21

¹ ولوما رحنالنا منهم ، خطينا في البحر صلى جزيرة قوش ، وفي اليوم الثاني سرنا لجزيرة رودس ومن هاناك إلى ميناء باترة ² ولقينا هاناك سفينه مسافره إلى فينيقيه ، وركبنا فيها وخطينا ³ ولوما بدت لنا قبرص فلتناها على يسارنا وخطينا صلى سوريا ، وبعدا نزلنا في ميناء صور لأن السفينه كانت عتنزل حمولتها هاناك ⁴ ولقينا الطلاب هاناك وجلسنا عندهم سبعه ايام وكانوا يقولوا لبولس ينصحوه انه ما يسيرش لاورشليم ⁵ ولوما كملت زيارتنا خرجنا عسب نكمل السفر ، ورافقونا الطلاب مع زوجاتهم واولادهم عسب يودعونا لخارج المدينه ، وركعنا على الشاطئ عسب نصلي ⁶ وبعدا توادعنا وطلعنا للسفينه ، وهم رجعوا لبيوتهم

⁷ ومن صور وصلنا نهاية الرحله إلى عكا ، وسلمن على الأخوه وجلسنا عندهم يوم ⁸ وسرنا في اليوم الثاني إلى قيصريه ، وجلسنا في بيت فيليب البشير ، وهو واحد من السبعه ⁹ وكان معه اربع بنات عادهن بكارا وعندهن موهبه التنبؤ

¹⁰ وبعد ايام من جلستنا هاناك ، اقبل من اليهوديه نبي اسمه أغابوس ¹¹ وجا صلينا وشل حزام بولس وقيد به ايديه وارجيله وقال :(يقول الروح القدس :صاحب ذيه الحزام عيقيده اليهود هكذا في اورشليم ويسلموه ليد الوثنيين)

¹² لوما سمعنا ذيه الخبر ، جلسنا احنا والموجودين نتمنع بولس انه ما يطلعش إلى اورشليم ¹³ فقال بولس :(ايش فيكم بتبكوا وتقطعوا قلبي؟ انا مستعد مش للقيود وحدها ، ولكن حتى للموت في اورشليم عسب المسيح يسوع) ¹⁴ ولوما ماعد قدرنا نقنعه سكتنا وقلنا :(توقع ساع ما يشتي ربنا)

¹⁵ وبعد ذيه بأيام تجهزنا للسفر وطلعنا إلى اورشليم ¹⁶ وخطو معانا شويه طلاب من قيصريه ، فنزلونا في بيت مناسون القبرصي ، وهو طالب قديم ¹⁷ ولوما وصلنا اورشليم سلموا علينا الاخوه فارحين ¹⁸ ودخل معانا بولس في اليوم الثاني إلى يعقوب ، وكان الشيوخ كلهم موجودين ¹⁹ فسلم عليهم بولس وحاكاهم ايش وقع بالتفصيل بين الشعوب كلها

²⁰ فلوما سمعوا المجبر سبحوا الله ، وبعدا قالوا لبولس :(انت داري يا اخ ان الاف من اليهود امنوا وهم متعصبين لشريعة موسى ²¹ وهولا سمعوا انك تعلم اليهود المقيمين في كل الشعوب انهم يرتدوا عن شريعة موسى ، وتوصيهم ان مايختنوش اولادهم ولا يفعلوا بعاداتنا اللي نعرفها ²² فأيش الحل؟ لأنهم عيدروا انك قد اقبلت ²³ افعل ساع ما نحاكيك ، عندنا اربعه رجال عليهم نذر ²⁴ شلهم واتطهر معهم واصرف عليهم عسب يحلقوا روسهم ، وعيعرفوا كل الشعب ان اللي سمعوه عليك مشو صحيح ، وانك ساعهم على شريعة موسى ²⁵ واما اللي امنوا من غير اليهود قد رسلنا لهم قرارنا ، وهو ان يبطلوا من ذبايح الأصنام وعن الدم والحيوان المخنوق والزنى

²⁶ فشل بولس الرجال الأربعه في اليوم الثاني وتطهر معاهم ودخل الهيكل وسجل تاريخ انتهاء أيام التطهير ووقت ما يقدموا القربان كل واحد منهم ²⁷ ولوما كانت تكمل أيام الطهور السبعه ، ابسر بعض اليهود الآسيويين بولس في الهيكل ، وهيجوا جمهور الشعب وقبضوا عليه ²⁸ وصاحوا :(الحقونا يا بني اسرائيل ، ذيه هو الرجال اللي بيعلم الناس في كل بقعه تعليم ضد شعبنا وعقيدتنا ، واكثر من ذيه دخل الأجانب إلى بيت الله ونجس تيه البقعه المقدسه) ²⁹ لأنهم كانوا قد ابسروا طريفي الأفاسي مع بولس في المدينه ، وشكوا انه دخله معه بيت الله

³⁰ فهاجوا الناس كلهم ، وجوا الناس مسرعين من كل بقعه ، ولوما مسكوا بولس وهزوروه خارج بيت الله ، وبعدا تغلقت الأبواب على طول ³¹ ولوما كانوا بيحاولوا يقتلوه ، سمع قايد الكتيبه الرومانية ان مدينة اورشليم كلها هايجه ³² وشل معه عساكر وسار على طول صليهم ، وحين ابسروا الضباط والعساكر ووقفوا عن ضرب بولس

³³ وقرب منه القايد ومسكه وأمرهم يقيدوه بسلسلتين ، وبعدا سأل عليه عسب يعرف منهو ذيه وايش بيفعل ³⁴ وكانوا بعضهم يصيحوا بحاجه والثانين يصيحوا بشي ثاني ، وما استرش القايد انه يعرف صدق الموضوع من سبة صياح الناس ، فأمر العساكر انهم يشلوا بولس للمعسكر ³⁵ ولوما وصلوا به للسلم حملوه العساكر عسب ما ينضربش من الشعب ³⁶ لأنهم كانوا يلحقوه ويصيحوا :(اقتلوه) ³⁷ وحين دخل بولس للقلعه ، قال لقايد الكتيبه :(عتخليني اقولك حاجه؟) فقال له :(انت تعرف تتحاكا اليونانيه؟

...

³⁸ مش انت المصري اللي فعل فتنه من فتره وخرج ب4000 قاتل للصحراء؟)

³⁹ فقال بولس :(انا يهودي من طرسوس ، المدينه المشهوره في كيليكية ، ويا منعاه اسمح لي اتحاكا مع الشعب)

⁴⁰ ووافق له ، وبعدا وقف بولس على السلم واشر بيده للشعب ، وحين سكتوا كلهم حاكاهم بالعبريه قال :