4

¹ لازم يعتبرونا الناس اننا خدام للمسيح وموكلين بأسرار الله ² والمطلوب من هولا الوكلاء ، انهم يوقعو امينين ³ واما انا ما يهمنيش ابد لو كنتو عتحاسبوني انتو أو أي محكمة بشرية ، ولكن اني احاسب نفسي ⁴ لأن ضميري ما بيوجعنيش بشي ، لكن هاذه مايبررنيش ، ولكن المسيح هو اللي عيحاسبني ⁵ يعني لا تحكموش على احد من قبل ، إلا لوما يجي المسيح وهو عيكتشف المخفي ، ويبدي نبات القلوب وعيشل كل واحد من الله اللي يستحقه من الشكر

⁶ وانا علميدكم يا اخوتي خليت نفسي وأبلوس مثال علميد تتعلمو من حالتنا :(انكم تحافظو على الأصول) ساع ماهو مكتوب ، فما يقعش فيكم من يزنط على الثاني ⁷ ومنهو ميزك على غيرك؟ كل ما معك اداه الله لك ، ولو كان ادى لك فليش عادك تزنط كأنه ما اداش لك؟

⁸ انتو شبعتو واغتنيتو ووقعتو ملوك من غيرنا ، ويايت كنتم ملوك من صدق ، علميد نتشارك معاكم في الملك ⁹ شكل الله قد فعلنا احنا الرسل اقل الناس ساع المحكوم عليهم بالموت بالظاهر ، لأننا مشهد للعالم ، للملايكه والناس ¹⁰ احنا اغبياء علميد المسيح وانتو عقلا في المسيح ، احنا ضعفاء وانتو اقويا ، انتو مكرمين واحنا محتقرين ¹¹ وللان واحنا بنتعب من الجوع والعطش والضرب والملاحقه ¹² نتعب ونشتغل بيداتنا علميد يوقع لنا لقمة عيش ويسبونا ونباركهم ونتلاحق ونتحمل ¹³ والنميمه بالنصيحه ، قد احنا ساع حثالة الناس وقمامة العالم

¹⁴ وانا بكتب ذيه مش علميد اخزيكم ، ولكن علميد انصحكم لأنكم جهالي الحبايب ¹⁵ ولو معاكم في المسيح 10000 يروكم الطريق ، لكن مابش معاكم آباء خيرات ، لأنه انا اللي ولدكم في المسيح عيسى بالبشاره اللي حملتها لكم ¹⁶ علميد ذيه يا منعاه قعو ساع ما انا ¹⁷ وعلميد ذيه رسلت لكم تيموثاؤس ، ابني الحبيب الأمين في المسيح ، وهو يذكركم بخبري في عيسى المسيح ، ساع ما اعلمها في كل مكان في جميع الكنايس

¹⁸ بعضكم يظن اني ماعاد اجيش عندكم ، وعلميد ذيه يجلسو يزنطو ¹⁹ لكني عد اجي قريب ان شاء الرب ، وابسر ان ذيه المتكبرين عندهم قوة ولا هو مجابره وخبر فاضي ²⁰ لأن مملكة الله مشي مجبر فاضي ، ولكن قوة ²¹ ايش تشتو يعني؟ اني ابدي لكم بعصيه ، ولا بالمحبه وروح الوداعه؟