13

¹ ولازم على كل شخص انه يطيع الحكومه ، لأن كل حكومه هي من عند الله ، والحكومه الموجوده هو اللي اوجدها ² يعني من يقاوم الحكومه هو بيقاوم امر الله ، واللي بيقاومو يدو على نفسهم الجزاء ³ ومايفتجعش من الحكام اللي يعمل الخير ، ولكن من يفعل الشر ، واذا ما تشتيش تخاف من الحكومه افعل الخير ⁴ لأنها في خدمة الله لخيرك ولكن افتجع لو فعلت الشر ، لأن الحكومه ما بتحملش السيف باطل ، واذا عافبت فهو لأنها في خدمة الله على ميد تنزل غضبه على اللي يعملو الشر ⁵ على ميد ذيه لازم تسمعو للحكومه ، مش فجيعه من غضب الله وبس ، والكل على ميد يراعي الواحد ضميره

⁶ وذيه هو السبب والكل لأنكم تدفعوا الضرايب ، لأن رجال الحكومه هم خدام لله لوما يقومو بعملهم ⁷ ادو كل واحد حقه ، الضريبه للي له ضريبه ، والجزيه للي عليه الجزيه ، والاحترام للي له احترام والاكرام للي له اكرام ⁸ لاتخلوش عليكم دين لأي حد إلا محبه بينكم البين ، واللي يحب غيره تم العمل بالشريعه ⁹ لأن الوصايا تقول :(لا تزنيش ولا تقتل ، ولا تسرقش ، ولا تشتهي) وباقي الوصايا كلها في وصيه واحده هي :(حب قريبك ساع ماتحب نفسك) ¹⁰ لأن من يحبه الثانين ما يوجعهمش ابد ، والمحبه تمام العمل بالشريعه

¹¹ وانتو دارين في اي وقت احنا ، جت ساعتكم على ميد تصحو من نومكم ، لأن النجاه ذلحينه اقرب لنا من يوم آمنا ¹² عينتهي الليل وقرب النهار ، ولازم نطرح أعمال الظلام ونشل سلاح النور ¹³ لازم اننا نعيش ساع اللي بيسيرو في نور الصبح ، لا عربده ولا سكر ولا فسق ولا خلاعه ن لا مصايحه ولا حسد ¹⁴ ولكن خلو سلاحكم بالرب يسوع المسيح ، ولا تلتفتوش للجسم على ميد تشبعو شهواته