ፊኻ- 5

1 1. ደአም ዎ ይና ሻን፡ እን ወክትዲ ኒ አሌላትዲት ቋላዅድ ከተብስሮልኩም ጀረብደላ። 2 2. ውረድ እን አደሪ ግርጋ ላስዋና ቂር እንተረሰና እንዳኽረ እንተርደት እንትን እንተላውድ ትክስዲነ አርእድኑዅ። 3 3. ከው ሰላምዲ ዳሕነዲ ግን ዩኑ፡ እዂን ጐድጉሪዲ ምሕጭ ሻካዅሰነላ፡ እንሲን ሓሰብስጋዅድ ድዳ እንትሮሎም ግን፡ኒዀርስክር እግርኖ ፍድኖ ኣኽኒ። 4 4. ደአም ዎ ይና ሻን፡ እንትን ጭልምሊ እልድኒ እማ፡ እን ግርጋ እንዲኒ ስዋኒሰና እንተረለኩም። 5 5. ውረድ ናውክ እንትን በርህ እቑርዲ ገርካ እቑርዲ ግን፡ ቂረው ወሪ ጭልሙ ኣኽድኒ። 6 6. በጋ እን አሪው ሃበነሰና ገጝጅግኒን፡ ደአም ብርይናኽርዲ አምር ጣፍሑዲ ኣኽንን፡ 7 7. ውረድ፡ እን ገጝጀው ቂር ግን ናው ገጝጀው፡ እን ሸከረውር ቅር ግን ናው ሸከረናዅ። 8 8. ይን ደአም ገርካ እቑር ኣኽኖ ደምቢ፡ አምር ጣፍሑዲ ኣማነትዲ እጝከሊዲር ጊብስኽር፡ እን ሳዳ ደአኒዅስኽር ጊብ ኣዀርዅሰና ሰርንን። 9 9. ደአም ጃር ይና አደራ የሱስ ክስቶስሲ ደአን አርኖር መታን ግን ግራ ድዲል የመምለና። 10 10. ጒነን ወሪ ገጝጅነን ኒዲ መንደርትኖር መታን ክርስቶስ ይና መታን ክሩዅ፡ 11 11. ንድኻ እን እምንድክ እስዳናዅሰና እኺርኺርሲ ደፍእዳኽር ዳበርዳኽር። 12 12. ናን ይኸ፡ ዎ ይና ሻን እንታ ነበክል ተዓበውዲ እን አደረድ መርሓውኩምዲ መዀዃውኩምዲት ከበርድትኖሎም ሺውነኵንኩም እጝኵንዅን። 13 13. ናክድመት ሰበትድ እጝከሊሲ ገሪዅዲክ ሓሸምደሎም። እንታ ነበክል ሰላም ዋንቲኒ። 14 14. ኮዶ፡ ዎ ይና ሻን እን አደብ እጝገውሲ መዀዀሎም፡ እን ሓያማንሲ ተብደሎም፡ ቂልሰውሲ ካበሎም፡ ናድክድኻ ዓቕል እሳ ይኖ ኰድጝነኵንኩም። 15 15. ላዅ እንተልድ ምቑለስ ምቑለድ ወንተስጊን አነብስን፡ ደአም ዲማ እኺርኺርድኽር ኮዶ ናድክድኽር ትክያዅ እሲትኖ ጀረባ። 16 16. ዲማ ፈርሓ። 17 17. ካረምግድኒ ሺዋ፡ 18 18. ኣኻ ኣዋይንዲክ ሓመዳ፡ ውረድ እን ክርስቶስ ኢየስስዲ ህምባዅኩም ላናርሊ ጃር ምራድ ኒን ግን። 19 19. መንፈስ ሻትክሲ ስንስድጋ። 20 20. ነበይስነስ ቃበብጋ፡ 21 21. ደአም ኒትክ መመያ፡ ትክያዅሲካ ሸኻ፡ 22 22. ኣኻ ምቑሊልድክ ገበብታ። 23 23. እን ጃር ሰላሙዅ ኒላውድ ታምምድ ሸተክድንተት፡ ኮዶ ይና አደራ ኢየሱስ ክርስቶስር እንተርኒል፡ እንታ መንፈስዲ ሪሕዲ ገሮብዲ ናግይዲ ሓኵር እጝጋዅዲ ኣኾ ተከውስኒ። 24 24. እን ሽጛዅኩም እምንሳዅ ግን፡ እሲሮሎምኽር ግን። 25 25. ዎ ይና ሻን፡ ይና መታን ሽዋ። 26 26. ናትክ ሻንስኽር ሰለምስጝና፡ ሻትክድ ሰላም የሎም። 27 27. እና ንሽቃ ኒኒ ናልክ ሻንሊ ነበብስቶ እን አደረድ ሸሪሰኵንኩም እጙኵዅን። 28 28. እን ይና አደራ ኢየሱስ ክርስቶስር ገድ እንተዲ ኣኽኒ።