¹ ومادام وانتو مؤمنين بسيدنا عيسى المسيح صاحب الجلاله ، فلا تميزوش ناس من ناس ² فلو دخل في اجتماعكم غني في اصبعه خاتم من ذهب ولابس ثياب حاليه قوي ، وبعدا دخل فقير وهو لابس ثياب قديمة ³ فقلتو للغني :(اجلس هانا في راس الديوان) وقلتو للفقير :(سنب انت هاناك ، ولا اوقف عند ارجلنا) ⁴ مش يعني هاذه ان انتو ميزتو واحد وخليتو نفسكم قضاة افكاركم شريرة؟ ⁵ اسمعو يا اخوتي الأحباء ، مش اختار الله فقراء هاذه العالم علميد يوقعو اغنياء بالايمان وورثة الملكوت اللي وعد به من عيحبوه؟ ⁶ وانتو بتحتقرو الفقراء ، وم هم للي يظلموكم ويسوقوكم للمحاكم ، مش هم الأغنياء؟ ⁷ وهم اللي بيكفرو بالأسم الكريم اللي بتنتمو ليه ⁸ واذا عملتو بشريعة الشرايع اللي قال عليها الكتاب وهي :(حب قريبك ساع ما تحب نفسك) فأحسن ما تفعلو ⁹ واما لو ميزتو احد فأنتو بتفعلو ذنب وتحكم الشريعة عليكم حكمها على اللي يخالفوها ¹⁰ ومن فعل بالشريعة كلها وقصر في وصية واحدة منها يغلط بها كلها ¹¹ لأن اللي قال ((لاتزنيش)) قال والكل ((لا تقتلش)) ، فلو قتلت وما زنيتش انت مخالف للشريعة ¹² فاتحاكو وافعلو ساع اللي عيحاسبهم الله بشريعة الحرية ¹³ لأن يوم القيامة لا ترحم من لا يرحم ، ومن هو رحين ما عيخافش يوم القيامة ¹⁴ ايش عينفع الانسان يا اخوتي انه يدعي للإيمان بغير اعمال؟ هل يستر هاذا النوع من الايمان انه ينقذه؟ ¹⁵ فلو كان بينكم اخ عريان ولا اخت عريانه مابش معاهم ما ياكلو ¹⁶ فأيش عينفع حكاكم لهم :(سيرو بسلام وادفو واشبعو) ،لو انتو مابتدولهمش اي حاجه من اللي يحتاجه الجسم؟ ¹⁷ وهاكذا الايمان ، فهو بغير اعمالكم يوقع بنفسه ميت ¹⁸ ويمكن يقول واحد منكم :(انت لك ايمان وانا لي افعال) شا قول له :(رويني كيف يوقع ايمانك من غير اعمال ، وانا ارويك كيف يوقع ايماني بأعمال) ¹⁹ انت بتؤمن ان الله واحد؟ طيب! حتى لشياطين بتؤمن بهاذه وبترتعش من الفجيعه ²⁰ يا اخضع هل تشتي اثبت لك ان الايمان من غير اعمال هو بلا قيمة؟ ²¹ ابسر لأبونا ابراهيم ، مش اعتبره الله صالح لأعماله ، لأنه قدم ابنه اسحاق على المنصه ²² يعني ابسر كيف ان ايمانه رافق اعماله ، فوقع ايمانه كامل بالأعمال ²³ فتم قول الكتاب :(آمن ابراهيم بالله فبرره الله لإيمانه ونادوه خليل الله) ²⁴ بتبسرو يعني ان الانسان يتبرر بالأعمال مش بإيمانه وحده ²⁵ ومثال ثاني هو راحاب العاهرة ، قد اعتبرها الله صالحه لأعمالها ، لاما رحبت بالرسولين وبعدا خطتهم من طريق ثاني ²⁶ وساع ما ان الجسم من غير روح ميت ، هاكذا والكل الإيمان من غير أعمال ميت