8

¹ وكان شاؤل موافق على قتل صطفان ، وبدأت كنيسة اورشليم يوقع فيها ملاحقه قويه ، وتشتت المؤمنين كلهم في نواحي اليهودية والسامر ، ما عدا الرسل بقيو في القدس

...

² ودفن بعض الأتقياء اصطفان ، وبكوا عليه خيرات ³ وكان شاؤل يشتي يخرب الكنيسة ، وكان يسير من بيت لبيت ويخرج الرجال والنسوان ويحبسهم ⁴ واللي تشتتوا كان يسيروا من مكان لمكان وهم يبشروا بكلام الله ⁵ فسار فيليب لمدينة في السامرة ويبشر بالمسيح ⁶ ولما كانوا الناس يسمعوا فيليب وهو يتحاكا ، وتبسر الآيات اللي كان يفعلها بكل انتباه ⁷ فكانت الأرواح النجسه تصيح وتخرج من ناس خيرات ، وكمان شفيوا ناس خيرات من المشلولين والعرج ⁸ ووقع في المدينه فرح قوي ⁹ وكان في المدينه رجال اسمه سيمون ، كان وكان يخلي أهل المدينه يتعجبوا منه لأنه بيفعل السحر ، ويقول انه عظيم ¹⁰ وكان يصدقوه كلهم من الصغير للكبير ، ويقولوا :(ذيه الرجال هو قدرة الله اللي نسميها العظيمة) ¹¹ وكانوا يلحقوه لأنه كان يفاجأهم بسحره من زمان ¹² فلوما بشرهم فيليب عن مملكة الله ، وحاكاهم عن قوة المسيح ، امنوا وتعمدوا رجال ونسوان ¹³ وأمن سيمون نفسه واتغطس ، وكان واصل مع فيليب في كل بقعه ، ويتعجب من الآيات والمعجزات اللي كان يبسرها

¹⁴ وسمع في اورشليم أن أهل السامره تقبلوا كلام الله ، فرسلوا لهم بطرس ويوحنا ¹⁵ ولوما وصلوا للسامره وصلو بينها عس يوقع لهم الروح القدس ¹⁶ لأنه ما كانش قد نزل على اي واحد منهم ، هو بس انهم تغطسوا بأسم يسوع ¹⁷ وطرحوا أيدهم عليهم ووقع لهم الروح القدس

¹⁸ ولوما ابسر سيمون أن الله ادى لهم الروح القدس لوما طرح بطرس ويوحنا ايديهم عليه ، عرض عليهم زلط ¹⁹ وقال لهم :(ادوا لي تيه السلطه ، عسب يوقع الروح القدس لكل من اطرح يدي عليه)

²⁰ فقال له بطرس :(لجهنم انت وزلطك ، لأنك بتظن انك بالزلط عتحصل على هبة الله ²¹ مابش لك حصه ولا قسمه في ذيه ، لأن قلبك عند الله مشو مسلم ²² وتوب عن ذيه الشرك ، واطلب من الله عسب يغفر لك اللي خطر على بالك ²³ لأني ابسرك ملان بالحسد ومربوط بالشر)

²⁴ فجاوبه سيمون :(اطلبوا لي انتوا من الله عسب ما يوقعش بي ساع ما قلتوا)

²⁵ وبعدما قدموا بطرس ويوحنا شهادتهم واعلنوا رساله المسيح ، رجعوا للقدس ، وفي الطريق كانوا يبشروا في قرى خيرات في منطقة السامره ²⁶ وحاكا ملاك الله فيليب وقال له :(اتجهز عسب تسير في الظهر للطريق الصحراوي بين القدس وغزه) ²⁷ فقام فيليب وسار وفي الطريق لقى رجال من الحبشة ، كان راجع لبلاده بعدما زار اورشليم للعباده ، وكان ذيه الرجال من كبار الناس في الحبشه وكان وزير للخزانه عند كنداكة ملكة الحبشة ²⁸ ولوما كان راجع وجالس على مركبته، كان بيقرأ في كتاب النبي إشعياء ²⁹ فقال الروح لفيليب :(اسرع عسب تلحق تيه المركبه)

³⁰ وجرى فيليب للمركبه وسمع الرجال بيقرأ في كتاب النبي إشعياء فقال له :(انت فاهم ايش بتقرأ؟)

³¹ فجاوبه الرجال :(كيف افهم ومابش احد يشرح لي؟) وقال لفيليب انه يطلع ويجلس معه

³² وكان فصل الكتاب اللي بيقراه هي تيه

كان ساع نعجه سيقة للذبح

وساع حمل ساكت بين ايدي من يجزه

وما فتحش فمه

³⁴ فقال الوزير لفيليب :(لو سمحت عن من يتحاكا النبي؟ عن نفسه ولا عن واحد ثاني؟) ³⁵ وبدأ فيليب من تيه الفقره وهو يبشره بيسوع

³⁶ ولوما كانوا في الطريق وصلوا لبقعه بينها ماء فقال الرجال لفيليب :(هانا به ماء ، اش يمنع اني اتغطس؟) ³⁷ فجاوبه فيليب :(تستر تتغطس لو انت مؤمن من كل قلبك) فقال الرجال :(انا اؤمن ان المسيح ابن الله) ³⁸ وبعدا قلهم يوقفوا المركبه ، ونزل هو وفيليب للماء ، وغطسه فيليب ³⁹ ولوما خرجوا من الماء ، خطف روح الله فيليب ، فغاب عن عيون الرجال وما عاد ابسره الوزير ، وواصل سفره وهو فارح ⁴⁰ واما فيليب ابسر نفسه في مدينة أشدود ، وبعدا سار مبشر في المدن كلها لوما وصل الى قيصريه