¹ እማ ገድም፡እን እንታ ነበክል ህምበው ሽማገለታት፡ኣን ና-መሸማገልቲተንታ፡ስቃይ ክርስቶስሩኹድ መስካሪራ፡ደምብርጝ ገለጽስሮ ህምባኹ ክብርክር በንሳኽር፡መኾኻኹን እንኩኹን። ² እን እንተዲ ህምባ ማል ጃሩስ ምቓቕራ፡ንየት ጃሩኹሰና እንከሊሲ ግራ ቀስብድ ኣኽጊኒ፡ፈርሓትድ ግራ ሳክት ነፍዓጋ አርጝ መታን ኣኽጊኒ። ³ እን ማልሲ ቋልስተው ኣክዱኑ ግራ እን ማሕበራሊ አርደትሰና ኣኽጋኒ። ⁴ እን ሓላቃ ምቃቃኽ ገለጽሰሰና ጨምለልሰጋኹ አክሊል ክብሩኹ ከለብርትኖ ግን። ⁵ እንቲጝ ሻሎት እን እንተልድ ቅደውሲ ገዝእስተሎም።ጃር እን ክቡዓንሲ እንጠራኹሎም፡እን ለጥ የውሲ ኮዶ ገድ እዋኹሎም እማ፡ ናውክ እኺርኺርድ መለክስትኖ መታን ለተቕይና ደበልታ። ⁶ ገድም ኒወክትድ ኒ ክብሲሮኩም መታን እን ተብረሪ ጃር ናን ስቖይሲ ለተቕ-ያ። ⁷ ኒ-ሓሰባኩልም ኣኸውድ፡ኒውክ እንታ ምኹርሲ ኒል ገምደሉ። ⁸ ድያብሎስ እንታ እንጠረንታ፡ኒት ወሓጣኹ ጀረበ፡ እን ገመኒሰና ሕምሕሙ ጅልዋኹ እንኩኹ እማ ተንቀቕሳ፡ነቕሓ። ⁹ እና ጅርበትዲ ተዓብዲ እን እድንዪል ህንበው እንታ ሻንሲ ከም ገእየትሎም ለበኪል እስዲነ፡እምነትድ ተብድኖ ተቓወመሉ። ¹⁰ እን የሱስ ክርስቶስድ ዲመር ርሕሊ ሽጛኹኩም ጃር ኒውክ ገድ ኣደራ፡ከለላ ወክት ጅርበትዲ መከረዲ ብድነሰና፡ኒ-ታማን፡ተበው፡ሰረትሰው እሲሮኩም ግን። ¹¹ ዲማ ዳይም ኒድ ክብርዲ ሕክምዲ ኣኺኒ።ኣሜን። ¹² ስልዋኖስ ይት ከም ተከትለ እምንሳኹ ይና ዳንድ እሰ ኮድጙኩም፡እና ደው ይድኖ ህምብዳናኩ እምኑኹ ገድ ጃሩኹ ከም ኣከት መስከሩ ከለለው ከተቦልኩም ህምባኩን። ¹³ እን ፍሪርስረሪ ባቢሎን ህምብረሪ ማሕበርዲ ማርቆስ ይኹረዲ ሰላም የነኹኩም እንኩኑኹ። ¹⁴ እንከሊር ስልምድነድ እኺርኺርሲ ስልምዳ፡ክርስቶስ የሱስድ ህምብደናኽር ሰላም ዋኒንተት።ኣሜን።