¹ ايها الاسياد، عاملو عبيدكم بالعدل والمساواة وزيد اتذكرو ان فوقكم سيد في السماء. ² صلو واصل، وفي وقت الصلاة اوقعو صاحين وشاكرين. ³ صلو والكل على ميدنا، على ميد يفتح الله لنا باب نبلغ الرسالة، ونبشر بسر المسيح. انا محبوس بسبب هذا. ⁴ وصلو على ميد ابشر فية سوا ساعما يستاهل. ⁵ اتصرفو بحكمة مع غير المؤمنين، واغتنمو كل فرصة تتوفر لكم. ⁶ على ميد يوقع كلامكم دايما لطيف ولة تأثير حالي، على ميد تقدرو تجاوبو كل واحد ساعما يوقع. ⁷ الشديد عيعرفكم بكل اخباري. هو اخي المحبوب، ومساعدي الوفي، وصاحبي في خدمة المسيح. ⁸ وانا رسلتة لكم على ميد هذا السبب، على ميد يعرفكم احوالنا كلنا ويشجعكم. ⁹ ومعة الاخ المحبوب والامين نافع الذي هو واحد منكم. هم عيعرفوكم بكل اللي بيحصل هانا. ¹⁰ الاخ رستركي المحبوس معي بيسلم عليكم اللي بيسموة يشوع الصادق. ¹¹ من بين كل اليهود الذي آمنو بالمسيح، هولا وحدهم بيخدمو معي في سبيل مملكة الله. هم اعزاء قوي لي. ¹² بيسلم عليكم ابو فراس خادم المسيح، والذي هو واحد منكم. وهو دايما بيصلي على ميدكم متواصل على ميد تثبتو كلكم ومعاكم ثقة كاملة من جهة مشيئة الله. ¹³ وانا اشهد لة انهو بيتعب خيرات على ميدكم، وعلى ميد اللي في لاودكية، واللي في هرابلس. ¹⁴ بيسلم عليكم لوقا الطبيب المحبوب، وزد ديماس. ¹⁵ سلمو على الاخوة اللي في لاودكية، وعلى الاخت نمفاس والمؤمنين اللي بيجتمعو في بيتها. ¹⁶ بعدما تقرو هذي الرسالة عندكم، رسلوها للمؤمنين اللي في لاودكية على ميد يزيدو يقروها هاناك ، والرسالة اللي في لاودكية اقروها انتو والكل. ¹⁷ وقولو لأرشيبي: (( لازم تكمل الخدمة اللي استئمنك المسيح عليها)). ¹⁸ وذلحين، انا بين اكتب لكم هذي التحية بخط يدي: سلام مني انا بولس، اتذكرو اني محبوس. نعمة الله معاكم.