ፊዃ - 4

1 4፡1እንትን ይእንከለንቲ ክሪዉ ነብያት ብኑ እዲኒል ፍኖ ህንበነኩ እማ እን መናፍስቲ ጃልድ ኣከነን መርመራ (ፈተሸ) ግን ግራ፡ኒትክ መንፈስ ኣኻኹሲክ አምንገሉ፡፡ 2 4፡2መንፈስ ጃሩኹሲ ንድ ግን አርእድናኹሉ፡የሱስ ክርስቶስ ስኸድ ክም እንተት አምናኹክ ኒዉክ መንፈስ ጃሩኽ ግን፡፡ 3 4፡3 እየሱስ ክርስቶሰ ስኸት እንተት አምነጋኹ ኒዉክ መንፈስኻ ጃልድ ኣኽላ፡፡ኒንኻ እን ክም እንትሮ ኣኸት ዋስድኖ ህንብደናኹ ክርስቶስር ኣንጻሩኽ መንፈስ ግን፡፡ናንኽር ዛጊድ እዲኒል ህንበኩ፡፡ 4 4፡4 እንትን ይቁርገ እንትን ጃልድ ግን፡እን እዲኒል ህንባኹልድ እንተል ህንባኹ ኩጓኹ ኣኽነዲን እንትን ቂልትኖሉ ህንበኩኩም፡፡ 5 4፡5ናዋዲ እዲኒል ግን፡እማ እዲኒልድ ጋበነኩ እንኩኑኽ፡እዲናኽር ዋሰቲሎም እንኩቲ፡፡ 6 4፡6 ይንን ጃልድ ግን ፡ጃርሲ አርኣኹ ዋሰኩና እን ጃልድ ኣኽጋኹ ዋሰለና፡፡መንፈስ ጃሩኹዲ መንፈስ ሰሓትኒኹዲት ንድ ግን አርእናኹሉ፡፡ 7 4፡7 እንትን ይእንከለነቲ፡እንከሊ ጃልድ ግን እማ ይነሹር ይነሹቲ እንከልስጞኒን፡፡እን አንከላኹክ ኒዉክ ጃልድ እዃርሳኹ ግን፡ጃርሲኽር አርእኹሉ፡፡ 8 4፡8 ጃር እንከሊ ግን እማ እን እንከለጋኹ ጃርሲ አርእለሉኒ፡፡ 9 4፡9 ጃር ኒድ ኒርሕድ መንደርትሮር መታን ዮ እን ላኹ ኒኹረስ እድኒል ኒእንሻቅነድ፡እን እንከሊ ጃሩኹ ይንድ ንድ ወድሕስትቲና፡፡ 10 4፡10 ጃር ኒላዉድ እንከልነዲንና ይነሓራምድ አረኪሰና ኣኽሮ ዮ ኻ ኒኹረስ ፈስነዲንና ግን ግራ ፡ይንን ጃርሲ እንከልነዲንሉ ኣኽላኒ፡እን እንከሊ ንድ ግን፡፡ 11 4፡11 እንትን ይእንከለንቲ ጃር ንሰና ዮ እንከሎና ድንቢታ፡ይንንኽር ይነሹር ይነሹ እንከልስጜኖ ወጀባኹና ግን፡፡ 12 4፡12 ላኹ ድኳ ጃርሲ ቋላኹሉ በታተን እላኒ፡፡ይነሹር ይነሹቲ እንከልስጞነን ጃር ይነል መንደርተኩ፡ኒእንከሊ ኽር ይነል ተመመቲ፡፡ 13 4፡13 ኒመንፈስልድ እዋኹና ኣኸዉድ፡ይንን ኒል ክም መንደርትነት፡ንኽር ይነል ክም መንደርተት ንድ ግን አርእናኹ፡፡ 14 4፡14 እን እኽር ኒኹረስ ደአንደንታ እዲኒኹ እዲኒኹ ኣኽሮ ክም እንሻቀትሉ ፡ይንን ቋልኖ መስከርነኩን እንኩንኹን፡፡ 15 4፡15 እየሱስ ጃርኹራ ኣኸት አምናኹ፡ጃርኒል መንደርተኩ፡ንኽር ጃሊ መንደርተኩ፡፡ 16 4፡16 ይንንኽር እን ይነኽር ጃሊ ህንብረሪና እንከሊት አርእኖኽር አምኖኽር ህንብነኩን፡፡ጃር እንከሊ ግን እን እንከሊትል መንደርተኹክ ካ ጃሊ ግን ኒመንደርታኹ፡ጃርኽር ኒል መንደርተኩ፡፡ 17 4፡17 እን ኒ ህንባኹሰና ፡ኒሰናኽር ይንን እና እዲና ኒሂትል ግን ህንብናኹ እማ ፍትሕ ግርገትታ ሓጠር ክሚኖ መታን ንድ እን እንከሊ ይነል ተመምቲ፡፡ 18 4፡18 ጉኢታ ምጨት ግን ኒናዕሳኹ፡፡እን ጉኢታኹ ኻ እንከሊሲ ታምም ኣኽላ፡እን ታምሚ እንከሊ ጉኢት ዳገነቲላ ግን ግራ እን እንከሊትልታ ጉኢ እላኒ፡፡ 19 4፡19ኒ ሰልፍልድ እንከሉኹና እማ፡ይንንኽር እንከለንቲ ግን፡፡ 20 4፡20 እን ቋላሲሉ ኒዳንሲ እንከለጋኹሉታ እን ቋለጋሲሉ ጃርሲ እንከልዶሉ ገረስተለሉኒ እማ፡ኒዳንሲ እንጠሩሉ ጃርሲ እንከለኩንሉ ያኹ ዋነን ኒ ብጛ ግን፡፡ 21 4፡21እን ጃርሲ እንከላኹ ኒዳንሲኽር እንከልንሉ ደአም፡እና ትእዳድ ኒን ግን ኒልድ ከለብርናኹሉ፡፡