22

¹ ورجع عيسى يتحاكا مع الناس بالأمثال ، فقال : ² (يشبه ملكوت الله ملك فعل عزومه في عرس ابنه ³ ورسل خدمه للمعزومين علميد يجوا للعرس ، ومارضيوش يجوا

⁴ فرسل خدم ثانين علميد يقولوا للمعزومين : جهزت عزومتي وذبحت ابقاري وعجولي المسمنه وجهزت كل شي ، تعالوا للعرس

⁵ ولكنهم استهانوا بالعزومه فمنهم من خرج لجربته ومنهم من سار لتجارته ⁶ والبقيه مسكوا خدمه وسبوهم وقتلوهم ⁷ فزعل الملك ورسل عساكره ، ودمر هولا قتله واحرق مدينتهم

⁸ وبعدا قال لخدمه : العزومه جاهز ولكن المعزومين ما يستحقوهاش ⁹ فأخرجوا للشوارع واعزموا م تلاقوه ¹⁰ فخرج الخدم للشوارع وعزموا كل من لقيوا من اشرار وصالحين ، وامتلت قاعة العرس بالمعزومين

¹¹ فلوما دخل الملك علميد يبسر المعزومين ، ابسر رجال مش لابس ثياب العرس ، فقال له : ¹² كيف دخت هانا يا صاحبي ، وانت مش لابس ثياب العرس؟ فسكت الرجال

¹³ فقال الملك للخدم : اربطوا ايديه وارجله واطرحوه خارج بين الغدره بقعة البكاء وصرير الاسنان

¹⁴ لأن المعزومين خيرات ولكن المختارين قليل ¹⁵ وسار الفريسيين وتشاوروا كيف يمسكوا عيسى بكلمه ¹⁶ فرسلوا له بعض الطلاب حقهم وبعض الهيرودسيين يقولوا له :(يا استاذ احنا دارين انك صادق تعلم بالصدق طريق الله ، وما يهمكش أحد ، لأنه ما يهمكش مقام الناس ¹⁷ فقل لنا ايش رأيك يجوز لنا ندفع الجزيه للقيصر ولا ماشي؟)

¹⁸ ودرى عيسى بخبثهم فقال لهم :(يا منافقين ، ليش بتحاولوا تحرجوني؟ ¹⁹ رووني العمله اللي بتدفعوها ضريبه ! وادو له دينار ²⁰ فقال لهم : تيه صورة من واسم من ذيه؟

²¹ فقالوا : للقيصر

فقال لهم : ادفعوا للقيصر اللي هو حق القيصر ولله اللي هو حق الله)

²² فأستغربوا من اللي سمعوه وفلتوه ومشيو ²³ وفي ذيك اليوم جا لعيسى بعض الصدوقيين ، وهم اللي ينكروا القيامه ، وسألوه ²⁴ يا استاذ ، قال موسى لو مات رجال ومابش معه جهال ، فليتزوج اخوه مرته علميد يفعل نسل لأخوه ²⁵ وكان عندنا سبعة اخوة ، فتزوج الأول ومات بدون جهال ، وفلت مرته لأخوه ²⁶ ومثله الثاني والثالث إلى السابع ²⁷ وبعدا ماتت المره من بعدهم كلهم ²⁸ فلمن توقع زوجه في القيامه؟ لأنها كانت زوجتهم كلهم !

²⁹ فجاوبهم عيسى :(أنتم في ضلال لأنكم ماتعرفوش الكتب المقدسه وقدرة الله ³⁰ لأن في القيامه ما يتزاوجوش ، بس يوقعوا ساع الملائكه في السماء ³¹ واما قيامة الأموات ، ماقريتوش ايش قال الله لكم ³² انا هو رب ابراهيم ورب اسحاق ورب يعقوب ، فهو رب احياء مش رب أموات)

³³ وسمع الناس ذيه الكلام ، واستغربوا من تعليمه ³⁴ وعلن الفريسيين أن عيسى سكت الصدوقيين ، فأجتمعوا سوا ³⁵ فسأله واحد منهم ، وهو من علماء الشريعه علميد يحرجه ³⁶ يا استاذ ، ماهي أعظم وصية في الشريعة؟

³⁷ فجاوبه عيسى :(حب الرب إلهك بكل قلبك ، وبكل نفسك وبكل عقلك ³⁸ تيه الوصية الأولى والعظمى ³⁹ والوصية الثانية مثلها : حب قريبك ساع ماتحب نفسك ⁴⁰ تيه الوصيتين تقوم الشريعه كلها وتعاليم الأنبياء) ⁴¹ ولوما كانوا الفريسيين مجتمعين ، سألهم عيسى : ⁴² (ايش رأيكم في المسيح؟ ابن من هو؟

قالوا له : ابن داود

⁴³ قال لهم : طيب كيف يداعيه داود يارب ، وهو يقول بوحي من الروح ⁴⁵ فلو كان داود يداعي المسيح رب ، فكيف يوقع المسيح ابنه؟ ⁴⁶ فما استرش اي احد انه يجاوبه ولا بكلمه ، وما سطيش أي احد من ذيك اليوم انه يسأله عن اي شي