1 1.እን ገኖ ህንባኹ ግርወስ እኽርሳና ሀብረ መኾኺሉ ግራ ሃደድግሉ።እን ግናቲትሲ ኩሻንሰና መኾኺሎም። 2 2.ገኖ ህንበው እኲንሲ ኩገንሰና፡እን ግናቲት እኲንሲ ኩሻንሰና እስረ ኒድክ ለጭሓትድ መኾኺለን። 3 3.እን መፍልታንሲ እምንድክ ኣኸውሲ ከበርዲለን። 4 4.ገለ መብልዳና ኻ ንርቁር ወሪ ንርቁራቁር ዋነንላ፡ኒን ጃር ጃብል ከለብርሳኹ ግን እማ ሰልፍ ናው ናዕያልድ ጃር ጓቂትና ቋልስድኖ ና ዋልደንድ ፈደይድኖ ሜሄርሲኒን። 5 5.እን ንርቱ መንደርትረሪ፡ንር ሳዳ ጃርሊ እስረሪ፡እምንድክ መብልዳና ኣኽረሪኻ፡ቂርዲ ገርክዲ ሺዋንዲ ጠሎዲሲ ግን ንር ተብራኹ። 6 6.እን ሕንቑቒኻ ርሕድ ዋንትሩ ክርደሪ ግን። 7 7.ገለ ጋርድ ሸኽስትግኒን፡ኒስ አዘዚ። 8 8.ላኹ ድኳ እን ኒውሲ፡ምናዳ ኒ ዕያልሲ ፡ሓሰበጋኹ ዋነን፡እምነትሲ ከሓዳኹ እን እምነገውልድ ትክሰ ጂባኹ ግን። 9 10 9-10.ኪዳ ግብርድ መስከርሳኹላ፡ውላድ ለገድረሪ፡ጋሻይ ከለብርደሪ፡ልኩኹ ሻትካኑ እንቃስረሪ፡ሽብዎሎም ህንበውሲ ረሀይድረሪ፡ኪዳ ግብር ኣኻኹሲ ተለይረሪ፡ወልትረጝን አመሪልድ ሹጐግረሪ፡ላግርዊቂ እርግረሪ መብልዳነሰና ሺብስትርን። 11 11.መፍልታን ጛ ክርስቶሲ ተጣረረናኩ እማ እንከሊ ስኺኹ ጐሰነክለን ፡ኪዃንሲድኖ ጀረበነኩ፡እና ነስ ሺሽደለን። 12 12.ናዋ፡እን ሰልፍሪ ና እምነትሲ ሰበት ጠለምነት ፍርድ ህንበኩለን። 13 13.እና ንዳግር ልጝንልድ ልጝን ጅልዊነክ ክድመት በኾርድና መሀርደነኩ፡ጀረብደገውሲ ጋቢነክር ጋብ ብጅኽድ ወልፋሳን ኣከናኹ፡ክድመት በኾርድና ካያ ኣኽኒኒ። 14 14.እማ እን መፍልታን ኪኻንሲድኖ፡ወለልድ እኻርድኖ፡ናልጝን ሻኽድኖ፡ኣባይ ጀኻኹሉ ምስምሳ ድኳ ኡግኒን ጀረበኩን እንኩኹን። 15 15.ናገለታዲ ናንትልድ ጀወልኖ፡ሸጣን ጉርጉርበት ተለየነኩ እንኩኑኹ። 16 16.ላኹ ኣማኒራ ወሪ ላሪ ኣማኒት መብልዳና ዋንትረንሉ፡ናላውድ ካቢኒንለን፡እን እምንዱ መፍልታን ኣኸው ካቢድኖ መታን እን ማሕበርሲ ታቅድግኒንላ። 17 18 17-18.እን ክቱብ፡እን ፈራኹድ ቢረስ አብሲ እንሸውግ፡ኮዶ እን ከደማኹሲ ኒታዓብሲ ኡቶሉ ኣስተሃላኹ፡የኩ እማ እን ትክሰ ከደመው ሽማገለታት፡ኒድክ አወይሲ ቆልዲ ምህሮዲ ተዓበውሲ፡እሽባ ክብር አስተሃለኩሎም። 19 19.ሽማገለ ሰበትድ፡ምስከርና ለጛ ወሪ ሰዃሲ ኣከገን፡ከሰስነስ ከለብርግ። 20 20.እን ሓራም እሰውሲኽር፡እን አሪው ጒኢትድኖር መታን ናድካ ጃብል ዋኺቲሎም። 21 21.በደራሪን ይሮ ፈረድግሪ ላሪ ድኳ ኣትሓወንድና እሰግሪ፡ኒስ ተከውቶ፡ጃር ጃብሊኽር እየሱስ ክርስቶስር ጃብልኽር እን ፍሪርሰው ሻትካን ጃብል ዓይብ የኩንካ እንኩኹን። 22 22.አሸሽነድ ላኹሊ ድኳ ኩናንሲ ገምድግ፡ሓራም አሪውድኹሊ ሕበርሰግ፡ኩፊኹትሲ ለጫሓትድ ተከዊ። 23 23.ገድም ኩጐድግ ሰበትድ እን ወንተተራኹካ ሽኹዳድር፡ከለላ ወይኒ ጅኢ ግራ ኣቁ ካያ ጅእግ። 24 24.ሓራም ገለ ከዋኹ ቋልስታኹ ግን፡ፍርዲት ኮዶ በደረኩሎም።ናበልጝስኻ ተለየኩሎም። 25 25.ኒሰናኻ እን ኪዳ ግብር ቋልስታኹ ግን፡እን ቋልስተጋኹር ሰወርስሮ ገረስተለሉ።