¹ وأنا المحبوس هانا علميد المسيح ، أوصيكم انكم تعيشو عيشة تليق بالدعوة اللي دعاكم الله لها ² وتوقعو متواضعين ، ولطفاء وصبورين ، وتتحملو بعضكم البعض بمحبة ³ واجتهدو في المحافظة على وحدة الروح بالسلام اللي يربطكم مع بعض ⁴ فأنتو جسم واحد وروح واحد ، ساع ما دعاكم الله لرجاء واحد ⁵ ولكم سيد واحد وإيمان واحد وتغطيس واحد ⁶ الله واحد ، وهو ابو كل الناس ، ورب كل الناس ، ويعمل فيهم كلهم وهو فيهم كلهم ⁷ ومع هاذا كل واحد مننا يوقع له نصيب من النعمة ساع ما قسم له المسيح ⁸ فالكتاب يقول (لاما طلع للأعالي شل أسرى خيرات وادا للبشر هدايا) ⁹ أما قوله (طلع) يعني انه اول شي نزل لهاذه الأرض الوضيعه ¹⁰ فالمسيح اللي نزل هو نفسه طلع فوق كل السماوات ، علميد يملي الكل بحضوره ¹¹ وبعدا هو اللي (ادا هدايا للناس) وخلا البعض رسل وبعضهم أنبياء ، وبعضهم مبشرين ، وبعضهم رعاة معلمين ¹² وهاذا علميد يجهز المؤمنين ويقومو بالخدمه لبناء جسم المسيح ¹³ لاما نوصل كلنا لوحدة الإيمان ومعرفة ابن الله ، ونوصل لمستوى الكمال التام اللي موجود في المسيح ¹⁴ وما نبقاش اطفال تتراجمهم امواج المذاهب وتميل بهم كل ريح ويخدعوهم الناس ويبزوهم بالكذب للظلال ¹⁵ لكن نعلن الحق في المحبة وتنمو في كل شي تجاه المسيح اللي هو الرأس ¹⁶ وبه يتماسك كل الجسم مع بعض ، وتتصل كل الأعضاء بينها البين ، ويعمل كل عضو اللي واجب عليه ، فينمو الجسم كله ويبني نفسه بالمحبة ¹⁷ وأقول لكم واشهدو في الرب ان لا تسيرو من ذلحينه ساع الوثنيين اللي بيفكرو باطل ¹⁸ وهم في ظلام بصايرهم وجهلهم وقساوة قلوبهم غرباء عن حياة الله ¹⁹ وفقدو كل احساس ، وسلمو نفسهم للخلاعه علميد يفعلو الفاحشه من غير ظابطي ²⁰ أما انتو تعلمتو من المسيح حاجات غيره هاذه ²¹ انتو سمعتو رسالته وشليتو تعليم مطابق للحقيقة اللي في عيسى ²² ففلتو سيرتكم الأوله بترك الانسان القديم اللي خربته الشهوات الخادعه ²³ وجددو قلوبكم وعقولكم ²⁴ والبسو الانسان الجديد اللي خلقه الله على صورته في البر وقداسة الحق ²⁵ لا تكذبو ابداً ، ولكن لازم على كل واحد انه يحاكي الثانين بالصدق ، لأننا أعضاء بيناتنا البين ²⁶ حتى ولو غثيتو فلا تغلطوش ، ماتغربش الشمس عليكم وانتو غاثين ²⁷ لا تدوش ابليس فرصه بينكم ²⁸ من كان بيسرق يبطل السرقه ، وزد عليه يتعب ويفعل الخير بأيديه علميد يوقع قادر على مساعدة المحتاجين ²⁹ لا تخرج كلمة شر من فمكم ، ولكن كل كلمة صالحة للبنيان عند الحاجه وتفيد السامعين ³⁰ لا تزعلوش روح الله القدوس اللي به ختمتم ليوم الفداء ³¹ تخلصو من كل حقد ونقمة وغضب وصياح وسب وكل شر ³² وكونو بيناتكم البين لطفاء رحماء ، وسامحو ساع ما سامحكم الله لاما آمنتو بالمسيح