ፊኻ - 15

1 2 15፡1-2. ይሻን ፡ ናፍዓጋኹድ እምንድናኽ ኣኽግዳግናን ፡ እና ኣና ሳበካሳና እስዲነ ሻኽድኖ ዋንትዳነንታ ፡ እና ሳባካኹኩም ካላብርዳናክዲ ኒል ታብድኖ ህንብዳናኽዲ ኒድር ዳኣንዳናኩሉ ወንጌል ኣርኢሳኹንኩም እንኩኹን ፡፡ 3 15፡3. እና ኣን ካላባክሲ ናትካ ጃብ ድዊኹንኩም ፡ እና እን ክቱባን ያነውሉሳና ፡ ክርስቶስ ይናሓራም ማታን ክሩኽ ፡ 4 15፡4. ደብሲኻ ፡ እና ክቱባን የናውሱሉሳና ፡ ሲኻር ኳረድ ጊኽ ፡ 5 15፡5. ከፋድ ፡ ኒዳንብኽር እና ሽካ ለጛድ ቃልስቱኽ፡ 6 15፡6. ኒዳንቢ ፡ ባጃኻው ናልድ ንኪ ኣኽራሲክ ህንባው ፡ ናበሊን ላኪን ጋንጆ ህንባው ፡ ኣንኳ ሊኅ ባጃኻው ሻንድ ላዶኒድ ቃሊሱኽ ፡፡ 7 15፡7. ኒዳንብክ ያቆብድ ፡ ኒዳንብኻ ናውክ ሃዋርያድ ቃሊሱኽ ፡፡ 8 15፡8. ናትካ ዳንቢኻ ይድ ፡ ቆልዓ ታካኹድ ፡ ቃሉሱኹለ ፡፡ 9 15፡9. ኣናዲ እን መሕበር ጃርትሪት ኣሳጋግዳኹላ ኣኻውድ ፡ ናትካ ግናይ ግን እማ ሃዋርያ ሽጝስያ ብቁዕ ኣኽሊኒክ ፡፡ 10 15፡10. እና ህንባኹሉ ጋድ ጃሩኹድ ግኒ ኣን ህንባኽ ፡፡ ናትክልድ ባጃኻክ ጫዓርኹን ግራ ፡ እን ይድ እውስታኽ ጋድ ካንቱ ኣኽላኒክ ፡፡ እና ይዲ ህንባኽ ጋድ ጃሩኽ ግራ ፡ ኣን ኣኽሊኒክ ፡፡ 11 15፡11. ዳኣም ኣን ኣካን ፡ ናው ኣካነን ፡ ናሃብርነ ሳባክናኹን እንኩንኹን ፡ እንትጝር ኒሳና እምንድኑኽ ፡፡ 12 15፡12. ክርስቶስ ክሪልድ ጋት ሳባኽሰት ዳኣም ፡ ኣዋህቢነግን እንታልድ ባጃኻው ፡ ጊና ክረዉዉ እላኒክ ያነው ፡፡ 13 15፡13. ክራው ጋገው ኣከናን ፡ ክርስቶስኽር ጊላ ፡፡ 14 15፡14. ክርስቶስ ጊጋኅ ኣከን ፡ ዳኣም ይና ስብካት ከንቱ ግኒ ፡ይና እምናትኽር ካንቱግኒ ፡፡ 15 15፡15. ጃር ክርስቶስ ጉድኹሉ ይኖ መስከርኖ ህንብናኹን እማ ፡ ክርስቶስቲ ጉድጋኹሉ ኣከን ፡ ክርውኽር ጋገው ኣከናን ፡ ይን ብጚት መሳኻኽር ጃሩ ኣኽኖ ኣሬርስኖ ህንብናኹን ፡፡ 16 15፡16. ክራው ጋጌናን ፡ ክርስቶስኽር ጊላ እማ ፡ 17 15፡17. ክርስቶስ ጊጋኽ ኣከን ፡ እንታ እምና ኮንቱግኒ ፡ እንትጝ ልሳዕ እንታ ሓራምሊ ህንብዳናኽ ፡፡ 18 15፡18. ዳኣም እንክርስቶስድ ጋንጃው ፡ ድዳው ግናው ፡፡ 19 15፡19. እና ሂወትኔኒትል ካ ክርስቶስድ ሳዳ እስናን ፡ ናትክ ኣዳምልድ ባኻኽዳው ኣኺንድ እርጉንኹን ፡፡ 20 15፡20. ናን ላኪን ክርስቶስ ፡ ቅዳኽ እና ናነን ጋንጆ ህንበው ኣኾ ፡ ክሪልድ ጊኅ ፡፡ 21 15፡21. እን ክራ ላኣዳምድ እንታሰና ፡ ኒሳናኻ ጉና ክርኒው ላኣዳምድ ግኒ እንታኽ ፡፡ 22 15፡22 እና ናውክ ኣዳም ክርናሳና ፡ ኒሳናኽር ናውክ ክርስቶስድ ክራጋው ኣኺድኖጊን ፡፡ 23 15፡23. ላኪን ላኹክ ስርዓትድ ግኒ ፡ ክርስቶስ ቅዳኽሳና ፡ ዳንብርኻ ኣነን ክርስቶሱ ኒእንታርናድ ፡፡ 24 25 15፡24-25. ክርስቶስ እና ኒኣፋይቲ ይስታውሲክ ኒሉክ እንቃይ እሲራሲኩሎም ፡ ሳያምስሮ ህንብኹሉ እማ ፡ ኒውክ ሲመትዲ ምልክዲ ስልጣንዲ ቂሌሪት ፡ እን ሕክምቲ ጃርድ እዋሳናክላ ፡ እንሲንግን ዳንጎባ ኣካኽ ፡፡ 26 15፡26. እና ዶንጎቢል ቂልታኽር ክራ ግኒ ፡፡ 27 15፡27. ጃር ፡ ኒሉክ እንቃይ ኒትክ ጋዝእድኩሉ እማ ፡ ኒውክ ገዝእሱኽ ፡ ዪእንኩንሲክ ፡ እና ኒትክ ኒድ ጋዝእሳኩሉ ኒኻ ኣኼት ኣርእሳኽ ግኒ ፡፡ 28 15፡28. ኒውክ ማለክሴሪትሉ ፡ ጃርኽር ኒትክ ኒትክሊ ኣኺሮ ማታን ፡ እንሲን እን ኒኹራ ኒላውድ እና ኒትክ ጋዝእዳኽድ ጋዝእስሮጊን ፡፡ 29 15፡29. ኣካገን ላኪን ፡እና ክራው ኣካንሊ ጠማቅሳው ውራ እሳናኹን እንኩንኹነ ፡ እና ክራው ጋገው ኣከናን ፡ ውራ ማታን ጠማቅሰናኩሎም ፡፡ 30 15፡30. ውራ ማታን ግኒ ይን ዲማክ ጉኢትሊ ቱናኹን ፡፡ 31 15፡31. ይሻን ፡ ኣን እና ክርስቶስ ዬሱስ ይናኣደራድ እንተል ህንባኹድለ ትምክሕቲ ጊረጋ ሺበክ ክራኹን እንኩኹን ፡፡ 32 15፡32. ኣን ግእዚ ኣዳምሰና እፈሶንትል ኣራዊትዲ ገጣመን ፡ ውራ ጥቅም ሻኹንክራው ጋገው ኣከናን ፡ ኣማሪ ክርኖጊን እማ ፡ ቂንን ጅእንን ፡፡ 33 15፡33. ምልሳጋ ፡ ባዳን ጨሪትና ትክያኽ ክናስ ዲሂሳኹ ፡፡ 34 15፡34. ናበልን ኣምር ጃሩኽ ሻኽኒ እማ ፡ ትክያኹድ ተባራቤራ ሓራምኽር እሰጋ ፡፡ ርኒስ ስማርትኖ ዮጊን ያኹኑ እንኩኹነ ፡፡ 35 15፡35. ገለ ላኪን ፡ ክራው ኣዋኺኖ ግን ናው ጋው ፡ ኣዋያኽ ስኻድ ግኒ ናው እንተራው ፡ ያኽ ዋነቲራ ፡፡ 36 15፡36. እንፋ ሃስስ ፡ እና እንቲ ፋድራኹሉ ክርጊ ርሕ ኣራረላኒክ ፡፡ 37 15፡37. እን ፋድራኹ ፈዳና ስርናዪኽ ዋሪኻ ኣሪ ዓይነትቱኽ ፈዳና ካያ ግኒ ግራ ፡ እን ስኻ ኣካኽሲ ኣኽላኒክ ፈድራኹ ፡፡ 38 15፡38. ጃር ደኣም ኒጃረባሰና እሶ ግኒ ስኻ እዋኹሉ ፡፡ ላኽ ፋደናክ ናኒ ሲኻስ ጊን እዋኹሉ ፡፡ 39 15፡39. ስኻ ኣዳሙኽ ኒቱ ፡ ስኻ እንስሲኽ ኒቱ ፡ስኻ ጃኬሉኽ ኒቱ ፡ ስኻ ዓሲኹር ኒቱግራ ፡ ኒውክ ስኻ ላዓይነት ስኻ ኣኽላኒክ ፡፡ 40 15፡40. ሰሚኽ ስኻ ህምባኽ ፡ ብሪኽ ስኻ ህንምባኽ ፡ ክብሪ እን ሰሚኽ ኒቱ ጊን ፡ ክብሪ እን ብሪኽር ኒቱግኒ ፡፡ 41 15፡41. ክብርድ እካ ሽንግርዋ ሽንግርዊልድ ኪዳኽ እማ ፡ ክብሪ ኳሪኽ ኒቱ ፡ ክብሪ ኣርቢኽ ኒቱ ክብሪ ሽግርዊኽር ኒቱ ግኒ ፡፡ 42 15፡42. ጉና ክርኒኽር ኒሳናጊን ፡ ዳኳኽድ ፋድሳኽ ፡ ደኳጋኹድ ጋኽ ፡፡ 43 15፡43. ውርዳትድት ፋድሳኽ ፡ ክብርድ ጋኽ ፡፡ ቂልስንድ ፋድሳኽ ፡ ሒሊድ ጋኽ ፡፡ 44 15፡44. ፊኹቱኽ ስኻ ፋድሳኽ ፡ መንፋሳዊራ ስኻ ጋኽ ፡፡ ፊኹቱኽ ስኻ ዋነን ፡ መንፋሳዊራ ስኻ ህንባኽ ፡፡ 45 15፡45. ኒሳናኽር እን ሰልፉኽ ኣዳም ርሕ ሻኽ ኣኺክ ፡ ያኽ ክቱብ ግኒ ፡ እና ዶንጎቢኽ ኣዳም-ኻ ህያው እሳኽ መንፋስ ኣኺኽ ፡፡ 46 15፡46. ልሳዕ ሰሊፍ እን ፊኹቱኽ ግኒ ግራ ፡ እን መንፋሳዊራ ኣኽላኒክ ፡፡ ዳንብርን እን መንፋሳዊራ ግኒ ፡፡ 47 15፡47. እና ሰሉፉኽ ኣዳም ብሪልድ ኣኺኽ ብሪኽ ግኒ ፡ እን ሊጜር ኣዳም ሰሚልድ ግኒ ፡፡ 48 15፡48. እና ብሪኽሰና እነኒንኽር ብሪው ግናው ፡ እና ሰሚኽሸና እንጨደንኽር ሰሚው ግናው ፡፡ 49 15፡49. እና ተካ ብሪኽ ሰርናሰና ፡ ተካ ሰሚኽር ሰርኖጊን ፡፡ 50 15፡50. ልሳዕ ፡ ይሻን ፡ ስኻዲ ብርዲ ሕክም ጃሩኽ ውርስሮ ገራሰላኒክ ፡ እና ደኳኽ እን ደኳጋኽሲ ወረሰጋትሉ ፡ ያኹንኩም እንኩኹን ፡፡ 51 15፡51. ዳኣ ፡ ምስጢር ድዋኹንኩም እንኩኹን ፡ ናውክ ቃዬርስኖ ጊራ ፡ ናውክ ጋንጅነሊኒክ ፡፡ 52 15፡52. ላጌሽ ፡ ቃማጭና ብድናሰና ፡ እና ሚትካ ደንቢሪኽ መላከት ፡ እን መላከት ናፍሕስሮጊን እማ ፡ እና ክራው ደኳጋድ ጊድኖ ጊን ፡ ይንኽር ቃዬርስኖጊን ፡፡ 53 15፡53. መለት ፡ እን ደኳጋኽ ሰርዶ ተገባኣኹሉ እማ ፡ እን ክራኽ-ኻ ክረጋኽ ሰርዶጊን ፡፡ 54 15፡54. እና ዳኳኽ ደኳጋኽ ሰሬሪት ፡ እንሲን እን ክቱብ ፡ ክርና ዓውተሲ ዋሓጥሱኽ ፡ ያኽ ቆል ፋጸምስሮጊን ፡፡ 55 15፡55. እንቲ ክርና ፡ ኣወት ህንባኹን ኩ ጡሚትና ፡ እንቲ ሺኦል ፡ ኣወት ህንባኹን ኩ ዓውተ ፡፡ 56 15፡56. ጡሚትና ክርኒኽ ሓራም ግኒ ፡ ሒል ሓራሙኽር ሕጊ ግኒ ፡፡ 57 15፡57. እና ይና ኣደራ ዬሱስ ክርስቶስድ ሃቤ ዓውተ እዋኹልና ጃርድ ሓምደ ኣኺት ፡፡ 58 15፡58. እማ ፡ እንከልሱን ይሻን ፡ እንታ ጫዕሪ ኣደራድ ናፍዓጋኽ ኣኽጌት ኣለላይድኖ ፡ ክድማት ኣደሪኹድ ተባው ፡ ናቃናቅስጋው ፡ ዲማክ በጃኻ ኣኻ ፡፡