ፊዃ-1

1 1.ጳውሎስ ትእዳድ ጃሩኹድ ደአንዱራ የሱስ ክርስቶስ ይና ሳዳ፡የሱስ ክርስቶስሩኹ ሃዋርያ፡ 2 2.ጢሜትዎስትል፡እምነትድ እምንዱኹ ይኹራ።ይናኽር ጃርልድር እን ይናደራ የሱስ ክርስቶስትልድር ገዲ ብሕልይናዲ ሰላምዲ ኩዲ ኣኽኒ። 3 4 3-4.እን መቄዶንያትል ፈሩንሲኪ፡ናበልጝ አሪኹ ምህሮ መሄርድግኒን ወሪ እንቁርቁራታት ድጙስተጋኹ ሺብ ወለዶ አድሀብግኒን አዘዝቶ፡ኒን እንድድ ቂስና ጃሩኹ እምንሳኹ ኣክና ታዲ በጃኻኹ ከሓድስጝና ናቅሳኹ ዮ እን አፌሶንትል ከፍይቶ ኳድጛኩንካ፡ናጝር ኒሰና የኩንካ እንኩኹን። 5 5.ኒትካ ደንቢ ትእዛዝ እንከሊ ላጪሕ ለበኪልድ፡ትክያኹ ቀስልድ፡ ልጓም እንግግረሪ እምንትልድ ግን። 6 6.ናበልጛ ኒልድ ጅወልኖ እን ጋብ ሃተውተውል ወንተርንኹ። 7 7.እን የነውሲ ወሪ እን ፈሀምደነውሲ አስተብሀልደገው ኣኩኑሲክ፡መምሀራን ፍቲሕ መሀርደው ኣኽድኖ ግን ናው ጀረበናኹ። 8 8.እማ እን ፍቲሕሲ ደርብ ፍቲሕኹድ እስነንሉ ትክያኹ ኣከት ኣርእንኹን፡ 9 9.ፍትሕ ፋሕሰውድ ግራ፡ጫድቃንድ ሰርዕስትጋኹ ኣከት አርእኖ ደምቢ፡እን አዘዝተገው ጃርሲ ጓቂተገው፡ሓራሙኹር ርኹሳን፡ስዳወው፡ኩወንትድር እን ናኽርዲ ናገናዲት ኩወው፡ፊኹትሲ ኩወው፡ 10 10.እን ቃሕበንቲ፡ግብሪ ሰዶሙ እሰው፡ከው ክደው፡ቡጙትድ፡ብንድ ማሓለው፡ላኹ ኮዶኽር እን ምህሮ ሽርወዲ ተጣረራኹ ዋነን፡ናድ ግን። 11 11.ኒጝር እን ዓይብ ይድ እውስታኹሰና፡እን ወንጌል እን በኪድ ጃር ክቡሩኹ ግን። 12 12.ኣን ይድ ሒል እዋኹለ ክርስቶስ የሱስ ይናደራ ኒ አገልግሎትድ መደባኹለ፡እምንሳኹ ኣኽያ ሰበት በቅዕደትለ ሓመደኩንሉ እንኩኹን። 13 13.ኣን ሰልፍድ ጀኸንታኽር ደገነንታኽር ገፍዑ እርጋኽር ኣኩን ሲክ፡አርእጊ እምነት እንገት ሰበት አኸት፡ብሕል ይስትኹን። 14 14.ገድ ይናደራ እን የሱስ ክርስቶስ እምነዲ እንከሊዲ ቅያስ እንግጋኹ በጃኹኹለ። 15 15.እየሱስ ክርስቶስ እን ሰልፍ ሓራሙሲ ደአንድሮ ከም እንተት፡እና ቆል ኒን እምንሳኹ ግን።ኒከልብርና ኒድክድ ግቡእ ግን። 16 16.እማኻ የሱስ ክርስቶስ እን ዲመር ርሕሊ ገእይድኖ ዮ ኒድ እምነው እን ቋላ ኒድክ ኒዓቅል ሰልፋ ይል ቋሊስሮሉ፡እነንድ ሰበትድ ግን ብሕል ይስታኹ ፡ 17 17.እማ እን ዲመር ሲም፡ደኳጋኽር ቋልስተጋኹር ላኹ ጃር ዲማ ዳይም ክብርድ ሓምደዲ ኣኽኒንት ኣሜን። 18 19 18-19.ዎ ጢሜትዎስ ይኹራ፡እንሰልፍድ ይስታኹካ ትንቢታት እምነትዲ ትክያኹ ቀልብዲ ሻኽሮ፡ ኒድ ትክያኹ ሕራበት ተሓረብቶ፡እና ትእዛዝ ኒስ ተለይደኩንካ እንኩኹ።ናበልጛ እን ትክያኹ ናቀልብሲ ማልኖ፡ናእምነት መርከቡኹ ከርቲቲሎም፡ 20 20.ናልድ ኻ፡ጀኻግኒ ቀጽዕስትድኖ ዮ ሰይጣንድ ደክሶ ኡኹንሎም፡ናዋ ሄሜንዎስዲ እስክንድሮስዲ ግን።