4

¹ ورجع مره ثانية يعلم عند شاطئ البحيرة، وتجمعو عنده جمهور كبير ، حتى انه طلع فوق قارب في البحيره وجلس بينه ، والناس كلهم جالسين في البر على شاطئ البحيرة. ² وعلمهم بالأمثال حاجات خيرات، وقلهم في تعليمه ³ خرج المزارع علميد يزرع ⁴ ولاما كان بيزرع نكع منه شوية حب في عرض الطريق، وجت الطيور واكلته ⁵ وزد نكع شوية حب على أرض حجرية مابش بينها تراب خيرات ، ونبتت سريع لأن التراب مشهو عميق ⁶ ولاما اشرقت الشمس، حرقت النبته وذبل لأنه ماكنش معاها جذور ⁷ ونكع بعض الحب بين الشوك واختنق من الشوك وما اداش محصول ⁸ ومنه اللي نكع على أرض حاليه ونبت وطلع منه محصول، وانتج بعضه 30 وبعضه 60 وبعضه 100

⁹ ورجع قال اسمعوني لو معاكم اذان تسمعو ¹⁰ لاما كان لحاله سأله اتباعه والصحابة عن مغزى الأمثال ¹¹ فقلهم انتم اديت لكم سر ملكوت الله ، أما اللي جالسين خارج يسمعو بالأمثال ¹² حتى انهم كيف ما ابسرو ما عيستضوش ، وكيف ما سمعو ما عيفهموش ، علميد ما يتوبوش وتغفر ذنوبهم ¹³ رجع قال لطلابه مافهمتوش هاذا المثل؟ كيف عاد تفهمو غيره من الأمثال؟ ¹⁴ المزارع يزرع كلام الله ¹⁵ وبعض الناس ساع الحب اللي نكع على الطريق ، لكن يجي الشيطان لهم ويشل الكلام المزروع فيهم ¹⁶ وبعض الناس ساع الزرع في بقعه حجرية، اول ما يسمعو كلام الله على طول يقبلوه فارحين ¹⁷ ولكن مابش عمق في قلوبهم ، ومايدوموش واول ما توقع لهم نكبه او ضيقه من سبة كلام الله يتراجعو طوالي ¹⁸ وبعض الناس ساع الزرع بين الأشواك هم اللي يسمعو كلام الله ¹⁹ ولكن هموم الدنيا والغنى والشهوات تدخل في قلوبهم وتخنق كلام الله وما تثمرش ²⁰ وبعض الناس ساع الزرع في الأرض الحاليه ، يسمعو كلام الله ويقبلوه ويحصدو المحصول حقه ، ومنهم من يحصد ثلاثين ومنهم ستين ومنهم مية ²¹ وقلهم هو يسبر اننا نطرح الضوء تحت المكيال ولا تحت السرير ؟ ولا نطرحه في بقعه مرتفعه؟ ²² اي شيء مختفي عيظهر، واي سر عيعلن ²³ من معه اذنين يسمعين ، يسمع ²⁴ وقال لهم : اوبهو لاما تسمعو ! الكيل اللي تكيلو به للثانين هو نفسه اللي يكال لكم به ²⁵ لأن من له حاجه يزيدو له واللي مابش معه حتى القليل اللي معه يشلوه عليه ²⁶ وقال ملكوت الله ساع رجال يبذر الحب في جربته ²⁷ ويرقد في الليل ويقوم الصبح والزرع ينبت ، وهو مش داري كيف وقع هاذا ²⁸ فالأرض من نفسها تنبت العشب اول شي ، وبعدا السنبل، وبعدا القمح اللي يملي السنبل ²⁹ واول ما ينضج القمح يرسل الرجال من يحصد بالشريم ، لأنه وقت الحصاد ³⁰ وقال: كيف نشبه ملكوت الله ، ولا بأي مثل نبينه ³¹ هو ساع حبة خردل وقت مانزرعها هي اصغر بذره من الحبوب ³² ولكن بعد الزرع تكبر وتوقع من اكبر النباتات وغصونها يوقعين كبار حتى ان الطيور تقدر تبني عشها بينها ³³ وكان عيسى يكثر من الأمثال علميد يعلم الناس كلام الله بقدر فهمهم ³⁴ وما كان يحاكيهم إلا بالأمثال ، ولاما يجلس مع طلابه لحالهم يفسر لهم كل حاجه ³⁵ وفي هذاك اليوم لاما اقبل الليل قال لهم "اقبلو نخطى للجهة الثانية من الشاطئ ³⁶ وفلتو الناس وبزو عيسى في القارب اللي كان بينه وكان معاهم قوارب ثانية ³⁷ وجت عاصفة رياح قويه وشلت الأمواج تضرب القارب وكان عيمتلي بالماء ³⁸ وكان عيسى راقد نهاية القارب وطارح راسه على وساده ، وقيموه وقالو له : مابتهمش اننا عنغرق ولا لا ؟

³⁹ فقام وصيح على الريح وقال للبحر اسكت واهدأ، وسكنت الريح ووقع هدوء تام ⁴⁰ وقال عيسى لطلابه : مالكم خايفين؟ او عادكم مش مؤمنين؟ ⁴¹ ولكنهم افتجعو وقالو بيناتهم البين: من هاذا لاما حتى الريح والأمواج يطيعوه