10

¹ واشتي يا اخوتي انكم تفهمو ايش وقع لأبائنا ، كلهم كانو تحت السحابه وخطو من البحر ² وكلهم تعمدو لموسى في السحابه وفي البحر ³ وكلهم اكلو اكل روحي واحد ⁴ وكلهم كانو بيشربو شارب روحي واحد من حجره روحيه كانت واصل معاهم ، وتيه الحجره هي المسيح ⁵ ومع هاذه ، مارضيش الله عن اكثرهم ، ونكعو اموات في الصحراء

⁶ كل هاذه وقع علميد يوقع مثل ، علميد مانشتهيش الشر ساع ما اشتهوه هم ⁷ ولا تعبدوش الأصنام ساع ما عبدها بعضهم ، والكتاب يقول :(جلس الشعب ياكل ويشرب ، وبعدا قامو يلعبو) ⁸ وما نستسلمش للزنى ساع ما استسلم بعضهم ، ومات منهم ثلاثه وعشرين الف في يوم واحد ⁹ وما نجربش المسيح ساع ما جربه بعضهم وانهتهم الثعابين ¹⁰ ولا نضبح ساع ما فعلو بعضهم ، وانهاهم ملاك الموت

¹¹ ووقع لهم هاذه علميد يوقعو عبره ، وهو مكتوب علميد نوبه احنا اللي عايشين في نهاية الزمان ¹² ويوبه من النكعه اللي هو قايم ¹³ التجارب اللي وقعت لكم هي عادية للبشر ، لأن الله صادق وما يكلفكمش من التجارب الا ما تقدرو عليه ، ويزيد يدي لكم مع التجربه حاجه تنجيكم منها وتسترو تتحملوها ¹⁴ وعلميد هاذه يا خبرتي ، ابعدو لكم من عبادة الأصنام ¹⁵ انا احاكيكم ساع عقال ، واحكمو انتو في اللي بين اقوله ¹⁶ كاس البركه اللي نباركها ، هي مشاركه من دم المسيح صح او ماشي؟ والخبز اللي نكسره هو من جسم المسيح صح ولا ماشي؟ ¹⁷ احنا على كثرنا جسم واحد لأن هاناك خبز واحد ، واحنا كلنا نشترك في هاذه الخبز الواحد

¹⁸ ابسرو افعال بني اسرائيل اللي كانو ياكلو من الضحايا لهم رابطة مع الله في بقعة تقديمها ¹⁹ فأيش معنى كلامي؟ هل هو ان الصنم هو اله حقيقي ولا ان الأكل اللي بيقدم للصنم هو ضحية حقيقية؟ ²⁰ اكيد ماشي ، يعني ان ذبايح الوثنيين هي ذبايح للشيطان مشي لله ، وانا ما اشتيش ان توقعو شركاء الشياطين ²¹ ما تستروش ان تشربو كاس المسيح وكاس الشياطين ، ولا انكم تشتركو في مايدة المسيح ومايدة الشياطين ²² ولا تشتو اننا نهيج غيرة المسيح؟ واحنا دارين اننا مش اقوى منه ²³ كل شي حلال ، لكن مش كل شي ينفع ، كل شي حلال ولكن مش كل شي يبني ²⁴ كل واحد منكم لازم انه يسعى للخير علميد الكل مش له لحاله

²⁵ كل اللي يبتاع في سوق اللحمه تسترو تاكلو منه ، ولا يكون عندك شك في ضميرك ²⁶ والكتاب يقول :(الأرض لربنا وكل ما فيها)

²⁷ ولو صيح لكم وثني وقبلتو دعوته ، كلو اي شي يقربوه لكم ولا تسألوش عن اي حاجه من ضميركم ²⁸ ولكن لو قال لكم اي احد ان هاذه الأكل من ذبايح الأصنام لا تاكلوش منه ، علميد اللي حاكاكم وعلميد الضمير ²⁹ وانا مش قصدي ضميركم انتو ، ولكن ضمير غيركم ، وليش ضمير غيري يحبس حريتي؟ ³⁰ وإذا أكلت أكل وشكرت الله عليه ، فليش يلومني أي احد في اللي شكرت الله عليه؟

³¹ ولوما تاكلو وتشربو ، او اي شي تفعلوه افعلو أي شي لمجد الله ³² لا توقعوش جره تنكعو اليهود ولا اجنبي ولا لأمة الله ³³ انا والكل اعمل هاذه ، احاول اني ارضي الكل في كل ما افعله ، وما يهمنيش مصلحتي انا ، ولكن يهمني مصلحة الكل علميد ينجو