18

¹ وقربوا الطلاب من عيسى في ذيك الوقت وسألوه :(من هو الأعظم في ملكوت الله؟)

² فصيح عيسى لجاهل وسنبه وسطهم ³ وقال :(اقول لكم الصدق : لو انتوا ما عتتغيروش وتوقعوا ساع الجهال ، ماعتدخلوش ملكوت الله ⁴ من عيتواضع ويوقع ساع ذيه الجاهل ، هو أعظم واحد في مملكة الله ⁵ ومن عيقبل طف ساعه بأسمي كأنه قبلني

⁶ ومن عيتسبب ان أي جاهل من اللي يؤمنوا بي انه يغلط ، فأحسن له انه يطرح حجر طاحون ثقيله على رقبته ويغرق نسه في البحر ⁷ ياويل العالم من الحاجات اللي تخلي الناس يغلطوا ، تيه الحاجات لازم عتوقع ، لكن ياويله من يوقع سبب انها نوقع ⁸ وإذا اوقعتك يدك أو رجلك انك تغلط وتوقع في الذنب ، اقطعها وارجمها بعيد عنك ، لأنه خير لك انك تدخل الحياة الأبدية ومعك يد او رجل واحده ولا يكون معك يدين ورجلين وترتجم في النار الأبدية ⁹ وإذا اوقعتك عينك في الغلط والذنوب ، اقلعها وارجمها بعيد عنك ، لأنه احسن لك انك تدخل الحياة الأبدية بعين واحده ، ولا انه يوقع معك عينين وترتجم في نار جهنم

¹⁰ اوبهوا انكم تضحكوا على أي واحد من هولا الجهال ، لأني اقول لكم ان ملائكتهم في السماء يبسروا واصل وجه أبي اللي في السماء ¹¹ لأن ابن الانسان جا علميد ينقذ الهالكين ¹² وايش رأيكم رجال معه 100 طلي ، وضاع واحد منهن ، مش عيفلت ال99 في الجبال ويسير يدور بعد الطلي الضايع؟ ¹³ ولوما يلقاه مش عيفرح به؟ اقول لكم الصدق :(انه يفرح به أكثر من فرحته بالتسعه وتسعين اللي ما ضاعينش ¹⁴ وكذيه ما يشتيش ابوكم اللي في السماوات انه يهلك واحد من هلا الجهال ¹⁵ واذا غلط اخوك عليك سير له وعاتبه بينك وبينه ، ولو سمع لك تكون ربحت اخوك ¹⁶ واذا مارضيش انه يسمع لك ، شل معك رجال او اثنين علميد تثبت كل شي بشهادة شاهدين او ثلاثه ¹⁷ ولو مارضيش انه يسمع لهم ، حاكي الكنيسه ولو مارضيش انه يسمع للكنيسه عامله ساع الأجنبي او من حقوت الضرايب

¹⁸ اقول لكم الصدق :(كل اللي تمنعوه في الأرض يمتنع في السماء ، واللي تسمحوا به الأرض يوقع مسموح في السماء

¹⁹ اقول لكم الصدق : اذا اتفق اثنين منكم في الأرض انهم يطلبوا حاجه ، توقع لهم من ابي اللي في السماوات ²⁰ واين ما يجتمع اثنين او ثلاثه بأسمي ، توقع هاناك بينهم) ²¹ فقرب بطرس وقال لعيسى :(ياسيد ، كم مره يغلط عليا اخي واغر له؟ حق سبع مرات!؟)

²² فجاوبه عيسى :(مش سبع مرات ، ولكن سبعين مره)

²³ لأن ملكوت الله هو ساع ملك يشتي ان يحاسب عبيده ²⁴ ولوما بدأ يحاسبهم وصل عنده واحد منهم عليه عشرة الف درهم من الفضه ²⁵ وكان مابش معه اللي يسدد به دينه ، فأمر سيده بأن يباع هو ومرته واولاده وكل مايملك حتى يوفي دينه

²⁶ فركع العبد له وسجد وقال : امهلني واديلك كل مالك علي! ²⁷ ورحمه وفلته واعفاه من الدين

²⁸ ولما رج الرجال لقى عبد من أصحابه كان له عليه مية دينار ، فمسكه برقبته لوما كان عيخنقه وهو يقول له : ادي زلطي اللي عليك!

²⁹ فركع صاحبه يترجاه ويقول له : اصبر عليا وعد احاسبك

³⁰ ومارضيش ، وشل الرجال وطرحه بالسجن لوما يدي زلطه ³¹ وابسروا العبيد اصحابه اللي وقع ، وزعلوا قوي وساروا حاكوا سيدهم بكل ما وقع

³² فصيح له سيده وقال له :(يا عبد السوء عفيت عن دينك كله لأنك تمنعتني ³³ وانت ما عفيت ولا رحمة صاحبك ساع ما رحمتك؟) ³⁴ وزعل سيده قوي ، فسلمه للجلادين علميد يوفيه كل ما له عليه

³⁵ كذيه يفعل بكم ابي السماوي ان كان كل واحد منكم ما يغفرش لأخوه من كل قلبه