12

¹ وفي ذيك الوعد مسك الملك هيرودس على بعض المؤمنين وهو يأذيهم ² وقتل بحد السيف يعقوب اخو يوحنا ³ ولوما ابسر ان اليهود راضين ، مسك والكل على بطرس ، وكان أيام عيد الفطير ⁴ وبعدما مسكه حبسه وسلمه إلى اربع فرق عسب يحرسوه ، كل فرقه اربعه جنود ، وكان ناوي انه يخرجه للشعب بعد عيد الفصح

⁵ وخلاه في السجن ، وكانت الكنيسة بتصلي لله بدون توقف على سبه ⁶ ولوما كان هيرودس عيقدم بطرس للمحاكمه في الصبح ، وكان بطرس في تيك الليله راقد بين اثنين حراس ، ومربوط بسلسلتين ، وكان به على الباب عساكر يوبهوا للوابه ⁷ وفجأه بدي ملاك الله هاناك ، وضوة الغرفه ضوء قوي ، وضرب الملاك بطرس على جنبه وقومه من النوم ، وقال له :(قم طوالي) وافتكين السلاسل من يده

⁸ وقال له الملاك :(شد حزامك واربط حذاتك) وفعل ساع ما قال له ، وبعدا قال له :(البس ثوك والحقني) ⁹ فخرج يلحقه ، وهو مش داري ان اللي فعله الملاك شي صدقي ، وكان قصده انها رؤيا ¹⁰ وخطيوا من شق الحارس الأول والثاني ووصلوا للباب الحديدي الي يخرج للمدينه ، وافتتح الباب من نفسه وخرجوا لوما قطعوا شارع واحد ، وفلته الملاك على طول

¹¹ وصحي بطرس من غفلته قال :(ذلحينه دريت واتأكدت ان المسيح رسل لي ملاك عسب يساعدني من يد هيرودس ومن كل ما كان مريع له الشعب اليهودي)

¹² وبعدا فكر قليل وسار لبيت مريم أم يوحنا اللي يسموه مرقس ، وكان به هاناك ناس بيدعوا الله ¹³ ودق الباب الخارجي ، وجت جاريه اسمها روضه عسب تجاوب ¹⁴ ولوما درت بصوت بطرس رجعت سريع بدون ماتفتح الباب من قوة فرحتها ، وحاكتهم ان بطرس على الباب

¹⁵ فقالوا لها :(جننتي ) وهي صممت على كلامها ، فقالوا لها :(ذيه ملاكه)

¹⁶ وجلس بطرس يدق الباب لوما فتحوا له ، وحين ابسروه استغربوا ¹⁷ وسكتهم بأشارة من يده وحاكاهم كيف لوما خرجه المسيح من السجن ، وقال لهم :(حاكوا يعقوب والأخوه باللي وقع) وبعدا خرج وسار لمكان ثاني

¹⁸ وفي عيد الفصح ، وقع جنان بين العساكر وجلسوا يسألوا ايش وقع لبطرس؟ ¹⁹ ولوما طلبه هيرودس وما لقيش ، سأل العساكر وامر بقتلهم ، وبعدا نزل من اليهوديه الى قيصريه وحل بينها ²⁰ وكان هيرودس زاعل قوي على أهل صور صيدا ، واتفقوا بيناتهم البين وجو صليه ،بعدما تريحموا بلاستش الوكيل على امور الملك ، وطلبوا السلام لأن بلادهم كان يوقع لها امداد الأكل من مملكته

²¹ وفي اليوم المحدد لبس هيرودس ثيابه الملكيه وكوزر على العرش يخطب في الشعب ²² فصاحوا كلهم :(ذيه صوت إله مش صوت انسان) ²³ غضربه ملاك الله على طول لأنه ما سبح الله ، وأكله الدود ومات

²⁴ وكان كلام الله ينتشر ويثمر

²⁵ ورجع برنابا وشاؤل من اورشليم بعدما كملوا خدمتهم ، ومعاهم يوحنا اللي يسموه مرقس