃምዱማናው፡ ኣንኽር፡፡ 23 11፡23. ኣገልጋልቲ ክርስቶስሩማናው፡ ግንኹሳና ኣኾ ግን ኣን ጋባኽ፡ ኣን ኪዳክንሎም፡፡ ጸዓርናድ-ኻ ደካ ህንባኩለ፡ንሽዋድ ደካ ህኹለ፡ ጣዓምበድ ገሪውድ ጸብላል ያኽ፡ ገሪ ዋክት ክሪል ገይኣኽር ግን፡፡ 24 11፡24. ኣይሁድድ ኣንካ ወክት ኣርብያስ ላኽ ከብታኽ፡ ኮርበጅሽኹን፡፡ 25 11፡25. ሰኻ ወክት ስናፈድ ከትከትስኹን፡ ለወክት ክርንድ ከትከትንኹ፡ ሰኻ ወክት እን ኣን እርጋሪ ዶንክ ካርቲቲ፡ ቂርዲ ጋርክዲ እን ቆር በሓሩኽ እርጎ ኪኹ፡፡ 26 11፡26. ገሪ ወክት ጋሺትኒል እርግኹን፡ ወራፍሊ ጉኢትናድ፡ ኣጎበውልድ ጉኢትናድ፡ ይኮቅርልድ ጉኢትናድ፡ ቆሚያልድ ጉኢትናድ፡ ዕርዲሪል ጉኢትናድ፡ ከዳንሊ ጉኢትናድ፡ ባሓርሊ ጉኢትናድ፡ ሻን ብኑትል ናበክል ጉኢትናድ ግን እን እርጋኽ፡፡ 27 11፡27. ክድማዲ ጸዓርናዲ፡ ገሪ ዋክት ናቅሕናዲ፡ ከኣርዲ ስቃናዲ፡ ገሪ ወክት ሹምንድ፡ ብርድድር ብሻጽናድር እርጉኹን፡፡ 28 11፡28. ኒድ ኣወይሲ እን ካደንሊ ህምባኽ ጋር ኒውክ እና ክሰራድ ክሰራ ሽብዋኹለ፡ ኮዶ እን ናድክድ መሕበራትድ ጋንዓክ ህንባክ ጋንዕናግን፡፡ 29 11፡29. ኣውኒ ግን ቂልሳኽ፡ ኣንኻ ቂልስጋኹ፡ ኣውኒኻ ግኒ ዓንቃፍሳኽ፡ ኣውኒኻ ሓውዪጋኽ፡ 30 11፡30. ዋርዲትያ ጀራብዳኹለ ኣከን፡ ይቂልስናድ ዋርዲትያ ግን፡፡ 31 11፡31. እን ዲማ ዳይም በኪት ጃር፡ ይና ኣዴራ ዬሱስ ክርስቶስር እኽር፡ ኣን ብኒተገት፡ ኒኣርኡኽ፡፤ 32 11፡32. ደማስቆትል እን ሓክም ኣሬጦስ ምስለኒራ ሻኽሮለ ጀረቤ፡ እን ዕርዲራ ከው ደማስቆሪት ተከዊስኹ፡፡ 33 11፡33. እማ ካፈርድ እሲነ ሕጋ ማንደቁኽድ ገምድንኹለ፡ ኒናንልድኽር ሹልቅርኹን፡፡