¹ فلازم اننا نتقدم للتعليم الكامل في المسيح ، ونفلت قفانا الدروس الأوله عن المسيح ، ومانرجعش للكلام عن التوبة من الأعمال اللي تودي للموت ، وعن الإيمان بالله ² وشعاير التغطيس وطرح الأيدي ، وقيامة الموتى وعقاب الأخرة ³ وهاذا اللي عنفعله بإذن الله ⁴ اما اللي جو للنور وطعمو الهبه السماوية ووقع لهم نصيب من الروح القدس ⁵ وذاقو حلاوة كلمة الله ، ومعجزات الحياة الجديدة ⁶ وبعدا ارتدو ، مستحيل يرجعو واعادتهم للتوبة ، لأنهم عيصلبو ابن الله مره ثانية من خسارتهم ويستهزأو به ⁷ لأن اي ارض شربت مطر من اللي ينزل عليها في كل وقت ، تدي محصول نافع لمن هو يفلحها ، ولها بركة من الله ⁸ اما لو كنت بتنتج شوك وعليقه ، فهي مالهاش قيمة ، وتستاهل اللعنة ويوقع مصيرها الحريق ⁹ ومع اننا بنتحاكا بهاذه الكلام يا خبرة ، فأحنا على يقين ان لكم ما هو احسن من غيره وما يشلكم للنجاه ¹⁰ لأن الله مش هو ظالم علميد ينسى عملكم ، ولا محبتكم له اللي بديت انكم خدمتو المؤمنين وعادكم بتخدموهم ¹¹ ورغبتنا القوية هي ان كل واحد منكم يبدي عليه نفس الحماس ، ويتمسك بالرجاء للنهاية ¹² لا توقعوش كسلين ، ولكن اقتدو باللي هم مخلصين على مواعيد الله بالايمان والصبر ¹³ فلوما وعد الله ابراهيم اقسم بنفسه ، لأنه ما بش أعظم منه يحلف به ¹⁴ فقال لإبراهيم :(عد اباركك واديلك نسل خيرات) ¹⁵ وهاكذا صبر ابراهيم ووقع له الوعد ¹⁶ والناس بيحلفو بمن هو أعظم منهم ، واليمين علميد تثبيت لكلامهم ينهي كل مشاكل ¹⁷ وهاكذا الله لوما يشتي يروي لورثة الوعد على قرارة ، عزز كلامه باليمين ¹⁸ فكان لنا بالوعد واليمين ، وهن امرين ما يتغيرينش مستحيل ان الله يكذب فيهن ، ما عيشجعناش كل التشجيع احنا اللي التجأو لله على التمسك بالرجاء اللي اداه لنا ¹⁹ وهاذا الرجاء لنفوسنا تستقر به ، وهو يدخل قفا الستاره للمقدس الداخلي ²⁰ بقعة ما دخل عيسى قبلنا بالنيابة عنا ، ووقع الكاهن الأعلى للأبد ساع الملك الصادق