6

¹ وفي تيك الأيام زاد عدد الطلاب ، وجلس اليهود الأجانب المغتربين يتحاكوا على اليهود اللي هم من أصل البلاد ، ويقولوا ان اراملهم ما بيستلمينش نصيبهن في المعيشه اليوميه ² وداعوا الرسل ال12 كل الطلاب وقالوا لهم :(ما يصلحش اننا نتراخى عن خدمة كلمة الله ولازم نقوم بتوزيع الأكل ³ فاختاروا يا اخوه سبعه رجال منكم ، سمعتهم حاليه ومليانين بالروح القدس والحكمه ، عسب نديلهم ذيه الواجب ⁴ ونواصل احنا على الصلاة والتبشير بكلام الله)

⁵ وارتاحت الجماعه كلها لذيه الخبر ، واختروا : اصطفان ، وهو رجال ملان بالروح القدس والايمان ، ومعه فيليب وبركو ونيسان وتيمون وبرمان ونقولا الانطاكي اللي تهود من قبل ⁶ وقدموا الجماعه هولا السبعه قدام الرسل ، وطرحوا ايديهم عليهم ودعوا الله عسبهم

⁷ وكان كلام الله ينتشر ، وعدد الطلاب يزداد خيرات في اورشليم ، وقبلوا الايمان خيرات من الكهنة ⁸ وكان اصطفان ملان من نعمة الله وقوته ، وكان يفعل عجايب وآيات قويه بين الناس ⁹ ولكن عارضوه بعض الناس اللي هم من جماعة معروفه بأسم المتحررين ، وهم يهود من القيروان والاسكندرية وكمان من كيليكية وآسيا ، وكانوا يتصايحوا مع اصطفان ¹⁰ ولكنهم ما استروش انهم يغلبوه من سبة الحكمة الي اداها له الروح القدس في الكلام

¹¹ رجعوا رشوا بعض الناس عسب يقولوا :(سمعنا ذيه الرجال يقول كلام كفر على موسى وعلى الله)

¹² وهكذا فعلوا فتنه ضده الشعب والشيوخ والفقهاء ، ومسكوه وادوه قدام المجلس ¹³ وادوا شهود زور يقولوا :(ذيه الرجال واصل وهو يسب الهيكل المقدس والشريعه ¹⁴ واحنا سمعناه يقول : ان عيهدم يسوع الناصري ذيه المكان ويغير التقايد اللي ورثناها عن موسى)

¹⁵ وابسروا له الموجودين في المجلس ، وابسروا ان وجهه ساع وجه ملاك