¹ وجلس يحاكيهم بأمثال قال : غرس رجال معه جربه وسورها وحفر بينها معصره وبنى برج واداها لبعض الفلاحين وسافر للخارج ² ولاما اقبل يوم الحصاد ، رسلهم خادم علميد ياخذ منهم حصته من ثمر الجربه ³ فمسكوه وضربوه ورجعوه بدون اي شي ⁴ ورسل خادم ثاني، وضربوه الفلاحين ورجموه وبهذلوه ورجعوه ⁵ ورسل واحد ثالث ، وهذا قتلوه ، وبعد رسل خيرات غيرهم فضربو بعضهم وقتلو البعض ⁶ وما بقى للرجال الا ابنه الحبيب فرسله لهم في اخر الوقت وقال : عيفتجعو من ابني ⁷ لكن الفلاحين قالو بينهم البين : هوذا الوارث تعالو نقتله ، ويرجع الورث لنا ⁸ فمسكوه وقتلوه ورجموه خارج الجربه ⁹ وايش عيفعل صاحب الجربه؟ يجي ويقتل الفلاحين ويسلم الجربه لغيرهم ¹⁰ ما قريتوش هذي الأية : الحجر اللي ما قبله البنائيين وقع راس الزاوية ¹¹ هذا اللي عمله ربنا وهو شي عجيب في عيوننا ¹² فجربو انهم يمسكوه ، لأنهم فهمو انه قال هذا المثل عليهم ولكنهم افتجعو من الناس ، وفلتوه وراحو لهم ¹³ ورسلو له جماعه من الفريسيين والهيرودسيين علميد يمسكوه بكلامة ¹⁴ فجو له وقالو له : يا استاذ ، احنا دارين انك صادق ما يهمكش احد ، لأنك ما بتراعيش مقام الناس ، ولكن بالحق بتعلم طريق الله . هل يجوز اننا ندفع الجزيه للقيصر ولا ماشي ؟ ندفعها ولا ما ندفعهاش؟ ¹⁵ فعرف عيسى مخادعتهم وقال لهم : ليش تشتو تحرجوني ؟ هاتو دينار علميد ابسره ¹⁶ وادو له دينار فقال : صورة من هذي واسم من ؟ قالو : القيصر ¹⁷ فقال لهم : ادفعو للقيصر اللي هو حق القيصر وادفعو لله اللي هو حق الله . واستغربو منه ¹⁸ واقبل له بعض الصادقين ، وهم اللي بينكرو القيامة ¹⁹ فسألوه : يا استاذ ، كتب لنا موسى إذا مات رجال ومهه اخ وفلت مرته وماخلفت ولد ، لازم اخوه انه يتزوجها ويدي نسل لأخوه ²⁰ وكان به سبعه اخوة ، تزوج الأول مره ومات وما خلفت منه نسل ²¹ وتزوجها الثاني ، ومات وما خلفش منها نسل ، وكمان الثالث والبقية ²² وما خلفش اي واحد من السبعة نسل منها ، وبعد ماتت المره من بعدهم كلهم ²³ فهي زوجة من عتكون في يوم القيامة حين يقومو ؟ لأنها كانت زوجة السبعة ²⁴ فجاوبهم عيسى : انتم في ضلال ، لأنكم ماتعرفوش الكتب المقدسة وقدرة الله ²⁵ لأن في القيامة ما يتزاوجوش ، ولكن يوقعوا ساع الملائكة في السماوات ²⁶ واما على الأموات انهم يقومو ما قريتوش في كتاب موسى خبر العليقة ، كيف كلمه الله وقال : أنا إله ابراهيم ، وإله إسحق ، وإله يعقوب ²⁷ وماكنش إله أموات ، ولكن إله أحياء . ما اقوى ضلالكم ²⁸ وكان واحد من الفقهاء هاناك ، فسمعهم يتصايحو وابسر ان عيسى عرف يرد على الصدوقيين ، ووطى عنده وسأله : ماهي اهم الوصايا كلها؟ ²⁹ فجاوب عيسى : الوصية الأولى هي : إسمع يا إسرائيل ، الرب إلهنا هو الرب الأحد ³⁰ حب الرب إلهك بكل قلبك وكل نفسك وكل فكرك وكل قدرتك ³¹ والوصية اثانية : حب قريبك ساع ما تحب نفسك ، ومابش وصية اعظم من هولا الوصيتين ³² فقال له الفقيه : احسنت يا استاذ ، انت على صدق في قولك إن الله واحد ولا إله سواه ³³ وأن يحبه الانسان بكل قلبه وكل فكره وقدرته، وأن يحب قربه ساع ما يحب نفسه ، أفضل من كل الذبايح والقرابيين ³⁴ وابسر عيسى ان الرجال جاوب بعقل فقال له : مش انت بعيد من ملكوت الله . ومحد يسطى بعد هذا يسأله بشي ³⁵ ولاما عيسى كان يعلم في الهيكل قال : كيف يقول الفقهاء إن المسيح هو ابن داود؟ ³⁶ وداود نفسه قال بوحي من الروح القدس قال الرب لربي اجلس عن يميني علميد اخلي اعدائك تحت ارجلك ³⁷ فداؤد نفسه يقول المسيح رباً ، فكيف يكون المسيح ابنه؟ ³⁸ وقال لهم في تعليمه : اوبهو من الفقهاء ، يعجبهم يتمشو بثياب طويله غاليه ، وان الناس يسلمو عليهم في الساحات ³⁹ ويكونو في الصفوف الأمامية في بيوت العبادة ، وأن يجلسو في مقاعد الشرف في العزايم ⁴⁰ ياكلو بيوت الأرامل ، وهم يعملو نفسهم يطولو الصلاة ، هولا لهم أقوى العقاب ⁴¹ وجلس عيسى في الهيكل ، قدام صندوق التبرعات يراقب الناس وهم يطرحو بينه الفلوس ، وخيرات منهم طرحو من الأغنياء فلوس خيرات ⁴² وجت ارملة فقيرة وطرحت في الصندوق درهمين ⁴³ فصيح لطلابه وقال لهم : اقولكم الصدق ، هذي الأرملة الفقيرة طرحت في الصندوق أكثر من اللي طرحه البقية كلهم ⁴⁴ لأنهم طرحو من الزايد على حاجتهم ، وأما هي فمن حاجتها طرحت كل ما معها لمعيشتها